28
Si Saul woy ka Boi no Duon Bantoy
1 To sikan no mgo allow, piglimud to mgo Filistihanon ka mgo otow ran odyow to pogmangadyow duon to Israil. Nignangon si Akis duon ki David to “Ogpakasabut ka porom no ogduma ka woy ka mgo otow nu to mgo sundau ku.” 2 Nigtabak si David to “Ogpakakita kad naan to ogkohimu to soini no suguanon nu.” Nigtabak si Akis to “No, ogkohimu ka no taagbantoy ku, taman to katamanan.”
3 No kuntoon, namatoy on si Samuel, woy nigpandaawit ka tibon Israil tongod kandin, woy inlobong on sikandin to lunsud din duon to Rama. Pigdogil on ni Saul ka mgo bailan woy ka mgo duon bantoy ligkat to tano din.
4 Niglimud-limud ka mgo Filistihanon woy namos-ok sikandan to mgo tukbung dan to Sunim, woy songo piglimud ni Saul ka tibon mgo otow to Israil no namos-ok sikandan to mgo tukbung dan to Gilboa. 5 To pogkakita ni Saul to mgo sundau to mgo Filistihanon, nahallok sikandin; nahinaatan lagboy ian sikandin. 6 Nig-inso sikandin duon to Magboboot di waro mogtabak ka Magboboot agad ko pinabadyo to mgo tagoinop, to urimawoy to mgo taagtagna. 7 No nignangon si Saul duon to mgo hibatoon din to “Pamanghoi a now to boi no duon bantoy odyow no ogpaka-inso a kandin.” Nigtabak sikandan to “Duon sagboka dio to Indor.” 8 No nigsau-ub si Saul to loin no kinabo odyow no kono ogko-ilaan sikandin, woy to maukilom nighipanow sikandin duma to daruwa no otow odyow to poghondio to boi. Nignangon si Saul duon to boi to “Inso ka to sagboka no gimukud to namatoy tongod kanak. Ipakita nu kanak ka oghingaranan ku koikow.” 9 Di nigtabak ka boi to “Waro ka buwa mataga to pighimu ni Saul. Pigdogil din ka tibon mgo bailan woy mgo duon bantoy ligkat to tano din. Manio to oglit-agan a nu odyow no ogkohimatadyan a?” 10 Nigpangulibot si Saul kandin pinabadyo to Magboboot no kagi rin to “Unawa to manokal ka Magboboot, kono ka ogkalogparan tongod soini.” 11 No nig-inso ka boi to “Hontow’n gimukud ka ogpo-onawon ku kai to koikow?” Nigtabak si Saul to “Po-onowa nu si Samuel.” 12 To pogkakita to boi ki Samuel, nigngangang sikandin to maagbot woy nignangon sikandin ki Saul to “Manio to piggawadyan a nu? Sikoikow si Saul!”
13 Nigkagi ka hari kandin to “Doka’g kahallok. Nokoy ka nakita nu?” Nigtabak ka boi to “Ogpakakita a to mgo diwata no ogpuun to tano.”
14 Nig-inso si Saul to “Moomonu sikandin pitawon?” Woy nigtabak ka boi to “Sagboka no budyag no nigsau-ub to kinabo to datu ian ka nig-onow.” No nataga si Saul no si Samuel naan sikan, woy nig-unduk sikandin no niglangkob duon to tano.
15 Nignangon si Samuel ki Saul to “Manio to inpapukow a nu pinabadyo to pog-umow nu kanak kai to ampow?” Nigtabak si Saul to “Nasasow a lagboy. Nigmangadyow kanak ka mgo Filistihanon, woy pig-iniugan ad on to Magboboot. Konad ogtabak sikandin kanak agad ko pinabadyo to mgo taagtagna woy ko pinabadyo to mgo tagoinop. No sikan ian no pig-umow ku sikoikow odyow no ogkanangonan a nu to oghimuon ku.” 16 Nigkagi si Samuel to “Manio to og-insoon a nu kuntoon no pig-iniugan kad on to Magboboot woy nohimu ka no usig din? 17 Natood on to Magboboot ka intagna din pinabadyo kanak. Pighawi to Magboboot ka pandatuan puun to boad nu woy inbogoy rin on to sagboka no songobaoy nu, ian dio ki David. 18 Tongod su waro ka nigpannalinga to Magboboot woy waro nu toora ka moinit no kabou din duon to mgo kapunganan ni Amalik, soini ian ka pighimu to Magboboot koikow kuntoon no allow. 19 Woy nokoy pad, igbogoy to Magboboot sikoikow woy ka Israil duon to mgo Filistihanon, woy asoom no allow ogduma ka woy ka mgo anak nu no lukos kai to kanak. Igbogoy to Magboboot ka mgo sundau to Israil duon to mgo Filistihanon.”
20 To sikan, napood si Saul no niglangkob duon to tano, nanahallok lagboy sikandin tongod to mgo kinagian ni Samuel. Na-awaan sikandin to dadyagang, su waro sikandin nigkoon to tibon allow woy to tibon maukilom. 21 To pogdani to boi ki Saul, nakita rin no nasasow lagboy sikandin. Nigkagi ka boi to “Pitow ka, nigpannalinga a koikow su uripon a nu. Inbaagad ku ko ogkamatoy a to poghimu ku to innangon nu. 22 No kuntoon, pamminog ka to suguanon nu, woy pauguti a nu to pogbogoy koikow to koonon odyow no ogpakakoon ka woy duon dadyagang nu to poghipanow.”
23 Nigligal si Saul no kagi to “Kono a ogkoon.” Di pigbuligan to mgo otow ni Saul ka boi to pogbaghot kandin, woy nigpamminog si Saul kandan. Nig-onow sikandin puun to tano, woy nigpinnuu sikandin to hibatanan. 24 Duon pinaambog no nati no baka to boi duon to baoy, woy pig-iow rin agpasa. Nigpurut sikandin to harina woy pigkomot din woy nighimu sikandin to pan no waro igpatulin. 25 Insabuk din to tangkaan ni Saul woy to mgo otow rin, woy nigkoon sikandan. To sikan dod no maukilom nighasindog sikandan woy pig-ongkoran dan ka boi.