29
Nig-ongkod si David to mgo Filistihanon
1 Niglimud-limud ka mgo sundau to mgo Filistihanon duon to Apik, woy inpamos-ok to mgo sundau to Israil ka mgo tukbung dan duon to marani to sobsob to Yisriil. 2 To poghipanow to mgo igbudyag to mgo Filistihanon duma to mgo puntuk dan no tag songo gatus woy tag songo libu, songo nighipanow si David duma to mgo otow rin duon to koiniugan duma ki Akis. 3 Nig-inso ka mgo igbudyag to mgo Filistihanon to “Manio to kai soini no mgo Hibriu?” Nigtabak si Akis to “Soini si David no sagboka no duon katondanan nokani ki Saul no hari to Israil. Nakaduma-ruma sikandin kanak to songo tuid woy pila no buwan on, woy ligkat to allow to pog-ongkod din ki Saul taman kuntoon no allow waro nakita ku no sao din.”
4 Di nabou ka mgo igbudyag to mgo Filistihanon ki Akis woy pignangonan dan sikandin to “Po-ulia nu sikandin to ugpaan no inbogoy nu kandin. Kono ogpakaduma sikandin kanta to pogmangadyow, su naugpa og-atu sikandin kanta tagood to pogmangadyow ta. Sikan ka dorodyawi no daan din odyow no ogkarago ka igbudyag din kandin, ko duon ogka-aap din no mgo uu to otow ta. 5 Soini ian si David no pighingaranan to mgo uaging dan tagood to pogsadyow ran no kagi ran to ‘Nakahimatoy si Saul to mgo tag songo libu, woy si David to tag sampuu no libu.’”
6 No pig-umow ni Akis si David, woy pignangonan din sikandin to “Unawa to manokal ka Magboboot, ogkasaligan ka, woy ogkarago a porom ko ogpakaduma ka kanak to pogmangadyow. Ligkat to allow to poglopow nu kanak, taman kuntoon, waro nakitaan ku no sao koikow, di kono ogkoiniat ka duma no mgo igbudyag koikow. 7 Libong ka no og-uli ka to maawang no goinawa odyow waro ogkohimu nu no igkarooti to mgo igbudyag to mgo Filistihanon.”
8 Nig-inso si David to “Nokoy ka nohimu ku? Nokoy ka nakita nu no maroot duon to soini no suguanon nu puun to allow to poglopow ku taman kuntoon? Manio to kono a ogpakaduma to pogmangadyow duon to mgo usig to igbudyag ku no hari?”
9 Nigtabak si Akis to “Nataga a no unawa ka karodyawi nu to diwata to Magboboot to pogpitow ku; di nignangon ka mgo igbudyag to mgo Filistihanon to ‘Kono ogpakaduma sikandin kanta to pogmangadyow.’ 10 No kuntoon, onow ka to masoom pad, duma to mgo suguanon to igbudyag nu no nakaduma koikow, woy hipanow kow to masoom to pogsilo ka allow.”
11 No sikan ian no nigman-onow si David woy ka mgo duma rin to masoom pad woy nighipanow sikandan no nig-uli to tano to mgo Filistihanon, tagood to nighondio ka mgo Filistihanon duon to Yisriil.