27
Nigpa-aput si David duon to mgo Filistihanon
1 Di nigdoromdom si David to “Duon allow no oglopow no ogkohimatadyan a pinabadyo ki Saul. Madmarodyow nasi ko ogpanlaguy a duon to tano to mgo Filistihanon. Ko dio a, ogkapoa-an on si Saul to pogpamangho kanak kai to Israil, woy ogpakasabuk a to boad din.” 2 No nighipanow si David duma to hon-om no gatus no mgo otow no duma rin, woy nighondio sikandin ki Akis no anak ni Maok no hari to Gat. 3 Nig-ugpo si David woy ka mgo otow rin duon to Gat duma ki Akis. Nigduma ka mgo lunggunan to kara otow ni David, woy songo nigduma ka mgo asawa ni David no si Ahinoam no matig Yisriil woy si Abigail no matig Karmil no bau ni Nabal. 4 To pogkarinog ni Saul no nakapanlaguy si David pohondio to Gat, waro sikandin nigparagas to pogpamangho kandin.
5 No nigkagi si David ki Akis to “Ko narago ka to pogpitow nu kanak, ogpaugutan a nu porom to pog-ugpo to sagboka no lunsud to awadyan. Manio naan no ogkabogatan ka pinabadyo to pog-ugpo to suguanon nu to lunsud to hari duma koikow?” 6 No to sikan no allow inbogoy ni Akis ki David ka lunsud to Siklag, woy nigpalinggaat sikan no natagtuun to mgo hari to Juda ligkat to sikan no allow. 7 Nig-ugpo si David to tano to mgo Filistihanon to songo tuid woy hop-at no buwan.
8 No nighipanow si David woy ka mgo otow rin to pogpang-agow duon to mgo kapunganan ni Gisur, ni Giris woy ni Amalik. Ligkat to dongan pad, naka-ugpo soini no mgo otow to tano pohondio to Sur woy to Ehiptu. 9 Ko oglusud si David to songo ugpaan, waro ogsamoon din no otow no manokal, agad ko lukos woy ko boi, di pigpang-agow rin ka mgo karniru, mgo baka, mgo asnu, mgo kamil woy mgo manggad. Woy niglibong sikandin dio ki Akis.
10 To pog-inso ni Akis ki David to “Hondoi ka nigpang-agow kuntoon?” ogtabak si David to “Duon to tano to Juda” woy “Duon to tano to mgo kapunganan ni Yiramiil” woy ko “Duon to tano to mgo kapunganan ni Kin.” 11 Waro pigsamo ni David no manokal no lukos woy ko boi no ogka-aap duon to Gat su nigdoromdom sikandin to “Naugpa ognangon sikandan to maugot no nohimu ku.” No sikan ian ka hinimuan ni David tagood to nig-ugpo sikandin to tano to mgo Filistihanon. 12 Nigtuu si Akis ki David, woy nigdoromdom sikandin to “Ogkadomotan on si David to koot-otawan din no Israil tongod to mgo hinimuan din. Ogkohimu sikandin no suguanon ku taman to katamanan.”