31
Niglugo si Saul
1 No kuntoon, nigmangadyow ka mgo Filistihanon duon to Israil. Namanlaguy ka mgo otow to Israil to tangkaan dan, woy moon-ing kandan ka nammatoy duon to bubungan to Gilboa. 2 Piggapon to mgo Filistihanon si Saul woy ka mgo anak din no lukos, woy pighimatadyan dan ka mgo anak ni Saul no si Yunatan, si Abinadab woy si Malki-sua. 3 Nigmabuut ka pogpaat-atuoy marani ki Saul, woy to pogmarani to mgo taagpamano ki Saul, nasugat dan si Saul to ogpakamatoy no pali. 4 Nignangon si Saul duon to taag-aap to panganiban din to “Huabuta nu ka moirob nu woy dugsui a nu. Hoo, su ko kono ka, soini no mgo otow no waro matuli ian ka oghimatoy koddi, woy ogliagan dan ka lawa ku.” Di nahallok lagboy ka taag-aap to panganiban woy nigligal sikandin to poghimatoy ki Saul. No sikan ian no niglugo si Saul pinabadyo to pog-ugmu to kampilan din. 5 To pogkakita to taag-aap to panganiban no namatoy si Saul, songo niglugo sikandin pinabadyo to pog-ugmu to kampilan din woy namatoy sikandin duma ki Saul. 6 No sikan ian no nokogdongan namatoy si Saul woy ka tatou no anak din no lukos woy ka taag-aap to panganiban din woy ka tibon mgo otow rin to sikan do no allow. 7 To pogkarinog to mgo otow to Israil no nig-ugpo to aug, woy ka nig-ugpo to talipag to Jordan no nigpanlaguy on ka mgo sundau to Israil woy no namatoy on si Saul duma to mgo anak din no lukos, pig-ongkoran dan ka mgo lunsud dan woy nigpanlaguy sikandan. Woy nigsoip to pog-ugpo ka mgo Filistihanon dio.
8 To pogkapawo, to poglibong to mgo Filistihanon odyow to pogpanluung to mgo kinabo to mgo nammatoy, nakita ran si Saul woy ka tatou rin no anak no namatoy duon to bubungan to Gilboa. 9 Pigtampod dan ka liog ni Saul, woy pigluung dan ka mgo panganiban din. Nigpa-aap sikandan to mgo taagnangon duon to tibon tano to mgo Filistihanon odyow to pognangon to sikan duon to baoy no panubaranan to mgo inotowotow ran, woy dio to tibon mgo otow ran. 10 Pig-aap dan ka mgo panganiban ni Saul duon to baoy no panubaranan to mgo Astarot, woy inbanggut dan ka lawa ni Saul duon to aad to lunsud to Bit-San. 11 To pogkarinog to mgo otow to Yabis-Gilaad to pighimu to mgo Filistihanon duon ki Saul, 12 nighipanow ka tibon mgo mabuut no mgo otow ran to tibon maukilom pohondio to Bit San. Piglokat dan ka mgo lawa ni Saul woy to mgo anak din puun to aad to Bit-San, woy pig-aap dan uli to Yabis. To dio sikandan, pigsilaban dan ka mgo lawa. 13 Pigpurut dan ka mgo bokog, woy inlobong dan diraom to sagboka no kadyu no tamarisku dio to Yabis, woy waro sikandan nigkoon sood to papitu no allow.