23
-6-
1 Ko ogpinnuu ka to pogkoon duma to sagboka no igbudyag, indani nu ko nokoy ka duon to longod nu 2 woy gotgota nu ka liog nu ko magolgol ka ogkoon. 3 Doka'g koibog to mgo in-aam no mgo ngaap din, su ogkagawadyan ka to sikan no koonon.
-7-
4 Doka'g hiboadya ka lawa nu to pogpo-omot odyow ro no ogkaruonan ka; hagtong ka tongod to kougsoban nu. 5 Hoo su to songo pogpoo-poo do ogka-awo ka saapi; og-unawa to banug no ogboko to pakpak din no ogpamariu duon to langit.
-8-
6 Doka'g koon to pogkoon to logoron no otow, doka'g koibogi ka maddodyow no mgo pogkoon din, 7 su sagboka no otow sikandin no ungud ogkaraatan to pogdoromdom to ingkabadyad din. Ogkagi sikandin to “Inom ka. Koon ka,” di waro inparuma ka goinawa rin to ingkagi rin koikow. 8 Mangkuwan og-iilobon nu ka maintok no pigkoon nu, woy indaat nu ro ka mgo ingkasadyo nu kandin.
-9-
9 Doka'g kagi duon to angol-angol no otow, su ogsamilian din ka kougsoban to mgo kinagian nu.
-10-
10 Doka'g halina ka taan no indanan to oatan to tano, woy doka'g agowa ka tano to mgo ilu, 11 su manokal ka Taagpangabang kandan; og-atuan ka rin tongod kandan.
-11-
12 Dakola nu ka goinawa nu to mgo igtuaro, woy dorodyowa nu to pogpamminog to katagaanan.
-12-
13 Doka'g ul-uungi to pogsapad to bato; ko ogbarasan nu sikandin kono ogkamatoy sikandin. 14 Anara nu sikandin pinabadyo to pogbaras odyow ogkapangabangan nu ka gimukud din puun to kamatadyon.
-13-
15 Anak ku, ogkarago ka goinawa ku ko duon mougsob no goinawa nu. 16 Ogkukuus ka kinaraoman to goinawa ku ko ogkagi ka to litos.
-14-
17 Doka'g pauguti ka goinawa nu to pogko-ibog to pog-ugpo to mgo makasasao, di ikannugun nu ladyun ka pogkahallok to Magboboot. 18 Ko sikan ka oghimuon nu, duon marodyow no ogko-im-imanan nu woy kono ogkatampod ka pigtatagaran nu.
-15-
19 Anak, pamminog ka woy ogmougsob ka, woy ogpalinggaat ka goinawa nu to litos no daan. 20 Doka'g agpot to mgo otow no og-inom to dakol woy no ogpatamantaman to pogkoon to saapu, 21 hoo su ogkawaraan ka mgo otow no ungud ogkalasing woy mgo magolgol, woy ogkokohig-bit naan do ka ogkinaboon dan tongod to kapogul dan.
-16-
22 Pamminog ka to amoy nu no ian ka puunan to koudyagan nu, woy doka'g lomoti ka inoy nu ko budyag on sikandin. 23 Boli ka to kamaugotan woy doka'g duara sikan; puruta nu ka kougsoban, ka pogponod to pog-ugpo woy ka pogsabut. 24 Ogkarago lagboy ka amoy to sagboka no matuarong no otow; igkarago to otow ka anak din no duon kougsoban. 25 Ogkarago porom ka amoy woy ka inoy nu; ogkukuus to karago porom ka nig-anak koikow.
-17-
26 Anak, pannalinga ka koddi, woy molmoogi nu ka mgo daan ku 27 su unawa't maraom no bangaug to balun ka agkadyon no boi, woy ka masuwadyon no asawa. 28 Oggopas sikandin unawa't mabuut no otow no ogpamoon-ing to mgo makasasao taliwaro to koot-otowan.
-18-
29 Hontow ka duon igkobaybadyari? Hontow ka duon igmasakit to goinawa? Hontow ka duon poog-ogotoy? Hontow ka ogmugung-mugung? Hontow ka namali-palian no waro puus? Hontow ka duon malaab no mata? 30 Ian ka mgo ogmaugoy to pog-inom to binu, no og-ol-oog to kalkalasi no ogpakalasing.
31 Doka'g pipitow to binu no malaab woy maadyag duon to boung. Magaan do og-aboongon sikan, 32 di to kaugadyan ogkagat sikan unawa't uod; ogkohiluan ka unawa't pigsakmag ka to mammiloy. 33 Ogpakakita ka to ogpakataap woy ogkaguligow ka sumsumanan nu. 34 Ogkounawa to nokohirogo ka to bautu taliwaro to mgo luwak no mabolbol. 35 Ogkagi ka to “Pigsuntuk a ran, di waro a masakiti! Pigbarasan a ran, di waro a niggoram! Kon-u a ogpakahimata odyow no ogpoko-inom a oghutuk?”