23
Pigpangabangan ni David ka Kila
1 No kuntoon duon nignangon ki David to “Nighondio ka mgo Filistihanon to Kila woy nigman-agow sikandan to bogas dio to mgo giokanan.” 2 No nig-inso si David duon to Magboboot to “Oghondio a buwa woy og-atuon ku ka soini no mgo Filistihanon?” Nigtabak ka Magboboot to “Hondio ka. Lusuri nu ka mgo Filistihanon woy pangabangi nu ka lunsud to Kila.” 3 Di nignangon ka mgo otow rin ki David to “Nahallok kid on taan kai to tano to Juda, iam pad naan ko oghondio ki to Kila no og-atu to mgo Filistihanon!” 4 No nighutuk nig-inso si David duon to Magboboot, woy nigtabak ka Magboboot kandin to “Hondio ka to Kila, su igbogoy ku ka mgo Filistihanon duon to boad nu.” 5 No nighondio si David duma to mgo otow rin duon to Kila, woy pig-atuan dan ka mgo Filistihanon, woy pigpang-agow ran ka mgo adyam dan. Pigbaybadyaran dan ka mgo Filistihanon, woy pigpangabangan dan ka mgo otow to Kila. 6 (No kuntoon to pogpanlaguy ni Abiatar no anak ni Ahimilik dio ki David to Kila, na-aap din ka ipoda.)
Piggapon ni Saul si David
7 No nigdinog si Saul no nighondio si David to Kila, woy nigkagi sikandin to “Inbogoy on sikandin to Magboboot kai to boad ku, hoo su unawa to pigkalabusu ni David ka lawa rin to pogsood din to lunsud no nalingkusan to aad no batu no duon lokob.” 8 No inpo-umow ni Saul ka tibon mgo sundau rin odyow to poghondio to Kila odyow no ogkalingutan si David woy ka mgo otow rin. 9 To pogdinog ni David no nigbabantaan si Saul to pog-atu kandin, nignangon sikandin duon ki Abiatar no taagpanubad to “Aapa nu ka ipod kai.” 10 No nigkagi si David to “Magboboot no Igbudyag to Israil, nakarinog soini no suguanon nu no nigbabantaan si Saul to poghondii to Kila odyow to pogpanghimatoy to mgo otow to lunsud tongod kanak. 11 Igbogoy a buwa to mgo otow to Kila duon kandin? Oghondii buwa ian si Saul unawa to narinog to soini no suguanon nu? Magboboot no Tinuuhan to Israil, nangoni nu ka suguanon nu.” Woy nigtabak ka Magboboot to “Oghonduon ian sikandin.” 12 Nighutuk nig-inso si David to “Igbogoy a buwa to mgo matig Kila duma to mgo otow ku duon ki Saul?” Woy nigtabak ka Magboboot to “Hoo igbogoy ka ran.” 13 No nig-awo si David to Kila duma to mgo otow rin no mgo hon-om on no gatus no otow. Woy nig-ungud nighalinhalin sikandan. To pogkarinog ni Saul no naka-awo si David to Kila, waro sikandin nigtood to poghondio.
14 Nig-ugpo si David duon to mgo ilian to mgo bubungan duon to han-hanawan to Sip. Nig-ungud nigpamangho si Saul ki David allow-allow, di waro ibogoy to Magboboot si David duon to mgo boad din. 15 To duon si David to Horis duon to han-hanawan to Sip, nigdinog sikandin no nighipanow si Saul odyow to poghimatoy kandin. 16 No nighondio ka anak ni Saul no si Yunatan ki David duon to Horis, woy pigbuligan din si David to pogpanokal-nokal duon to pogsalig to Magboboot. 17 Nigkagi sikandin to “Doka’g kahallok. Kono ogpaka-amonu ka amoy ku no si Saul koikow. Ogkohimu ka no hari to Israil, woy ogkohimu a ro no igkorangob koikow. Agad ka amoy ku no si Saul, nataga sikandin to sikan.” 18 Nigpapangulibotoy sikandan daruwa duon to tangkaan to Magboboot. No nig-uli si Yunatan di nigpalinggaat si David to Horis.
19 No kuntoon, nighondio ka mgo matig Sip ki Saul no duon to Gibaa woy nignangon sikandan to “Nighoos si David duon to taliwaro noy duon to mgo ilian to Horis, duon to bubungan to Hakila to baabagan to Yisimun. 20 No kuntoon, Hari, agad kon-u no noiniatan nu no allow, hondio ka to kanami, woy sikanami ka ogtinawo to katongod to pogbogoy kandin duon to boad nu.” 21 Nigtabak si Saul to “Ogkaboligan kow porom to Magboboot tongod to dakol no goinawa now kanak. 22 Hondio kow to poghimpod pad. Maan-maana now ko hondoi ka mgo ogdoogan ni David, woy ko hontow ka nakakita kandin dio. Nakarinog a no mangilam lagboy sikandin. 23 Pang-inso kow ko hondoi ka mgo oghoosan din, woy libong kow kanak ko duon igkanangon now kanak. No ogduma a kaniu, woy ko duon sikandin dio, ogpamanghoon ku sikandin taliwaro to tibon koot-otawan to Juda.” 24 No nighipanow sikandan hun-a ki Saul pohondio to Sip. No kuntoon duon si David to han-hanawan to Maon to Araba to baabagan to Yisimun. 25 Nigbunsud si Saul woy ka mgo otow rin to pogpamangho ki David. To pogdinog ni David to soini, nighondio sikandin duon to dakol no batu to han-hanawan to Maon. To pogkarinog ni Saul to sikan, nighondio sikandin to han-hanawan to Maon no niggapon ki David. 26 Nigpangdaligdig si Saul to bubungan woy duon si David woy ka mgo otow rin to limang to sikan no bubungan no nig-agpas to pogpamariu porom ki Saul. To marani on si Saul woy ka mgo otow rin odyow to pogdakop porom ki David, 27 duon niglopow no taagnangon no nigkagi ki Saul to “Agpas ka! Niglusud ka mgo Filistihanon to tano ta.”
28 No sikan ian no nighagtong si Saul to poggapon ki David woy nighondio sikandin to pog-atu to mgo Filistihanon. Tongod to sikan, pighingaranan dan ka sikan no longod to Sila-Hamaklikot no to kanta pad Batu to Pogsusuwoy. 29 Ligkat dio, nighipanow si David woy nig-ugpo sikandin to mgo ilian to In-Gidi.