27
1 Doka'g parakol-dakol tongod to oghimuon nu asoom, su waro ka mataga ko nokoy ka oglopow to sikan no allow.
2 Loin porom no otow ka ogsadyo koikow; kono'n sikoikow ro.
3 Mabogat ka mgo batu, woy moirap ogtiangon ka badyokbok, di mabmabogat to sikan ka igkosasow puun to angol-angol no otow.
4 Ogpaka-uang-uang ka langot woy mabogat ka moinit no goinawa di waro ogpakatangko to ogpanalikud.
5 Madmarodyow ka pogsapad to tangkaan to tibo woy to dakol no goinawa no inhoos.
6 Marodyow ka tuud to aukoy nu ko ogkasakitan ka rin, di gawoy ro ka mgo harok to usig nu.
7 Ogsamilian to naantoy no otow ka tonob, di agad ka mapoit inat moomis duon to otow no oggutasan.
8 Unawa to manuk-manuk no ogpamariu to saag din ka otow no ogpamariu to ugpaan din.
9 Ogmaawang ka goinawa ta ko ogpakangarog ki to moumut no poomut woy palina, woy songo ogmaawang ka goinawa ta ko duon marodyow no tambag to aukoy ta.
10 Doka'g iniugi ka aukoy nu woy ka aukoy to amoy nu woy kono ka oghondio to baoy to suod nu to allow to igkobaybadyari nu; madmarodyow ka aukoy no marani woy to suod no mariu to pog-ugpo.
11 Anak, ogmougsob ka odyow no duon karago to goinawa ku, woy odyow no duon igkatabak ku to oglomot koddi.
12 Ogpa-aput panoy ka otow no marodyow to pogdoromdom ko ogpakakita sikandin to koirapan no ogdatong, di ogparagas do duon ka otow no waro gindawanan woy ogkabaybadyaran sikandin.
13 Tinawaa nu ka kinabo no igpamaugot to otow no ogbadyaran din ka utang to dagpu, woy puruta nu ian ko oghimuon din to utang to agkadyon no boi.
14 Ko ogboligan nu ka songobaoy nu to maagbot to masoom pad lagboy, oggoramon din no pigtungadyawan nu sikandin.
15 Unawa to pogtuu-tuu to woig to uran-uran no allow no ogpoko-ulingol ka asawa no ungud ogpang-ogot; 16 kono ogkaponoran sikandin unawa to kaamag no kono ogkaponoran woy unawa to mantika no kono ogkakomkom.
17 Ogkagaangan ka putow pinabadyo to putow woy ogkabagaan ka otow pinabadyo to otow.
18 Ogpakakoon to bogas to kadyu ka otow no og-udyamu to sikan no kadyu, woy ogkasadyo ka otow no og-udyamu to igbudyag din.
19 Unawa to ogkakitaan ka aung to otow duon to woig, ogkakitaan ka pogko-otow rin duon to goinawa rin.
20 Kono ogkabuung ka kamatadyon woy ka lobonganan woy songo kono ogkabuung ka mgo mata to otow to pogpipitow.
21 Ogko-ol-oogan ka karodyowan to bulawan woy to plata pinabadyo to hapuy, di ogko-ol-oogan ka otow pinabadyo to pogsadyo no ogkatinawo din.
22 Agad ko ogbinadyuon nu ka angol-angol no otow duon to losung unawa to pogbinadyu to homoy, kono ogka-awo ka pogka-angol din.
23 Doka'g kalingawi to pogpitow to mgo karniru nu, woy poomoti nu to pogbantoy to karodyowan to mgo kambing nu; 24 hoo su kono ogpalinggaat ka saapi taman to katamanan, woy kono ogparagas ka pogko-igbudyag to katamanan to mgo tipouri. 25 Ko oghakuton nu ka lagut no susungguroy to mgo adyam to tingkahagsil 26 duon ogkapurut nu no bulbul puun to mgo nati no karniru no ogkohimu no mgo kinabo now, woy ogkaduad nu ka mgo kambing no ogpakaboli ka to tano. 27 Woy duon pad gatas to kambing odyow to poghimu to sora no litos koikow, to lunggunan nu woy to mgo suguanon nu pad no mgo daaga.