19
1 Madmarodyow ka otow no nawaraan no waro ikasawoy woy to angol-angol no otow no ogsuwoy-suwoy to kinagian.
2 Kono'n marodyow ko duon kabaghot di waro katagaanan, woy songo kono'n marodyow ko og-agpas-agpas no ogsuwoy to daan.
3 Ogkagugus ka pog-ugpo to otow tongod to pogka-angol-angol din, di ogsonditan din ka Magboboot duon to goinawa rin.
4 Moon-ing ka mgo aukoy nu ko ogkaruonan ka, di ogkoongkoran to aukoy rin ka otow no nawaraan.
5 Ogkalogparan ian ka otow no ogpamaugot to ubat, woy ogkakalabusu ka otow no ogmang-uubat.
6 Moon-ing ka og-ol-oog no ogdani to sagboka no igbudyag, woy ogkohimu no aukoy to tibo ka otow no mabogoy-bogoy.
7 Og-iniugan to mgo karumahan din ka otow no nawaraan – labow pad no ogpamariu ka mgo aukoy rin kandin! Agad ko oggaponon din sikandan no ogpakoid-u, kono din ogkakitaan sikandan!
8 Pigbantadyan din ka kandin do no ukul ka otow no ogpurut to kougsoban; ogtulin ka otow no ogkannugun to pogsabut.
9 Kono ogpakabutuas to logpad ka otow no ogpamaugot to kono'n litos, woy ogkamatoy ka otow no ungud og-uubat.
10 Kono'n litos ko duon angol-angol no otow no matubung to pog-ugpo – labow pad ko duon uripon no ogsugu to mgo anak to datu.
11 Mananoy ogkabou ka otow tongod to kougsoban din; kabantug din ian ko ogbaagaron ka og-atu kandin.
12 Unawa't hinigol to lionaka kabou to hari, di ka karago din unawa't domhug duon to lagut.
13 Ogkagugus ka pog-ugpo to amoy ko duon angol-angol no anak din, woy unawa't tuu-tuu no woig no kono oghagtong ka igboi no ungud og-atu.
14 Ogkatinawo ta ka mgo baoy woy saapi puun to mgo amoy ta, di puun to Magboboot ka asawa no marodyow to pogdoromdom.
15 Ogkohirogo ka otow no poguon woy oggutasan ka otow no kono ogwoil.
16 Pigbantadyan ka ukul din to otow no ogpannalinga to mgo igtuaro, di ogkamatoy ka otow no ogbaagad to daan din.
17 Iing to nigpasamboy ka to Magboboot ko ogbulig ka to mgo nawaraan, woy ka Magboboot ian ka ogdassag koikow tongod to pighimu nu.
18 Sapari nu ka anak nu, odyow no duon marodyow no pog-iman-iman; doka'g hoo to kamatadyon din.
19 Litos no oglogparan ka otow no magaan ogkabou; ko ogpangabangan nu sikandin kuntoon, oghutuk pad asoom.
20 pamminogi nu ka tambag woy tinawaa nu ka igtuaro, woy to kaugadyan ogmougsob ka.
21 Moon-ing ka mgo pigbabantaan to goinawa to otow, di ka tuud to Magboboot ian ka ogkatood.
22 Ka ogkoiniatan to mgo otow ian ka goinawa no ogkasaliganb; madmarodyow ka otow no nawaraan woy to ubaton.
23 Ogdoog to koudyagan ka kahallok duon to Magboboot: ogpakahimooy ka no nabuung, no waro igkobaybadyari.
24 Igsood to poguon no otow ka boad din duon to padyo di kono din oghonaton poglibong to bobo din!
25 Ko ogkabarasan ka taagsuy-at ogpaka-anad to marodyow no pogdoromdom ka mgo otow no waro gindawanan; ko ogkasaparan ka otow no ogpakasabut, ogkatimuan ka katagaanan din.
26 Ka otow no ogtakow puun to amoy rin woy ka ogdogil to inoy rin ian ka anak no og-aap to kasiporan.
27 Anak, ko oghagtong ka to pogpamminog to igtuaro, ogpakasuwoy ka puun to mgo kinagian to katagaanan.
28 Ogsamilian ka litos no husoy to otow no ogpamaugot to ubat, woy inat ian do inomon to dorooti no otow ka karootan.
29 Pig-indanan panoy ka iglogpad to mgo taagsuy-at, woy mgo igbaras to mgo poka to mgo angol-angol.