24
Ingkannugun ni David ka Ukul ni Saul
1 Takas to naka-uli si Saul ligkat to poggapon to mgo Filistihanon, duon nignangon kandin to “Duon si David nig-ugpo to han-hanawan to In-Gidi.” 2 No nig-aap si Saul to tatou no libu no pig-aam no otow to Israil, woy nighipanow sikandin odyow to pogpamangho ki David woy to mgo otow rin duon to batuon no ugpaan to mgo magintaunan no mgo kambing. 3 Niglopow sikandin to longod to mgo kulungan to mgo karniru no duon dakol no pilang. Nigsood si Saul to pilang odyow to pog-indos, woy duon naan si David woy ka mgo otow rin to diraom lagboy to pilang. 4 Nigkagi ka mgo otow ki David to “Soini ka allow no innangon to Magboboot to pogkagi rin to ‘Igbogoy ku ka usig nu duon to boad nu odyow no ogbobootan nu agad nokoy ka oghimuon nu kandin.’” No nigmohimuung si David to pogdani ki Saul, woy pigtabas din ka ilis to kinabo ni Saul. 5 Takas to sikan, nigsondit si David no pigtabas din ka kinabo ni Saul. 6 Pignangonan din ka mgo otow rin to “Ogkaponoran a porom to Magboboot to poghimu to iing to sikan duon to igbudyag ku no pig-aam to Magboboot. Kono a porom og-atu kandin su pig-aam ian sikandin to Magboboot.” 7 Woy pinabadyo to sikan no mgo kinagian pigsaparan ni David ka mgo otow rin, woy waro din pauguti sikandan to pogtinagpo ki Saul. Woy niglibuwas si Saul to pilang no nighipanow man on. 8 No niglibuwas si David to pilang, woy nig-umow sikandin ki Saul to “Igbudyag ku no hari!” To pogpitow ni Saul to koiniugan din, nig-unduk si David woy niglangkob sikandin duon to tano. 9 Nig-inso sikandin ki Saul to “Manio to ogpamminog ka to mgo otow ko ognangon sikandan no ‘Nigbabantaan si David to maroot koikow’? 10 Nakita nu kuntoon no allow no inbogoy ka to Magboboot duon to boad ku duon to pilang. Duon nigbaghot kanak to poghimatoy koikow, di pigpangabangan ku sikoikow. Nignangon a to “Kono a og-atu to igbudyag ku su sikandin ka pig-aam to Magboboot.’ 11 Pitowa nu, Amo, soini ka tampod to kinabo nu kai to boad ku! Pigtabas ku ka ilis to kinabo nu di waro ku sikoikow himatadyi. Waro sao no nohimu ku koikow, di pigpamangho a nu odyow no ogkohimatadyan a nu porom. 12 Ka Magboboot ka oghusoy kanta daruwa porom. Woy songo ogsulian to Magboboot ka mgo maroot no hinimuan nu kanak, di kono ku ogmonuon sikoikow. 13 Hoo su duon taan no kinagian no nignangon no ‘Ka maroot no hinimuan ogligkat to maroot no otow’ no sikan ian no kono a oghimu to maroot koikow. 14 Hontow ka pigpamangho to hari to Israil? Hontow ka piggapon nu? Sagboka no asu no namatoy buwa? Songo kutu buwa? 15 Ka Magboboot ian porom ka ogboboot woy oghusoy kanta daruwa. Ogdoromdomon a rin porom, woy ogkalitosan a rin porom no ogkapangabangan a rin ligkat to boad nu.”
16 Takas to pogkagi ni David to soini tibo, nig-inso si Saul to “Koikow buwa sikan, David no anak ku?” Woy nigsinogow si Saul to maagbot. 17 Nigkagi sikandin to “Matuwarong ka pad to koddi. Marodyow ka pog-otow-otow nu kanak, di maroot ka pog-otow-otow ku koikow. 18 Nignangon ka kuntoon to marodyow no hinimuan nu kanak; inbogoy a to Magboboot duon to boad nu, di waro a nu himatadyi. 19 Ko ogpakakita ka otow to usig din, ogpohipanawon din buwa no waro pali? Kono! Ogkaboligan ka porom to Magboboot tongod to pighimu nu kanak kuntoon no allow. 20 Nataga a no ogkohimu ka no hari, woy no ogkohogot ka pogkahari nu to Israil. 21 No kuntoon panguliboti a nu pinabadyo to Magboboot no kono nu ogpanghimatadyan ka mgo tipouri ku, woy kono nu og-awoon ka ngaran ku duon to lunggunan to amoy ku.” 22 No nangulibot si David ki Saul, woy nig-uli si Saul, di nighondio si David duma to mgo otow rin duon to ilian.