11
Si David woy si Batsiba
1 Songo tuid to sikan, takas to tingkahagsil, to buwan to poghipanow to mgo hari to pogmangadyow, inpohipanow ni David si Yoab duma to mgo otow to hari woy to tibon mgo sundau to Israil. Pigpanghimatadyan dan ka mgo kapunganan ni Bin Ammi, woy piglingutan dan ka lunsud to Rabba. Di si David atag, nigpalinggaat sikandin to Yirusalim. 2 Songo allow to pogkatangkob, nig-onow si David puun to pighibatan din, woy nighip-hipanow sikandin duon to ampow to baoy rin. Dio to pogpantow rin, nakakita sikandin to boi no nigparigus. Marodyow lagboy pitawon ka boi, 3 woy nigpa-aap si David to otow to pog-inso ko hontow sikandin. Nigtabak ka otow to “Sikandin si Batsiba no anak ni Iliam woy asawa ni Uria no kapunganan ni Hit.” 4 No nigpa-aap si David to mgo otow to pog-angoy kandin. Nighondio ka boi ki David woy nighulid si David kandin. Nakaparigus on ka boi takas to binuan no langosa rin.a 5 Naboros ka boi, woy nigpa-aap sikandin to kinagian ki David no kagi “Nangiram ad on da.”
6 No nigpa-aap si David to kinagian ki Yoab no nignangon to “Pohondiia nu si Uria no kapunganan ni Hit.” Woy inpa-aap sikandin ni Yoab ki David. 7 To poglopow ni Uria, nig-inso-inso si David kandin ko monua si Yoab, woy ka mgo sundau woy monua ka pogmangadyow ran. 8 No nignangon si David ki Uria to “Uli ka pa dio’t baoy nu, woy luu-i nu ka mgo paa nu.” No niglibuwas si Uria to dakol no baoy, woy duon inpa-aap ni David no igbogoy no inpasundul kandin. 9 Di nighibat si Uria duon to longod to gomawan to dakol no baoy to hari duma to tibon mgo suguanon to igbudyag din, woy waro sikandin mog-uli to baoy rin. 10 Pignangonan si David to “Waro nig-uli si Uria.” Nig-inso si David ki Uria to “Waro ka buwa nigligkat to mariu? Manio to waro ka mog-uli?” 11 Nigtabak si Uria ki David to “Tukbung do ka pig-ugpaan to Sooranan to Magboboot woy to mgo otow to Israil woy to Juda. Nigtutukbung do ka igbudyag ku no si Yoab, woy ka mgo sundau nu duon do to mgo kamot. No ogmonuon ku to pog-uli to pogkoon woy inom woy poghulid to asawa ku? Unawa to manokal ka pad, kono a ogpakahimu to sikan!” 12 No nigkagi si David kandin to “Palinggaat ka pad kai kuntoon no allow, woy asoom ogpalibongon ku sikoikow dio.” No nigpalinggaat si Uria to Yirusalim to sikan no allow taman to pogkapawo. 13 Pighinggat sikandin ni David to pogkoon woy pog-inom duma kandin, woy inlasing ni David si Uria. Di to pogkamaukilom, niglibuwas do si Uria odyow to poghirogo to ikam din duma to mgo suguanon to igbudyag din. Waro sikandin mog-uli.
14 To pogkapawo, nigsulat si David ki Yoab, woy pigpa-aap din pinabadyo ki Uria. 15 Nignangon si David duon to sulat to “Isabuk nu si Uria to tangkaan to pogmangadyow ko hondoi ka bubuuti no ogpanigbas. No ituos kow no ogpamariu kow kandin, odyow no ogkatigbas si Uria woy ogkamatoy sikandin.” 16 No sikan ian, tagood to piglingutan ni Yoab ka lunsud, inposasindog din si Uria to longod no natagaan din ko hondoi ka mabbuut no mgo usig dan. 17 To poglibuwas to mgo otow to lunsud odyow to pog-atu ki Yoab, nammatoy ka duma no mgo sundau ni David, woy nakalagkos namatoy si Uria no kapunganan ni Hit. 18 Nigpa-aap si Yoab to nangnangonon tongod to tibon nabadyaan dan to pogmangadyow. 19 Pignangonan din ka taagnangon to “Ko ogkapongaan nu to pognangon to soini tibo tongod to pogmangadyow, 20 naugpa ogkabou ka hari, woy og-inso sikandin to ‘Manio to nigmarani kow lagboy to lunsud odyow to pogmangadyow? Waro kow buwa mataga no ogpamano sikandan to mgo tunud ligkat to mgo aad to lunsud? 21 Hontow ka nakahimatoy ki Abimilik no anak ni Yirub-Bisit nokani? Waro ka buwa nakadoromdom no duon boi no nig-uug to batu to galingan duon to uu rin ligkat to aad, woy no sikan ian no namatoy sikandin duon to Tibis? Manio to nigmarani kow to aad?’ Ko og-inso si David to soini, nangoni nu sikandin to ‘Songo namatoy ka suguanon nu no si Uria no kapunganan ni Hit.’”
22Nighipanow ka taagnangon, woy to poglopow rin, pignangonan din si David to tibo no inponangon ni Yoab kandin. 23Nignangon ka taagnangon ki David to “Naroog koy to mgo otow, woy niglibuwas sikandan odyow to pog-atu kanami to libuwasan, di inpo-ituos noy sikandan taman to gomawan to lunsud. 24No nigpamano ka mgo taagpamano ligkat to aad, woy namatoy ka duma no mgo otow to hari to mgo tunud dan. Nokoy pad, no namatoy si Uria no kapunganan ni Hit.” 25Nignangon si David duon to taagnangon to “Nangoni nu si Yoab to ‘Doka’g kasasow to sikan; kono og-aam ka moirob ko hontow ka ogkamatoy to mangadyow. Paragas ka to pog-atu to lunsud, woy dooga nu.’ Sikan ka igkanangon nu odyow no ogkabaghot si Yoab.” 26To pogkarinog to asawa ni Uria no namatoy ka iglukos din, nigpandaawit sikandin. 27To natapus on ka mgo allow to pogpandaawit, inpa-angoy ni David si Batsiba duon to baoy rin, woy nohimu sikandin no asawa ni David, woy naka-anak si Batsiba to lukos ki David.
Di waro marago ka Magboboot to pighimu ni David.