21
1 Ka Magboboot ian ka niggon-gon to goinawa to hari; sikandin ka ogboot ko hondoi ogdoog sikan unawa't pogboot din to pogpatu-aug to mgo woig.
2 Inat litos to otow ka tibo no oghimuon din, di og-ong-ongoron to Magboboot ka goinawa to otow.
3 To pogpitow to Magboboot, madmarodyow to pogtubad ka poghimu to litos woy to mahusoy.
4 Sao ka pogparakol-dakol no pogpitow woy ka goinawa no ogpagarol-garol. Sikan ka ogko-ilaan ta to dorooti no otow.
5 Ogtulin ka ogpoomot no otow puun to marodyow no pogbabantaan din, woy ogkawaraan ka otow no og-agpas-agpas.
6 Ogka-awo unawa't saagapun to masoom ka saapi no ogkapurut pinabadyo to ubat, woy ogkohimu no lit-ag to nigpurut.
7 Ogka-awo ka mgo dorooti no otow pinabadyo to kabuuti ran, su ogligal sikandan to poghimu to matuarong.
8 Ogsuwoy-suwoy ka daan to otow no nakasao, di waro igkasawoy to pog-ugpo to otow no waro makasao.
9 Madmarodyow no og-ugpo ka no sagsagboka duon to pinadyagawoy to pog-ugpo nu to baoy duma to asawa no ungud ogpang-ogot.
10 Karootan ian ka ogko-ibogan to dorooti no otow; agad ka songo baoy rin kono din ogkoid-uan.
11 Ogkaanad to kougsoban ka mgo otow no waro gindawanan ko ogkalogparan ka taagsuy-at no otow, woy ogkatimuan ka katagaanan to mougsob no otow ko ogkanangonan sikandin.
12 ogpitawon to Magboboot no Matuarong ka lunggunan to mgo dorooti no otow woy igbogoy rin to karootan ka dorooti no mgo otow.
13 Ko kono ogpamminogon to otow ka pogpakoid-u to mgo nawaraan, songo ogpakoid-u sikandin woy waro ogtabak kandin.
14 Ko duon igkabogoy nu to hoos duon to otow no nabou, ogkabohow ka moinit no goinawa rin koikow.
15 Ogkarago ka mgo matuarong ko litos ka husoy, di ogkahallok on ka mgo otow no ogsasao.
16 Ogpaka-agpot to mgo otow no namatoy on ka otow no ogpakasuwoy puun to daan to pogsabut.
17 Ogkawaraan ka otow no duon dakol no goinawa to karagoanan; woy kono ogkaratu ka otow no duon dakol no goinawa to mgo mahal no inumon woy koonon.
18 Ka mgo dorooti no otow ian ka ogpakabadyad liwan to mgo matuarong, woy ka mgo kono ogkasaligan liwan to mgo ogkasaligan.
19 Madmarodyow ko og-ugpo ka duon to han-hanawan woy to pog-ugpo nu duma to ungud ogpang-ogot woy arason no asawa.
20 To baoy to mougsob no otow, duon ingkannugun no maddodyow no sora woy mantika, di og-ubuson to angol-angol no otow ka tibo no duon to kandin.
21 Koudyagan, pogkamatuarong woy kabantug ian ka ogkakitaan to otow no ogpamangho to pogkamatuarong woy to kono ogkatampod no koid-u.
22 Ogkalusuran to mougsob no otow ka lunsud to mgo mabantug no otow, woy ogkagugus din ka madigon no aputanan no pigsaligan dan.
23 Ogpakapamariu to igkobaybadyari ka otow no ogbantoy ko nokoy ka ogkagion to bobo din.
24 Taagsuy-at ka otow no ogparakol-dakol woy ogpagarol-garol; nigdoromdom sikandin no sikandin ian ka dorodyawi.
25 Ogdoog to kamatadyon ka ogko-ibogan to poguon no otow su ogligal sikandin to pogtarabau, 26 ungud ogko-ibog sikandin no ogkatimuan pad, di ogbogoy ka matuarong no otow no kono oglogod-logod.
27 Igkarooti ka igtubad to mgo dorooti no otow, labow pad ko maroot ka tuud to nig-aap.
28 Ogkamatoy ka otow no ogpamaugot to ubat, di ogparagas taman to katamanan ka kinagian to otow no ogpannalinga to kamaugotan.
29 Ogpa-am-amangkua ka dorooti no otow, di ogdoromdomon panoy to matuarong no otow ko nokoy ka oghimuon din.
30 Waro kougsoban, waro katagaanan woy waro pigbabantaan no ogpakatood ko ogpaka-atu sikan to Magboboot.
31 Oghimporon panoy to mgo otow ka mgo og-unturan dan no mgo kuddo to ogmangadyow, di ka Magboboot ian ka ogboot ko hontow ka ogpakaroog.