20
1 Ogdoog to pogsuy-at ka pog-inom to binu, woy ogdoog to ogpasun-suntukoy ka pog-inom to ogpakalasing; kono'n mougsob ka otow no ogkapood tongod to sikan.
2 Unawa't hinigol to lionaka kabou to hari; ogkamatoy ka otow no ogpukow to kabou din.
3 Ogkabantug ka otow ko ogpamariu sikandin to pogpo-og-ogotoy, di magaan do ogpokog-ogot ka angol-angol no otow.
4 Kono ogdadaru ka poguon no otow to litos no buwan; nokoy naan no to tinggaani ogpamangho sikandin, di waro ogkitoon din.
5 Unawa't woig duon to maraom no balun ka mgo doromdomon to goinawa to otow, di ogkasakug sikan to otow no duon pogsabut.
6 Moon-ing ka og-abin no kono ogkatampod ka dakol no goinawa ran, di hontow ka ogpakakita to otow no ogkasaligan?
7 Waro ikasawoy to pog-ugpo to matuarong no otow; ogkaboligan ka mgo anak din puun kandin.
8 Ko ogpinnuu ka hari to husadyanan ogpaadyapon din ka karootan pinabadyo to pogpitow rin.
9 Hontow buwa ka ogpakanangon “In-oog ku ka goinawa ku no waro amut no karootan; malinis a no waro sao”? Waro ian!
10 Ogdomotan to Magboboot ko kono'n unawa ka kabogatan to pogboli woy ka kabogatan to pogbaligyo, songo ogdomotan din ko loin ka gantangan to pogboli woy ka gantangan to pogduad.
11 Agad ka bato ogko-ilaan pinabadyo to mgo hinimuan din; ko marodyow woy ko litos ka pog-ugpo din.
12 Ogpamminog ki woy ogpitow ki porom su pighimu to Magboboot ka mgo talinga woy mgo mata ta.
13 Doka'g koiniat to og-ungud oghirogo su ogkawaraan ka; himata ka odyow no kono ka ogkoubusan to koonon.
14 Kagi to ogboli duon to tindira “Maroot soini, maroot!” dokad di pog-uli ogpagarol sikandin tongod to pigboli rin.
15 Dakol ka bulawan, woy moon-ing ka mgo mahalon no batu, di manalimboka ro no alahas ka mgo bibig no ogkagi to katagaanan.
16 Tinawaa nu ka kinabo no igpamaugot to otow no ogbadyaran din ka utang to dagpu, woy puruta nu ian ko oghimuon din to utang to agkadyon no boi.
17 Inat moomis ka koonon no napurut to otow pinabadyo to gawoy, di to kaugadyan unawa't badyokbok do ka duon to bobo din.
18 Ko duon ogbantaanon nu, pamudyu ka to tambag; ko ogbunsud ka no ogmangadyow, pamanghoa nu ka ogpakatuon koikow.
19 Ogpuwasan to wangaon no otow ka ighoos no kinagian; no sikan ian no kono ka ogdumaruma to otow no ungud ogkagi.
20 Ko ogtungadyowon to otow ka amoy woy ko inoy rin, ogkoobukan ka ilawan din to dooman.
21 Ka igtugun-tugun no og-agpason to pogpurut kono ogkaboligan to kaugadyan.
22 Doka'g nangon “Ogsulian ku sikoikow to soini no sao nu!” Tagari nu ro ka Magboboot woy ogkapangabangan ka rin.
23 Ogdomotan to Magboboot ka kono'n unawa no kabogat to pogboli woy to pogduad, woy kono ogkarago sikandin to kono'n litos no sokoranan.
24 Ka Magboboot ian ka ogboot to daan ta; no sikan ian no kono ki ogpakasabut to ogbadyaan ta.
25 Ogkalit-ag ka otow no magaan ognangon no duon igbogoy rin to Magboboot no angkuwan do ogdoromdomon din ko nokoy ka inpangulibot din.
26 Ogpasirion to mougsob no hari ka mgo dorooti no otow; ogdi-diokan din sikandan.
27 Ogtong-awan to Magboboot ka goinawa to otow; ogmoog-moogan din ka kinaraoman to ogdoromdomon ta.b
28 Ogkakaasagan ka hari pinabadyo to dakol no goinawa woy pogkasaligan; ogkadigonan ka pogkahari din pinabadyo to koid-u.
29 Ka kanokal dan ian ka kabantug to mgo baubato pad, woy ka mgo uban dan ian ka kabantug to mgo budyag.
30 Ogka-awo ka karootan to otow pinabadyo to poglampos.