30
Pigpanghimatadyan ni David ka mgo Kapunganan ni Amalik
1 Niglopow si David woy ka mgo duma rin duon to Siklag to igkatou no allow. Tagood no waro sikandan, nakalusud ka mgo kapunganan ni Amalik duon to Nigib woy to Siklag. Piglusuran dan ian ka Siklag woy pigsilaban dan. 2 Pigpandakop dan ka mgo boi woy ka tibon mgo otow no nagaat duon, mgo budyag woy mgo bato pad. Waro pighimatadyan dan, di pig-uripon dan ka tibo woy nighipanow sikandan. 3 To poglopow ni David woy ka mgo otow rin duon to Siklag, nakita ran no nasilaban on ka lunsud woy narakop on ka mgo asawa ran, mgo anak dan no lukos woy boi. 4 No nigmaagbot to pogsinogow si David woy ka tibon mgo duma rin taman to warad on dadyagang dan to pogsinogow. 5 Nokoglagkos narakop ka daruwa no asawa ni David no ian si Ahinoam no matig Yisriil, woy si Abigail no bau ni Nabal no matig Karmil. 6 Nigmasakit ka goinawa ni David, su nigmanangnangonoy ka mgo otow rin no ogbatuon dan sikandin; hoo su nigmamasakit lagboy ka goinawa to kara otow tongod to mgo asawa woy anak dan no narakop. Di, nignokal-nokal si David to pogdoromdom din to Magboboot.
7 No pignangonan ni David si Abiatar no taagpanubad no anak ni Ahimilik to “Aapa nu ka ipod kai,” woy pig-aapan sikandin ni Abiatar. 8 No nig-inso si David duon to Magboboot to “Oggaponon ku buwa ka mgo otow no nigluusud? Ogkasaponan ku buwa sikandan?” Nigtabak ka Magboboot to “Gapona nu. Ogkasaponan nu woy ogkapangabangan nu ian ka mgo otow no narakop.” 9 No nighipanow si David duma to hon-om no gatus no otow rin taman to tingkob to Bisor. Pig-ongkoran dan ka duma no mgo otow dio 10 su nabooy on lagboy ka daruwa no gatus no otow no konad ogpakagoon to pogtalipag to tingkob. Nigparagas si David duma to hop-at no gatus no mgo otow. 11 Nakakita ka mgo otow to sagboka no otow no matig Ehiptu duon to kamot, woy pig-aap dan sikandin ki David. Pigbogadyan dan ka otow to woig no ogko-inom din woy to koonon no ogkakoon din. 12 Nigbogoy sikandan to songo pinutu no pig-amut to bogas to igira woy daruwa no komu to pigdampil no ubas. Nigkoon ka otow woy niglibong ka dadyagang din, su waro sikandin nakakoon woy waro sikandin naka-inom sood to tatou no allow woy tatou no kausiloman. 13 Nig-inso si David kandin to “Hontow ka igbudyag nu, woy matig hondoi ka?” Nigtabak ka otow to “Matig Ehiptu a, woy uripon a to sagboka no kapunganan ni Amalik. Pig-ongkoran a to igbudyag ku to tatou no allow no nigligad su nigdarau a. 14 Piglusuran noy ka Nigib to mgo matig Kirit, woy ka tano no natagtuun ni Juda, woy ka Nigib ni Kalib. Songo pigsilaban noy ka Siklag.”
15 Nig-inso si David kandin to “Ogpakatuon ka kanak to ugpaan to sikan no mgo otow no niglusud?” Nigtabak ka otow to “Pangulibot ka’t kanak no kono a nu oghimatadyan woy kono a nu ilibong to igbudyag ku, woy og-aapon ku sikaniu to kandan.”
16 Pigtuon to otow si David no nigtupang, woy duon ian ka mgo kapunganan ni Amalik no nakatangkap to tano no nigkokoon woy nig-iinom woy nigkukuus tongod to dakol no pig-agow ran to tano to mgo Filistihanon woy to tano to Juda. 17 Pigmangadyow sikandan ni David ligkat to sikan no katangkob taman to maapun to pogkapawo. Waro nakapanlaguy ko kono’n hop-at no gatus do to mgo baubato no naka-untud to mgo kamil to pogpanlaguy. 18 Pighawi ni David ka tibo no na-agow to mgo kapunganan ni Amalik iglagkos pad ka kandin no daruwa no asawa. 19 Waro naagak; agad bato pad woy ko budyag on, lukos woy boi, mgo in-agow, woy ko agad nokoy pad no napurut dan. Pighawi ni David soini tibo. 20 Napurut din ka tibon mgo karniru woy baka, woy inpohipanow sikandan to mgo otow ni David hun-a to duma no mgo hinawi. Nignangon ka mgo otow to “Soini tibo ka hinawi ni David.”
21 No niglopow si David duon to daruwa no gatus no mgo otow no nabooy lagboy woy no noongkoran duon to tingkob to Bisor. Niglibuwas sikandan odyow to pogtomu ki David woy to mgo duma rin. To pogdani ni David woy to mgo otow rin, nigmaan-maan si David kandan. 22 Di ka mgo maroot woy mgo sabandal no mgo otow no mgo sakup ni David nignangon to “Kono noy iglagkos sikandan to pogpambogoy to mgo hinawi noy, su waro sikandan nigduma kanta to poghipanow. Ogpakatinawo do sikandan to kandan do no mgo asawa woy mgo anak.”
23 Di nigtabak si David to “Dokow mgo suod ku, kono kow oghimu to sikan duon to mgo kaaglagan no inbogoy to Magboboot kanta. Pigpangabangan ki to Magboboot, woy inbogoy rin kanta ka tibo no nig-atu kanta. 24 Waro ogpamminog to innangon now. Og-unawa ka taad to otow no nigpalinggaat to pogbantoy to mgo kaaglagan woy ka taad to otow no nighondio to pogmangadyow. Ogko-unawa ka dassag to tibo.” 25 Pighimu sikan ni David no udlin woy balaod to tibon Israil ligkat to sikan no allow taman kuntoon.
26 To poglopow ni David duon to Siklag, nigpa-aap sikandin to baad to in-agow duon to mgo igbudyag to Juda no mgo aukoy rin no kagi “Igbogoy ku ro soini ligkat to in-agow ku ligkat to mgo usig to Magboboot.” 27 Inpa-aap din soini dio to mgo otow to Bit-il, to Ramot-Nigib woy to Yattir. 28 Dio pad to mgo otow to Aroir, to Sipmot, to Istimoa 29 woy to Rakal. Songo pigpa-aapan din ka mgo otow to mgo lunsud to mgo kapunganan ni Yiramiil woy ni Kin; 30 dio pad to mgo otow to Horma, to Bor-Asan, to Atak 31 woy to Hibron. Songo pigpa-aapan pad ni David ka mgo otow to tibon duma no mgo ugpaan no nabadyaan din woy to mgo otow rin to poghip-hipanow ran.