2 Samuel 12

Pigsaparan ni Natan si David

¹ Inpa-aap to Magboboot si Natan ki David. To poglopow rin, nigkagi si Natan to “Duon daruwa no otow to sagboka no lunsud. Datu ka sagboka, di nawaraan ka dangob. ² Moon-ing lagboy ka mgo karniru woy baka to datu, ³ di duon to dangob no otow atag, waro kandin ko kono'n sagboka ro no boian no nati to karniru no naboli rin. Pigtamongan din ka karniru, woy nigdakol sikan duma kandin woy to mgo anak din. Nigkoon sikan to mgo koonon din, woy nig-inom puun to boung din, woy nokoy pad songo nighirogo ka karniru duon to pogkop-kop to otow. Unawa to anak din no boi ka karniru.

⁴ No kuntoon, duon magaliug no niglopow duon to baoy to datu, di waro mog-iow ka datu to sagboka to kandin no mgo karniru woy ko baka odyow no igbana duon to magaliug din, ko konon ka boian no karniru to otow no nawaraan ka pigpurut din atag. Woy sikan ka pigtua rin no inpakoon to magaliug din.” ⁵ Nabou lagboy si David duon to datu woy nignangon sikandin ki Natan to “Unawa to manokal ka Magboboot, litos no oghimatadyan ka sikan no otow! ⁶ Ogbadyad sikandin to hop-at no akob to sikan no nati no karniru. Hoo su sikan ka pighimu rin no waro koid-u rin.” ⁷ No nignangon si Natan ki David to “Sikoikow ka sikan no otow! Soini ka kinagian to Magboboot no Tinuuhan to Israil, kagi ‘Pig-indanan ku sikoikow no hari to Israil. Pigpangabangan ku sikoikow puun to boad ni Saul. ⁸ Inbogoy ku koikow ka baoy to igbudyag nu, woy inbogoy ku ka mgo asawa to igbudyag nu odyow no ogkop-kopan nu. Inbogoy ku koikow ka pogkahari to Israil woy to Juda. Woy ko kono pad no litos sikan, ogtimuan ku pad porom. ⁹ Manio to pigsamilian nu ka kinagian to Magboboot pinabadyo to poghimu to maroot to pogpitow rin? Pighimatadyan nu si Uria no kapunganan ni Hit pinabadyo to kampilan, woy pig-agow nu ka asawa rin odyow no og-asawoon nu. Pighimatadyan nu sikandin pinabadyo to mgo moirob to mgo kapunganan ni Bin Ammi. ¹⁰ No kuntoon tongod to sikan, ogpalinggaat ka pogmangadyow duon to lunggunan nu taman to katamanan, hoo su pigsamilian a nu woy pig-agow nu ka asawa ni Uria no kapunganan ni Hit.’ ¹¹ Soini ka kinagian to Magboboot kagi ‘Ogpa-aap a to igkobaybadyari nu puun to koikow ro no lunggunan. To tangkaan to pogpitow nu, ogpuruton ku ka mgo asawa nu woy igbogoy ku to sagboka no otow no marani koikow. Woy oghuliron din ka mgo asawa nu to ma-allow pad. ¹² Pighimu nu sikan to hoos, di oghimuon ku soini to matikang ka allow to tangkaan to tibon Israil.’” ¹³ No nigkagi si David ki Natan to “Nakasao a duon to Magboboot.” Nigtabak si Natan to “Pig-awo to Magboboot ka sao nu. Kono ka ogkamatoy. ¹⁴ Di tongod su pighimu nu soini, konad og-ila koikow ka mgo usig to Magboboot, woy ogkamatoy ka anak no lukos no no-otow koikow.”

¹⁵ Takas to nig-uli on si Natan, pigsabukan to Magboboot to sakit ka bato no in-anak to asawa ni Uria ki David, woy nigdarau ka bato. ¹⁶ Nigpakoid-u si David duon to Magboboot tongod to bato. Nighagtong sikandin ogkoon, woy nigsood do sikandin to baoy rin, woy dio to tano do sikandin nighibat to mgo maukilom. ¹⁷ Nighondio ka mgo budyag to lunggunan din duon kandin odyow to pogpo-onow kandin puun to tano, di nigligal sikandin, woy waro mogkoon sikandin to koonon duma kandan. ¹⁸ To igkapitu no allow, namatoy ka bato. Nahallok ka mgo suguanon ni David to pognangon kandin no namatoy ka bato, su nigdoromdom sikandan to “Tagood to manokal pad ka bato, pigkagian ta si David, di waro sikandin mogpannalinga. Ogmonuon ta to pognangon kandin no namatoy ka bato? Naugpa duon maroot no oghimuon din.” ¹⁹ Nigkita si David to mgo suguanon din no nigmana-naasoy, woy nataga sikandin no namatoy on ka bato. Nig-inso sikandin to “Namatoy on ka bato?” woy nigtabak sikandan to “Hoo, namatoy sikandin.” ²⁰ No nig-onow si David puun to tano. Nigparigus sikandin, nigpo-poomut woy nig-ilis sikandin, woy nigsood sikandin to tukbung to Magboboot woy pigsadyo din ka Magboboot. No nig-uli sikandin to baoy rin, woy nigpamudyu sikandin kandan to koonon, woy nigkoon sikandin. ²¹ Nig-inso ka mgo suguanon din to “Manio to soini ka pighimu nu? To manokal pad ka bato, nighagtong ka to pogkoon, woy nigsinogow ka, di kuntoon no namatoy ka bato, nig-onow ka woy nigkoon ka!” ²² Nigtabak si David to “Tagood to manokal ka bato, nighagtong a to pogkoon, woy nigsinogow a su naan ku ‘Naugpa ogkoid-uan a pad to Magboboot, woy og-ulian din pad ka bato.’ ²³ Di kuntoon no namatoy on sikandin, manio to kono a ogkoon? Ogpaka-udyag a pad buwa kandin? Duon allow no oghondio a to pighondiaan din, di konad ogpakalibong sikandin kai’t kanak.” ²⁴ No pigim-imuan ni David ka asawa rin no si Batsiba, woy pigdanian din sikandin woy pighuliran din. Nig-anak si Batsiba to lukos, woy pighingaranan dan sikandin ki Solomon. Dakol ka goinawa to Magboboot duon to bato. ²⁵ Tongod to dakol no goinawa to Magboboot kandin, nigpa-aap ka Magboboot to kinagian ki Natan no odyow no songo ogkohingaranan ka bato ki Yididia.