22
Si David woy ka mgo
Sakup Din
1 No nig-awo si David to Gat, woy nigpanlaguy sikandin pohondio to pilang to Adullam. To pogkarinog to mgo kakoy rin woy to lunggunan to amoy rin tongod to sikan, pighondiaan dan sikandin dio. 2 Songo niglimud to kandin ka tibon mgo otow no nabaybadyaran, woy ka mgo duon utang, woy ka mgo duon igmasakit to goinawa, woy nohimu no igbudyag dan si David. Mgo hop-at no gatus ka mgo otow no nigduma kandin. 3 Ligkat dio, nighondio si David to Mispa duon to tano to Moab, woy pignangonan din ka hari to Moab to “Ogpaugutan nu buwa no og-ugpo ka amoy woy inoy ku kai to koikow tagood no ogpitawon ku ko nokoy ka oghimuon to Magboboot kanak?” 4 No sikan ian no ingaat ni David ka amoy woy inoy rin duon to hari to Moab, woy dio sikandan nig-ugpo tagood to duon si David to ilian. 5 Di nignangon ka taagtagna no si Gad ki David to “Doka’g palinggaat to ilian. Hondio ka to tano to Juda.” No sikan ian no nighipanow si David woy nighondio sikandin to kaikadyuan to Harit.
Pighimatadyan ni Saul ka mgo Taagpanubad
6 No kuntoon nigdinog si Saul no duon nigkita ki David duma to mgo otow rin. Nigpinnuu si Saul diraom to sagboka no kadyu no tamarisku no niggon-gon to kommag din dio to bubungan to Gibaa. Niglingut kandin ka mgo otow rin no duon katondanan. 7 Pignangonan sikandan ni Saul to “Pamminog kow no mgo kapunganan ni Binyamin. Naan now buwa no ogkapambogadyan kow ni David to mgo pinamua-an to ubas woy mgo kamot? Naan now no kaniu tibo ogkohimu rin no mgo igbudyag to tag songo libu woy tag songo gatus? 8 Sikan buwa ka pugtian no nasagboka kow to pog-atu kanak? Manio to waro a now manangoni no nigpangulibot ka anak ku duon to anak ni Isai? Waro sagboka kaniu no duon dakol no goinawa kanak, su waro kow nignangon no pig-adyat to anak ku ka suguanon ku odyow no oggopasan a rin unawa to oghimuon din kuntoon.” 9 Di duon nighasindog si Doig no matig Idom taliwaro to mgo otow ni Saul woy nigkagi sikandin to “Nakita ku ka anak ni Isai no nighondio ki Ahimilik no anak ni Ahitub duon to Nob. 10 Nigmaan-maan si Ahimilik duon to Magboboot tongod ki David, woy songo pigbogadyan din sikandin to koonon woy to kampilan ni Goliat no Filistihanon.” 11 No pigpo-umow to hari ka taagpanubad no si Ahimilik no anak ni Ahitub duma to tibon lunggunan to amoy rin, no ian ka mgo taagpanubad duon to Nob, woy nigmanlopow sikandan tibo duon to hari. 12 Nigkagi si Saul to “Pamminog ka, anak ni Ahitub.” Nigtabak sikandin to “Soini a, Anggam.” 13 Nig-inso si Saul kandin to “Manio to nigbabantaan ka to maroot kanak? Hoo, koikow woy ka anak ni Isai, su pigbogadyan nu sikandin to pan woy to moirob woy pig-inso nu ka Magboboot tongod kandin, woy kuntoon nig-atu on sikandin kanak, woy kuntoon oggopasan a rin porom.” 14 Nigtabak si Ahimilik duon to hari to “Waro unawa ki David no ogkasaligan nu, maka-amung nu sikandin, igbudyag to mgo taagbantoy nu no mgo sundau, woy nokoy pad no pig-ila lagboy sikandin to tibon lunggunan nu. 15 Naan nu buwa no sikan no allow ian ka an-anadyan no pog-inso ku to Magboboot tongod kandin? Kono ian! Kono porom ogbadyungan to hari ka soini no suguanon nu, woy ka lunggunan to amoy ku, su waro gindawanan ku to soini tibo.” 16 Di nigtabak ka hari to “Ogkamatoy ka Ahimilik, koikow lagkos ka tibon lunggunan to amoy nu.” 17 No nigsugu ka hari to mgo taagbantoy no mgo sundau no nigtopad kandin to “Himatadyi now ka mgo taagpanubad to Magboboot, su songo nig-agpot sikandan ki David to pog-atu kanak. Nataga sikandan no nigpanlaguy si David, di waro a ran manangoni.” Di ogkogo ka mgo otow to hari to poghimatoy to mgo taagpanubad to Magboboot. 18 No pigsugu to hari si Doig to “Koikow ka ogpanigbas to mgo taagpanubad.” No pigpanigbas sikandan ni Doig no matig Idom. 85 no mgo otow ka pigpanghimatadyan din to sikan no allow. Tibo sikandan mgo taagpanubad to Magboboot. 19 Songo pigpanghimatadyan din ka tibon mgo otow no nig-ugpo to lunsud to Nob no ian ka ugpaan to mgo taagpanubad. Inlagkos din to poghimatoy ka mgo lukos woy boi, mgo bato woy mgo nigsusu pad, mgo baka, mgo asnu woy mgo karniru.
20 Di nigpanlaguy si Abiatar no anak ni Ahimilik no anak ni Ahitub. Nigpa-aput sikandin ki David. 21 Pignangonan din si David no pighimatadyan ni Saul ka tibon mgo taagpanubad to Magboboot. 22 No nignangon si David ki Abiatar to “To sikan no allow no nakita ku si Doig no matig Idom duon, nataga a no ognangonan din si Saul. Sikoddi ka ogkasonditan to kamatadyon to tibon lunggunan to amoy nu. 23 Palinggaat ka duma koddi woy doka’g kahallok. Songo nigbabantak to poghimatoy kanak ka otow no nigbabantak to poghimatoy koikow. Waro igkasasow nu kai’t kanak.”