28
1 Ogpanlaguy ka dorooti no otow agad ko waro oggapon, di ogkounawa to lion no kono ogkahinaatan ka mgo matuarong no otow.
2 Ko maligaon ka koot-otowan, moon-ing ka mgo igbudyag, di ogkatapid ka pog-ugpo ko duon igbudyag no ogpakasabut woy no duon katagaanan.
3 Unawa to uran no maagbot no ogpakadaat to mgo pinamua ka igbudyag no ogloig-loig to mgo otow no nawaraan.
4 Ogsadyoon ka mgo dorooti no otow to mgo otow no nig-iniug to kasuguan, di og-atuan sikandan to mgo otow no ogtuman to kasuguan.
5 Kono ogpakasabut to kohusoy ka mgo maroot no otow, di ogkasabutan lagboy sikan to mgo otow no ogpamangho to Magboboot.
6 Madmarodyow ka nawaraan no otow no waro igkasawoy, woy to datu no ogsuwoy-suwoy to daan.
7 Sagboka no anak no marodyow to pogdoromdom ka otow no ogtuman to mgo kasuguan, di ogkasiporan ka amoy to anak no ogdumaruma to mgo magolgol no otow.
8 Ko ogkadatu ka otow pinabadyo to pogpatulin to dakol to mgo utang, oghondio ka saapi no piglimud din dio to otow no ogkoid-u to mgo nawaraan.
9 Ogkarootan ka Magboboot to mgo pog-ampu to otow no kono ogpannalinga to kasuguan.
10 Ogko-uug to kandin do no tiklobu ka otow no og-aap to mgo matuarong to daan to karootan, di marodyow ka ogko-im-imanan no ogtinawoon to mgo otow no waro igkasawoy.
11 Naan to datu no otow no mougsob sikandin, di ogpakakita ka nawaraan no otow no duon marodyow no pogsabut ko hondoi ka kono'n litos to datu.
12 Ko ogpakaroog ka mgo matuarong, moon-ing ka ogkukuus; di ko ogkohimu no mgo igbudyag ka mgo dorooti no otow ogmanghoos on ka mgo otow.
13 Kono ogtulin ka otow no oghoos to mgo sao din, di ogkoid-uan ka otow no og-abin woy og-ongkod to sikan.
14 Ogkaboligan ka otow no ungud ogkahallok to Magboboot, di ogkalopowan to igkobaybadyari ka otow no ogpamakogal to goinawa rin.
15 Unawa to lionano ogpamangho to ogdawion din, woy unawa to osobno nabou ka dorooti no otow no ogboboot to nana-adyu-adyu no koot-otowan.
16 Kono'n marodyow ka pogdoromdom to igbudyag no ogloig-loig to mgo otow rin, di ogmaadyat ka ukul to otow no ogdomot to saapi no ogpuun to kono'n litos no pogpurut.
17 Waro ogbulig porom to otow no nakabunu, odyow no ogpalinggaat sikandin to pogsondit woy ogpalpalaguy taman to kamatadyon din.
18 Ogkabantadyan ka otow no waro igkosawoy, di ogkasaligkat to magaan ka otow no ogsuwoy-suwoy to daan.
19 Ogkabuung to pogkoon ka otow no mabasuk ogkakamot to tano din, di ka otow no ungud do oghinampot to igkaratui rin ogkabuung do to igkowaroi!
20 Ogkaboligan lagboy ka otow no ogkasaligan, di ogkalogparan ka otow no ungud ogpamangho to daan no ogpakadatu kandin to magaan.
21 Kono'n marodyow ko duon ogparapitan ta to poghusoy, di duon mgo otow no oghimu to kono'n litos tongod do su ogbogadyan to sagboka no pogkoon.
22 Ungud ogdoromdom ka logoron no otow no ogkaruonan sikandin porom, di waro sikandin mataga no ogdoog sikandin to pogkawaroi.
23 To kaugadyan dakol-dakol ka kabantug to otow no ogsapad to duma rin, woy to otow no ungud do oghuu-huu.
24 Unawa to otow no taaggugus ka otow no ogtakow puun to amoy woy inoy rin no ognangon “Kono'n sao sikan.”
25 Ian ogbunsud to pogpo-og-ogotoy ka magolgol no otow, di ogtulin ka otow no ogsalig to Magboboot.
26 Angol-angol ka otow no ogsalig to kandin do no doromdom, di ogkakaasagan ka otow no oghipanow to daan to kougsoban.
27 Kono ogkawaraan ka otow no ogbogoy duon to mgo nawaraan, di moon-ing ka tungadyow no ogtinawoon to otow no ogpakabutud to pogpitow kandan.
28 Ogmanghoos ka mgo otow ko ogkohimu no igbudyag ka mgo dorooti no otow; di ko ogkamatoy ka mgo dorooti no otow ogmatubung ka mgo otow no matuarong.