9
Si David woy si Mipibosit
1 Nig-inso si David to “Duon buwa nagaat no kapunganan ni Saul? Ogkoiniat a porom to pogpakita to karodyowan kandin tongod ki Yunatan.” 2 No kuntoon duon suguanon to lunggunan ni Saul no si Siba. Pig-umow ran sikandin no nigtangko sikandin ki David. Nig-inso ka hari kandin to “Sikoikow buwa si Siba?” Nigtabak sikandin to “Kanak ian no suguanon nu.” 3 Nig-inso ka hari to “Waro buwa nagaat no otow to lunggunan ni Saul no ogkapakitaan ku to karodyowan to Magboboot?” Nigtabak si Siba to “Duon dod sagboka no anak ni Yunatan. Napulid sikandin to daruwa rin no mgo paa.” 4 No nig-inso ka hari to “Hondoi sikandin nig-ugpo?” Nigtabak si Siba to “Duon sikandin to baoy ni Makir no anak ni Ammiil duon to Lo-Dibar.” 5 No nigpa-aap si David to mgo otow to pog-angoy kandin puun to baoy ni Makir no anak ni Ammiil dio to Lo-Dibar. 6 No niglopow si Mipibosit no anak ni Yunatan no anak ni Saul duon ki David, woy to poglopow rin, nig-unduk sikandin odyow to pog-ila to hari. Nignangon si David to “Mipibosit!” Nigtabak sikandin to “Kanak ian no suguanon nu.” 7 Nigkagi si David kandin to “Doka’g kahallok, su igbogoy ku koikow ka koid-u tongod to amoy nu no si Yunatan. Ilibong ku koikow ka tibon tano no natagtuun to apu nu no si Saul nokani, woy ogkoon ka ladyun to koonanan ku.” 8 Nig-unduk si Mipibosit woy nigkagi sikandin to “Hontow a no suguanon nu? Manio to ogsagman ka koddi no nounawa a ro porom to namatoy no asu?”
9 No pigpo-umow ni David si Siba no suguanon ni Saul woy pignangonan din to “Inbogoy kud to apu to igbudyag nu ka tibo no natagtuun ni Saul woy to lunggunan din. 10 Sikoikow woy ka mgo anak nu no lukos, woy ka mgo suguanon nu ka ogmangkakamot to tano din woy sikaniu ka ogga-ani odyow no duon litos no ig-ugpo to apu to igbudyag nu. Woy tongod ki Mipibosit no apu to igbudyag nu, ogkoon sikandin ladyun to koonanan ku.” No kuntoon sampuu woy lalima ka mgo anak no lukos ni Siba, woy kawaan ka mgo suguanon din. 11 Nigtabak si Siba duon to hari to “Oghimuon ku ka agad nokoy no igsugu to hari no igbudyag ku, su suguanon a nu.” No sikan ian nigkokoon si Mipibosit to koonanan ni David unawa to sagboka no anak to hari. 12 Duon maintok pad no anak no lukos ni Mipibosit no pighingaranan ki Mika. Nohimu no mgo suguanon ni Mipibosit ka tibon mgo otow to lunggunan ni Siba. 13 Nig-ugpo do si Mipibosit to Yirusalim su ungud sikandin nigkokoon to koonanan to hari, woy su napulid sikandin to daruwa rin no paa.