25
Duma Pad no mgo Igtuaro ni Solomon
1 Mgo duma pad no igtuaro ni Solomon soini no inpasulat ni Hisikia no hari to Juda to mgo otow rin:
2 Ka poghoos to katagaanan ian ka kabantug to Magboboot woy ka pogbokad to sikan ian ka kabantug to mgo hari.
3 Unawa't katikangan to langit woy to karaoman to tano, kono ogkatogkad ka goinawa to mgo hari.
4 Woy on ogkohimu no alahas ka plata ko ogtunawon woy og-awoon ka lagod din: 5 woy on ogkapos-ok to pogkamatuarong ka pogboot to hari ko og-awoon pad panoy ka mgo dorooti no otow duon to tangkaan to hari.
6 Doka'g parakol-dakol to tangkaan to hari, woy doka'g pinnuu to longod no intagama tongod to mgo datu. 7 Madmarodyow ko ognangon ka hari to “Dii kad,” woy no ogkasiporan ka ko ogdatong ka datu no litos to sikan no pinnuuanan.
Ko nokoy ka nakita to mgo mata nu 8 doka inangon magaan duon to husadyanan, su naugpa ogpasiporan ka to songobaoy nu to kaugadyan. 9 Ko ogpa-ap-apuoy kow to songobaoy nu, doka'g nangon to in-naas-naas no kinagian to duma no otow, 10 su ogpasiporan ka to otow no ogdinog to sikan, woy kono ogka-awo taman to katamanan ka maroot no ngaran nu.
11 Unawa't dorodyawi no alahas no bulawan no pighimasaran to plata ka marodyow no kinagian to litos no allow. 12 Unawa't dorodyawi no arikis no bulawan ka pogsapad to mougsob no otow duon to otow no ogpamminog to marodyow.
13 Unawa't maagsil no woig to guabung ka ogkasaligan no taagnangon duon to nigpa-aap kandin no ogpakabaghot to goinawa to mgo igbudyag din.
14 Unawa't kibol woy kaamag no kono ogtood og-uran ka otow no ogpangagikagi tongod to mgo igbogoy rin no kono din ogtooron pogbogoy.
15 Ogka-aap nu ka igbudyag ko kono ka no dagosu, woy agad ka makogal iing to bokog ogkagopu pinabadyo to maomu no kinagian.
16 Ko ogpakakita ka to tonob, litos-litosa nu ro ka ogkoonon nu su ko og-unguron nu ogpoko-ilob ka. 17 Songo doka'g maasia to pogpanumbaoy nu to songo baoy nu su ko og-unguron nu ogdomotan ka rin.
18 Unawa't baras, to kampilan woy to magaang no tunud ka otow no ogpamaugot to ubat tongod to songo baoy rin.
19 Unawa't maroot no ngipon woy to napulid no paa ka pogsandig duon to kono ogkasaligan no otow to allow to koirapan.
20 Unawa't poghawi to kinabo to maagsil no allow woy unawa't pogsabuk to suka duon to pali ko og-uranda ki duon to otow no duon mabogat no goinawa.
21 Ko oggutasan ka usig nu, bogadyi nu sikandin to koonon. Ko ogkammaraan sikandin, bogadyi nu sikandin to woig no ogko-inom din. 22 Ko oghimu ka to sikan, ogpatunawon nu ka makogal no goinawa rin woy ogkadassagan ka to Magboboot.
23 Unawa't duon uran ko ogkaamag to maagbot, duon ogkabou ko duon ogkagi to ogpakagawoy.
24 Madmarodyow no og-ugpo ka no ogpasagsagboka duon to pinadyagawoy to pog-ugpo nu to baoy duma to asawa no ungud ogpang-ogot.
25 Unawa't maagsil no woig duon to goinawa no naaboy ka marodyow no nangnangonon puun to mariu no ugpaan.
26 Unawa't lobog no sobsob woy unawa't pighiluan no sakoruanan ko duon matuarong no otow no ogpaugut to mgo tarabau to mgo dorooti no otow.
27 Kono'n marodyow ko ogdakolon nu ka pogkoon to tonob, woy songo kono'n matuarong ko ogpamangho ka to kabantugan nu.
28 Unawa't lunsud no waro marodyow no aad ko duon otow no kono ogpakaponod to pog-ugpo din.