26
Inhutuk Ingkannugun ni David ka Ukul ni Saul
1 Nighondio ka mgo matig Sip ki Saul duon to Gibaa no nignangon to “Nighoos si David duon to bubungan to Hakila no nigtangko to Yisimun.” 2 No nighondio si Saul to Han-hanawan to Sip, duma to tatou no libu no pig-aam no mgo otow to Israil, odyow to pogpamangho ki David. 3 Nigpaligad to maukilom si Saul duon to daan to bubungan to Hakila no nigtangko to Yisimun. Di nigpalinggaat si David duon to han-hanawan. To pogkakita rin no nigsundul si Saul kandin dio, 4 nigpa-aap sikandin to mgo otow to pogsobsob woy natagaan din on no si Saul naan ian ka nigdatong. 5 No nighipanow si David pohondio to pig-ugpaan ni Saul. Nakakita sikandin ko hondoi nighibat si Saul woy si Abnir no anak ni Nir no igbudyag to mgo sundau. Duon si Saul nighibat taliwaro to mgo sundau no niglingut kandin.
6 Nig-inso si David ki Ahimilik no kapunganan ni Hit woy ki Abisai no suod ni Yoab no anak ni Siruiaato “Hontow ka ogduma kanak to pogtupang duon to ugpaan ni Saul?” Nigtabak si Abisai to “Koddi. Ogduma a.” 7 No nighondio si David woy si Abisai to maukilom duon to pig-ugpaan to mgo sundau, woy duon si Saul nighirogo taliwaro to pig-ugpaan no duon ka kommag din no inpos-ok to tano to longod to uu rin. Duon nighibat si Abnir woy ka mgo sundau no niglingut kandin. 8 Nignangon si Abisai ki David to “Kuntoon, inbogoy to Magboboot ka usig nu duon to boad nu. Ogpilakon ku sikandin to kasagboka ro no oglagbas ka kommag ku dio to tano. Kono a ogpilak to kararuwa.” 9 Di nigtabak si David ki Abisai to “Doka’g himatadyi sikandin! Kono ogkaawo ka sao to otow no og-amonu to hari no pig-aam to Magboboot. 10 Unawa to manokal ka Magboboot, ka Magboboot do ian ka oghimatoy kandin. Naugpa ogkamatoy ro sikandin, woy ko ogmangadyow sikandin no ogkamatoy sikandin duon to pog-atu. 11 Di ogkaponoran a porom to Magboboot to pogmonu to otow no pig-aam to Magboboot. No, puruta nu ka kommag din woy ka sooranan to woig din no duon to marani to uu rin, woy oghondio kid.” 12 No sikan ian nigpurut si David to kommag woy to sooranan to woig no marani to uu ni Saul woy nighipanow sikandan. Waro nakakita kandan woy waro mataga on si Saul no nighondio si David su nohidhirogo sikandan su inpalinoknok sikandan to Magboboot woy waro sikandan nighimata.
13 Nighondio si David to limang to aug, woy nighasindog sikandin to ampow to bubungan no madmariu kandan. Mau-ag ian ka naka-oat kandan. 14 Nig-umow si David duon to mgo sundau woy duon ki Abnir no anak ni Nir to “Kono ka buwa ogtabak kanak, Abnir?” Nigtabak si Abnir to “Hontow ka no og-umow ka duon to hari?”
15 Nigkagi si David to “Kono ka buwa no inila no bagani to Israil? Manio naan no waro nu bantadyi ka igbudyag nu no hari? Duon nighondutun to poghimatoy porom to igbudyag nu no hari. 16 Kono’n marodyow ka pighimu nu. Unawa to manokal ka Magboboot, litos porom no ogkamatoy ka duma to tibon mgo otow nu, su waro now bantadyi ka igbudyag now no pig-aam to Magboboot. Pitowa now. Hondoi’d on ka kommag woy ka sooranan to woig no duon to longod to uu to hari?”
17 Noko-ila si Saul to lagong ni David woy nignangon sikandin to “Koikow buwa ka nig-umow, David no anak ku?” Nigtabak si David to “Kanak ian, igbudyag ku no hari.” 18 Nigparagas si David to “Manio to piggapon to igbudyag ku ka suguanon din? Nokoy ka pighimu ku? Nokoy ka sao ku no nakita nu kanak? 19 No kuntoon ogpamminog porom ka igbudyag ku no hari to mgo kinagian to soini no suguanon din. Ko ka Magboboot ian ka nigbaghot koikow to pog-atu kanak, ogtinawoon din porom ka igpanubad ku. Di ko mgo otow ro ian ka nigbaghot koikow, ogkatungadyawan porom sikandan to tangkaan to Magboboot. Pigdogil a ran to intugun to Magboboot kanak no baad to tano din woy inat nignangon sikandan to ‘Hondio ka woy ga-at ka to loin no tinuuhan.’ 20 Kono nu porom ogpaugutan no ogkamatoy a to mariu to pig-ugpaan to Magboboot. Manio to niglibuwas ka hari to Israil odyow to pogpamangho to sagboka ro no kutu, unawa to nigpanitingon sikandin to pugu dio to mgo bubungan?”
21 No nigkagi si Saul to “Nakasao a. Uli kad, David no anak ku. Tongod su ingkannugun nu ka ukul ku kuntoon, kono a oghutuk to pog-ol-oog to pogpasakit koikow. No-unawa a to na-angol woy dakol ka sao ku.”
22 Nigtabak si David to “Soini ka kommag to hari. Pa-aap ka to sagboka no baubato nu odyow to pog-angoy soini. 23 Ogdassagan to Magboboot ka kara otow tongod su matuwarong woy ogkasaligan sikandin. Inbogoy ka to Magboboot kai to boad ku kuntoon no allow, di kono ogkohimu no ogmonuon ku ka otow no pig-aam to Magboboot. 24 Unawa to ingkannugun ku ka ukul nu kuntoon, igkannugun porom to Magboboot ka ukul ku, woy ogkapangabangan a rin ligkat to tibon mgo koirapan.”
25 No nigkagi si Saul ki David to “Ogkaboligan ka porom David no anak ku; ogpakahimu ka to mgo dagdakol no hinimuan, woy ogpakaroog ka ian.” No nighipanow on si David, woy nig-uli on si Saul.