22
1 Ogkoiniatan ta porom ka marodyow no ngaran labow to saapi; madmarodyow ka pogtahud woy to bulawan woy to plata.
2 Un-unawaro ka datu no otow woy ka nawaraan su pighimu sikandan tibo to Magboboot.
3 Ogkitoon to otow no marodyow to pogdoromdom ka igkobaybadyari no ogdatong woy ogpa-aput panoy sikandin, di ogparagas do duon ka mgo otow no waro gindawanan, woy ogkabaybadyaran sikandan.
4 Ka bogas to pogpasaad-saad woy to pogkahallok duon to Magboboot ian ka saapi, ka kabantug woy ka koudyagan.
5 Moon-ing ka mgo dugi woy lit-ag duon to mgo daan to dorooti no otow, di ogpakapamariu to sikan ka otow no ogbantoy to pogko-otow rin.
6 Anara nu ka bato to litos no daan, woy ko dakol on sikandin kono ogpakasuwoy sikandin to sikan.
7 Ogboot ka mgo datu to mgo nawaraan, woy ogkohimu no uripon to nigpasamboy ka nigsamboy.
8 Oggaani to igkobaybadyari ka otow no og-orok to karootan, woy ogkatampod ka kabuuti rin.
9 Ogkaboligan ka otow no mabinogadyon, su pigtaaran din ka mgo nawaraan to koonon din.
10 Ko ogkarogil ka taagsuy-at no otow, ogka-awo ka kasamuk; warad on ogpoog-ogotoy woy warad ogkasiporan.
11 Ogkohimu no aukoy to hari ka otow no ogkoiniat to goinawa no waro igkasawoy, woy moid-uon to pogkagi.
12 Ogbantadyan to Magboboot ka katagaanan, di ogbaabagan din ka mgo kinagian to mgo otow no ogsuwoy-suwoy.
13 Kagi to poguon no otow to “Kono a oglibuwas, su duon Lion to libuwasan!” woy “Ogkohimatadyan a duon to kalasara.”
14 Unawa to tiklobu ka mgo ig-adyat no kinagian to agkadyon no boi; ogko-uug duon ka otow no pig-ogotan to Magboboot.
15 Duon pogka-angol taan to goinawa to bato, di ogka-awo sikan pinabadyo to baras no ogsapad.
16 Ogkawaraan to kaugadyan ka otow no og-uang-uang to mgo otow no nawaraan odyow to pogtimul to saapi din, woy songo ogkawaraan to kaugadyan ka otow no ogbogoy to mgo igbogoy to mgo datu.
30 no Igtuaro to mgo Mougsob
17 pamminog ka woy pannalinga ka to mgo igtuaro to mgo mougsob; woy limura nu to goinawa nu ka mgo ig-anad ku, 18 su marodyow ka oggoramon nu ko ogkatantanuran nu sikan duon to goinawa nu, woy ogkagion nu ladyun.
19 Og-anaron ku sikoikow kuntoon, odyow no ogsaligan nu ka Magboboot.
20 Pigsulatan ku sikoikow to soini no katouan no igtuaro, no igkakagi to tambag woy katagaanan, 21 odyow og-anaron ka to litos woy ogkasaligan no mgo kinagian odyow no duon marodyow no igtabak nu to ogpa-aap koikow.
-1-
22 Dokow oglo-loiga ka mgo nawaraan tongod su waro ogkohimu ran, woy dokow og-ul-uangi ka mgo nawaraan duon to husoy, 23 su ka Magboboot ian ka ogpanabang tongod kandan, woy oghawion din to pog-agow ka nig-agow to nawaraan.
-2-
24 Doka'g usi-usi to otow no moinit so uu, doka'g dumaruma to otow no magaan ogkabou, 25 su ogka-anaran nu ka mgo daan din woy ogkalit-agan ka.
-3-
26 Doka'g pangulibot no ogbadyaran nu ka utang to dangob no otow, 27 su ko waro igkobadyad nu, agad ka ikam nu oghusuron duon to koikow!
-4-
28 Doka'g woila ka taan no indanan to oatan to tano no impos-ok to mgo kabuybudyagan now.
-5-
29 Pitowa nu ka mapandoy no otow; kono ogpakasugu kandin ka otow no waro ngaran, ian do ogpakasugu kandin ka mgo hari.