25
Si David, Si Abigail woy Si Nabal
1 No kuntoon, namatoy si Samuel woy niglimud-limud ka tibon mgo otow to Israil odyow to pogpandaawit tongod kandin. Inlobong dan si Samuel to ugpaan din to Rama. No nighondio si David dio to Han-hanawan to Maon.
2 No kuntoon duon otow to Maon no tagtuun to tano dio to Karmil. Datu lagboy sikandin su duon songo libu no mgo kambing woy tatou no libu no mgo karniru rin, woy pigpapanamporan din ka bulbul dan dio to Karmil. 3 Ka ngaran to otow ian si Nabal woy ka ngaran to igboi rin ian si Abigail. Marodyow pitawon woy marodyow to pogdoromdom no boi si Abigail, di ka iglukos din no kapunganan ni Kalib makogal to uu woy maroot to pog-otow-otow to mgo duma rin. 4 To duon si David to han-hanawan, nigdinog sikandin no nigpanampod si Nabal to bulbul to mgo karniru rin. 5 No sikan ian no nigpa-aap sikandin to sampuu to mgo baubato din, woy pignangonan din sikandan to “Hondio kow ki Nabal duon to Karmil, woy ma-maana now sikandin pinabadyo to ngaran ku. 6 Kagi kow kandin to ‘Ogmaadyat poron ka ukul nu! Marodyow porom ka pog-ugpo nu woy to mgo otow to lunggunan nu! Songo marodyow porom ka pog-ugpo to tibo no duon to koikow! 7 Nakarinog a no nigpapanampod ka to bulbul to mgo karniru nu. Doromdoma nu no to tibon mgo allow to pogdumaruma to mgo taagbantoy to mgo karniru nu kanami, waro noy baybadyari sikandan, woy waro maagaki sikandan to tibon mgo allow to pog-ugpo dan to Karmil. 8 Ma-maana nu ka mgo suguanon nu, woy ognangonan ka ran. No kuntoon, dorodyowa nu to pog-otow-otow to soini no mgo baubato ku, su niglopow sikandan koikow to soini no allow to pogkukuus. Bogadyi nu kun ka mgo suguanon nu, woy ka anak nu no si David ko nokoy ka igkabogoy nu kandan.’”
9 To poglopow to mgo otow ni David, sikan ian ka ingkagi ran ki Nabal to ngaran ni David. No nigtatagad sikandan ko nokoy ka tabak din. 10 Nigtabak si Nabal to mgo suguanon ni David to “Hontow soini no David? Hontow soini no anak ni Isai? Moon-ing ka mgo suguanon no og-ongkod to mgo igbudyag dan kuntoon no mgo allow. 11 Manio no ogpuruton ku ka woig ku woy ka pan ku, woy ka saapu no in-iow ku tongod to mgo taagtampod to bulbul to mgo karniru ku, odyow ro to pogbogoy to mgo otow no waro ku moiloi to puunan dan?”
12 Nigliku ka mgo otow ni David woy niglibong sikandan kandin. To poglopow ran nignangon-nangon sikandan to tibo no ingkagi ni Nabal. 13 Nigkagi si David to mgo otow rin to “Sisinikot kow on to mgo kampilan now!” Woy nigsinikot on sikandan, woy songo nigsinikot si David to kandin no kampilan. Mgo hop-at no gatus ka mgo otow no nighipanow duma ki David, no nigpalinggaat ka daruwa no gatus to pogbantoy to mgo kaaglagan dan.
14 To igkorangob no kinagian, duon sagboka no suguanon no nignangon ki Abigail no igboi ni Nabal to “Nigpa-aap si David to mgo taagnangon puun to han-hanawan odyow to pogmaan-maan to igbudyag noy, di pighubabo din do sikandan. 15 Di marodyow lagboy ka pog-otow-otow to soini no mgo otow kanami. Waro koy nabaybadyaran, woy to tibon mgo allow no marani koy kandan to mgo pasabsaban waro koy maagaki. 16 Allow woy maukilom nig-uunawa sikandan to aad no nakalingkus kanami tagood to nigbabantoy koy to mgo karniru marani kandan. 17 No doromdoma nu pa ko nokoy ka ogkohimu nu, su magaan oglopow ka logpad to igbudyag ta woy to tibon lunggunan din. Maroot sikandin no otow, su waro ogpaka-aukoy kandin.”
18 Waro nigtataantaan si Abigail. Nigpurut sikandin to daruwa no gatus no pan, daruwa no laplap no sooranan to binu, lalima no no-iow no karniru, songo lata to sinandag no trigua, songo gatus no komkom to pasasb, woy daruwa no gatus no komkom to narampil no bogas to igira, woy in-untud din ka tibo to mgo asnu. 19 No pignangonan din ka mgo suguanon din to “Hun-a kow, woy ogsundul a kaniu.” Di waro sikandin mognangon to iglukos din no si Nabal. 20 To pog-untud ni Abigail to asnu rin no nigtupang pohondio to sagboka no aug to bubungan, duon naan si David duma to mgo otow rin no nigtupang no nigparoog kandin, woy pigtomu ni Abigail sikandan. 21 Iam pad nignangon si David to mgo duma rin to “Waro puus ka pogbantoy ku to mgo kaaglagan to sikan no otow duon to han-hanawan odyow no waro ogkaagak. Maroot ka insuli din to marodyow. 22 Ogkalogparan a lagboy to Magboboot porom ko duon sagboka no lukos din no ipalinggaat ku no manokal asoom to masoom!” 23 To pogkakita ni Abigail ki David, niglogsad sikandin puun to asnu rin, woy nig-unduk sikandin no niglangkob to tano to tangkaan ni David. 24 Nigluhud sikandin to tangkaan ni David woy nignangon sikandin to “Igbudyag ku, koddi do ka ogsonditan nu porom. Pauguti a nu bag no suguanon nu to pogkagi koikow. Pamminog ka ro to kinagian to soini no suguanon nu. 25 Kono porom ogdoromdom ka igbudyag ku to mgo kinagian to sikan no maroot no otow no si Nabal. Unawa sikandin to ngaran din no ogpasabut no ‘angol’ su angol-angol ka tibon mgo hinimuan din. Tongod kanak no suguanon nu, waro a makakita to mgo otow no inpa-aap nu, Anggam. 26 No kuntoon nakaponod ka Magboboot koikow, Anggam, to pogpalangosa woy to pogsuli pinabadyo to boad nu, woy to maugot ian, unawa to manokal ka Magboboot woy songo manokal ka, ogkounawa ki Nabal porom ka mgo usig nu woy ka tibo no nigbabantaan to maroot koikow no igbudyag ku. 27 Tinawaa nu kun soini no igbogoy no pig-aap to soini no suguanon nu, woy igbogoy nu porom to mgo otow no nigduma koikow. 28 Ogpo-iguon nu porom ka sao to suguanon nu, su ogpamaugadyon ian to Magboboot ka pogkahari to mgo tipouri to igbudyag ku, hoo su nig-atu ka to mgo usig to Magboboot. Waro porom sao no ogkakitaan duon koikow tagood to manokal ka pad. 29 Agad duon niggapon koikow odyow to poghimatoy koikow porom, ogkabagkos to Magboboot ka goinawa to soini no igbudyag ku to bagkos to Magboboot to mgo manokal. Di ka mgo ukul to usig nu atag, idogpak to Magboboot unawa to batu no ogligkat to pintik. 30 Ko ogkatood on to Magboboot ka tibon mgo marodyow no inpangulibot din koikow no igbudyag ku, woy ko ogkohimu ka rin no igbudyag to tibon Israil, 31 kono ka ogsondit no duon pigdaraat nu no langosa pinabadyo to pogsuli nu to otow no nig-atu koikow. Woy ko oglopow ka allow no ogpa-aapan ka to Magboboot to kadoogan, ogdoromdomon nu porom ka soini no suguanon nu.”
32 Nignangon si David ki Abigail to “Ogsadyoon ku ka Magboboot no Igbudyag to Israil no nigpa-aap koikow kai’t kanak kuntoon no allow. 33 Ogkaboligan ka porom tongod to marodyow no pogdoromdom nu no naponoran a nu to pogdaraat to langosa kuntoon, pinabadyo to pog-abin to katondanan to Magboboot to pogsuli to karootan. 34 Hoo su unawa to manokal ian ka Magboboot no Igbudyag to Israil no nakaponod kanak to pogpasakit koikow, ko waro ka nigmagaan to pogtomu kanak, waro porom sagboka no lukos ni Nabal no ogkagaat no manokal ko ogsilo ka allow asoom.” 35 No pigtinawo ni David ligkat ki Abigail ka pig-aap din no igbogoy, woy nignangon si David to “Uli kad on to maawang no goinawa. Nakarinog a to mgo kinagian nu, woy oghimuon ku ka pigbudyu nu.”
36 To pog-uli ni Abigail ki Nabal, duon si Nabal to baoy no nigpakoon to mgo otow rin to pogkoonan no unawa to hari. Narago-dago sikandin woy nalasing lagboy. No waro ingkagi ni Abigail kandin taman to pogkapawo. 37 To masoom, na-alipapasan on si Nabal, woy pignangonan sikandin to soini tibo to asawa rin, woy niggoram sikandin to sakit to pupusungan no nigkoog sikandin unawa to batu. 38 Mgo sampuu no allow takas to sikan, piglogparan si Nabal to Magboboot woy namatoy sikandin.
39 To pogkarinog ni David no namatoy si Nabal, nigkagi sikandin to “Ogkasadyo porom ka Magboboot, su nalitosan a rin atu ki Nabal su maroot ka pogsamili ni Nabal kanak. Pigponod a no suguanon to Magboboot to poghimu to maroot, woy nalogparan si Nabal tongod to hinimuan din.” No nigpa-aap si David to kinagian ki Abigail no nigpamudyu kandin to pog-asawa kandin. 40 Nighondio ka mgo suguanon ni David ki Abigail duon to Karmil, woy nignangon sikandan to “Inpa-aap koy ni David odyow to pogpurut koikow no og-asawoon din.” 41 Nig-unduk si Abigail taman to tano woy nignangon sikandin to “Suguanon a nu, no ogpa-agad-agad a to pogga-at koikow woy to pogluu to paa to mgo suguanon to igbudyag ku.” 42 Nig-agpas nig-untud si Abigail to asnu, woy duma to lalima no mgo suguanon din no boi, nigludyud sikandin to mgo suguanon ni David woy pig-asawa ni David si Abigail. 43 Taan no pig-asawa ni David si Ahinoam no matig Yisriil, woy nigduruwoy sikandin ki Abigail. 44 Di inbogoy ni Saul ka anak din no si Mikal no asawa ni David porom duon ki Paltiil no anak ni Lais no matig Gallim odyow no og-asawoon din.