7
Ka Kasabutan to Magboboot ki David
1 Takas to naka-ugpo on ka hari to dakol no baoy rin, woy no inpohimooy sikandin to Magboboot no warad on minangadyawoy to mgo usig din, 2 pignangonan din si Natan no taagtagna to “Pitow ka, soini ad noko-ugpo to dakol no baoy no nohimu to dorodyawi no kadyu no sidru, mangkuwan ka Sooranan to Magboboot nigpalinggaat to tukbung do.” 3 Nigtabak si Natan duon to hari to “Himua nu ko nokoy ka nadoromdoman nu, su nigduma ka Magboboot koikow.”
4 Di to sikan no maukilom niglopow ka kinagian to Magboboot duon ki Natan no kagi 5 “Hondio ka woy nangoni nu ka suguanon ku no si David to ‘Soini ka kinagian to Magboboot: Koikow buwa ka oghimu to baoy no ogko-ugpaan ku? 6 Waro a naka-ugpo to baoy ligkat to allow no pig-aap ku ka koot-otawan to Israil ligkat to Ehiptu taman kuntoon no allow. Nighalinhalin a woy sagboka no tukbung do ka pig-ugpaan ku. 7 Doromdoma nu, agad hondoi no pighalinan ku duma to koot-otawan to Israil, duon buwa sagboka no igbudyag no pigsugu ku to pogbantoy to koot-otawan ku no Israil no pignangonan ku to ‘Manio to waro a nu himui to baoy to kadyu no sidru?’ Waro ian!’ 8 No kuntoon, nangoni nu ka suguanon ku no si David to ‘Soini ka kinagian to Magboboot no Mabogbog to Tibo kagi ‘Pigpurut ku sikoikow puun to pasabsaban, woy puun to pogsundul to mgo karniru odyow no ogkohimu ka no igbudyag to koot-otawan ku no Israil. 9 Nigduma a koikow agad hondoi ka nigdoog, woy pig-awo ku ka tibon mgo usig nu to tangkaan nu. No kuntoon oghimuon ku no mabantug ka ngaran nu, unawa to mgo ngaran to babantugi no mgo otow to kalibutan. 10 Woy ogbogadyan ku to ugpaan ka koot-otawan ku no Israil, woy unawa’t ipamua ku sikandan odyow no duon kandan do no ugpaan no konad on sikandan ogsasowon to duma. Warad on maroot no mgo otow no og-uang-uang kandan unawa to pighimu ran nokani 11 ligkat to allow no pigtinuru ku ka mgo igbudyag to koot-otawan ku no Israil. Songo ogpohimoodyon ku sikoikow to pogmangadyow to mgo usig nu.
Nignangon ka Magboboot koikow no ka Magboboot ian ka ogpadigon to lunggunan nu. 12Ko ogkataman on ka ukul nu, woy oghimooy kad on duma to kabuybudyagan nu, ogparakoon ku ka tipouri nu no ogpakasoip koikow. Sagboka no otow sikandin no ogligkat to lawa nu, woy ogdigonon ku ka kandin no pogkahari. 13Sikandin ka oghimu to baoy tongod to Ngaran ku, woy ogdigonon ku ka pogkahari din taman to katamanan. 14Ogkohimu a no amoy rin, woy ogkohimu no anak ku sikandin. Ko duon sao din, oglogparan ku sikandin pinabadyo to baras to mgo otow, woy pinabadyo to poglampos to mgo koot-otawan. 15Di kono ogka-tampod ka goinawa ku kandin, unawa to pighawi ku soini ki Saul no pig-awo ku to tangkaan nu. 16Ogpalinggaat ka lunggunan nu woy ka pandatuan nu to tangkaan ku taman to katamanan; ogkadigon ka pogkahari nu to waro katamanan.’”
17 Innangon ni Natan ki David ka tibon mgo kinagian to soini no inpakita kandin.
18 No nigsood si Hari David to tukbung woy nigpinnuu sikandin to tangkaan to Magboboot woy nigkagi sikandin to “Magboboot no Igbudyag, hontow a no otowa, woy hontow ka lunggunan ku no pig-aap a nu taman kai? 19 Woy, nalitosan kad on porom to sikan, Magboboot no Igbudyag, di nigkagi ka pad kanak tongod to oglopow uromo to lunggunan to soini no suguanon nu. Soini buwa ka maasi no oghimuon nu to pogkagi to mgo otow, Magboboot no Igbudyag? 20 Nokoy pad ka igkakagi ku koikow? Hoo su nataga ka to tibo no duon to soini no suguanon nu, Magboboot no Igbudyag. 21 Pighimu nu ka soini no karodyowan woy inpoitaga nu to suguanon nu tongod to inpangulibot nu, woy sumao to pogboot nu. 22 Babantugi ka, Magboboot no Igbudyag! Waro unawa koikow. Waro loin no Magboboot ko konon sikoikow ro, sumao to narinog noy. 23 Woy hontow ka ogpaka-unawa to koot-otawan nu no Israil? Sikanami ka sagsagboka no koot-otawan to kalibutan no piglokat to Magboboot odyow no ogkohimu koy no koot-otawan din, woy odyow no ogkangaranan sikandin. Nighimu ka to mgo dakol no ogko-in-inuan pinabadyo to pogdogil nu to mgo koot-otawan woy mgo tinuuhan to tangkaan noy, woy piglokat koy nu ligkat to Ehiptu. 24 Pigdigon nu ka koot-otawan nu no Israil no koikow ka tagtuun taman to katamanan, woy sikoikow Magboboot ka nohimu no Tinuuhan dan.
25 No kuntoon Magboboot, ogtooron nu taman to katamanan porom ka pangulibot no pighimu nu to suguanon nu woy to lunggunan din. Himua nu ka innangon nu, 26 odyow no ogmabantug ka ngaran nu to waro katamanan. Ognangon ka mgo otow no ‘Ka Magboboot no Igbudyag ian ka nigboboot to Israil!’ Woy ogkadigon ka lunggunan to suguanon nu no si David dio to tangkaan nu. 27 Magboboot no Igbudyag, Tinuuhan to Israil, inpakita nu soini to suguanon nu su nignangon ka to ‘Ogparakoon ku ka lunggunan nu.’ Woy sikan ian no nakalangub a to pogtaruwoy to soini no panabisabi koikow kuntoon. 28 Magboboot to tibo, sikoikow ka ogboot! Ogkasaligan ka mgo kinagian nu, woy nangulibot ka no igbogoy nu soini no mgo karodyowan to suguanon nu. 29 No kuntoon, ogkarago ka porom to pogbolig to lunggunan to suguanon nu, odyow no ogpakaparagas sikan to tangkaan nu to waro katamanan. Hoo su nigkagi kad on, Magboboot no Igbudyag to tibo, woy ko ogboligan nu ka lunggunan to suguanon nu, ogkaboligan ian sikan taman to katamanan.”