26
1 Unawa to kono'n litos no ogmaagsil to guabung, woy ko og-uran to tinggaani, kono'n litos no ogtahuron ka angol-angol no otow.
2 Unawa to madya no kono ogsagdok woy to kaugoy-lugoy no kono oglatun, kono og-utong ka tungadyow duon to otow no kono'n litos no ogtungadyawan.
3 Kono ogbabali ka kuddo woy ka asnu ko waro lampos woy ko waro bukaru woy songo kono ogbabali ka angol-angol no otow ko waro baras.
4 Doka'g tabak to angol-angol no otow pinabadyo to ka-angoan din, odyow no kono ka ogkohimu no angol-angol songo.
5 Tabaka nu ka angol-angol no otow tongod to ka-angoan din, odyow no kono ogdoromdom sikandin no mougsob sikandin.
6 Iing to pigtampod nu ka paa nu woy unawa to nigpamudyu ka to kasakitan ko nigpa-aap ka to nangnangonon pinabadyo to angol-angol no otow.
7 Unawa to mgo paa to pulid no otow no waro dadyagang ka igtuaro duon to bobo to angol-angol no otow.
8 Unawa to oghikotan nu ka batu duon to pintik ko ogtahuron nu ka angol-angol no otow.
9 Unawa to dugion no nagon-gonan to nalasing no otow ko duon igtuaro duon to bobo to angol-angol no otow.
10 Unawa to ogpamano no otow no ogpakatausow ro duon to agad hontow ka otow no ogpatalabau to angol-angol no otow woy to otow no nigligad do.
11 Unawa to asu no oglibong ogkoon to pig-ilob din, oglibong oghimu ka angol-angol no otow to ka-angoan no hinimuan din.
12 Dakol-dakol ka ogko-im-imanan to angol-angol no otow woy to otow no mougsob to kandin do no pogpitow.
13 Ogkagi ka poguon no otow to “Kono a oglibuwas, su duon mabuut no lion duon to kalasara no oghip-hipanow duon to mgo pagindaanan.”
14 Unawa to lokob duon to bisagra rin no ogwoil-woil di kono oghipanow, ogliid-liid ka poguon no otow duon to hibatanan din.
15 Igsood to poguon no otow ka boad din duon to padyo di kono din oghonaton poglibong to bobo din tongod to pogkapogul din!
16 Naan to poguon no otow no mougsob pad sikandin to papitu no otow no ogtabak to litos.
17 Unawa to otow no ogsakoow to talinga to asu ka otow no oghilabot to pogpo-og-ogotoy no waro labot din.
18 Unawa to angol no otow no nigpamano to niglogdog no tunud woy ko ogpakamatoy no tunud 19 ka otow no oggawoy to songobaoy rin mangkuwan ognangon “Liag do sikan!”
20 Unawa't hapuy no ogkoobukan ko waro igtomog, ogkaparong ka pogpo-og-ogotoy ko waro ogwawangal.
21 Unawa to ogmoinit ka baga ko ogsabukan to uling woy unawa to oglogdog ka hapuy ko ogtomogan, ogpalogdog to kasamuk ka otow no magaan ogpo-og-ogotoy.
22 Unawa to managomnom no ngaap ka mgo kinagian to otow no ogtaosob, woy ogsood sikan to diraom to otow.
23 Unawa to og-alinoy to maroot no kuron ko duon marodyow no kinagian duon to bobo to otow no maroot so goinawa.
24 Ogpatuu no marodyow sikandin pinabadyo to kinagian ka otow no duon maroot no pogboot, di duon poggawoy to diraom to goinawa rin. 25 Agad ko marodyow ka mgo kinagian din, doka'g tuu kandin, su naponu to karootan ka goinawa rin. 26 Agad ko ogkohoos ka maroot no goinawa rin pinabadyo to poggawoy, ogkabokad ka karootan din to tangkaan to tibon koot-otowan.
27 Ko ogkakali ka otow to tiklobu ogko-unoy sikandin ogkatiklobu; ko ogliiron to otow ka batu, ogko-unoy sikandin ogkaligpisan to sikan.
28 Waro goinawa to otow duon to pigpasakitan din pinabadyo to pog-ubat, woy maroot ka oglopow tongod to pog-uug-uug to maroot no otow.