18
1 Kandin do no karodyowan ka ogdoromdomon to otow no kono og-amut-amut to duma; ogligalon din ka tibon marodyow no tambag.
2 Kono ogkarago ka angol-angol no otow to pogsabut; ian do ogkoiniatan din ka pognangon-nangon to nadoromdoman din.
3 Ko ogkohimu ka no dorooti, ogkasamilian ka, ogkasiporan ka woy ogka-awo ka kabantug nu.
4 Ka mgo kinagian to otow unawa to maraom no mgo woig, woy unawa to sobsob no ogtu-aug to kougsoban.
5 Maroot to husoy ko ogbuligan ka otow no dorooti woy ko ogbaabagan ka otow no waro sao.
6 Ogkabaybadyaran ka angol-angol no otow tongod to mgo ingkakagi rin, woy ogkabarasan sikandin tongod to mgo innangon din.
7 Ogkapood ka angol-angol no otow tongod to mgo ingkakagi rin, woy ogkalit-ag sikandin tongod to mgo innangon din.
8 Unawa to managomnom no ngaap ka mgo kinagian to otow no ogtaosob, woy ogsood sikan to diraom to otow.
9 Suod to taaggugus ka otow no poguon to tarabau rin.
10 Unawa't marigon no aputanan ka Ngaran to Magboboot; ogpanlaguy ka mgo matuarong duon woy kono ogka-amonu sikandan.
11 Ka saapi to mgo datu ian ka ilian dan; naan dan no kono ogkoumaan sikandan duon.
12 Ko ogparakol-dakol ka otow duon to goinawa rin, ogkapood sikandin; woy on ogkabantug ka otow ko ogpasaad-saad sikandin.
13 Angol-angol woy makasisipod ka otow no ogtabak to kono pad ogpamminog.
14 Ogkoulian ka otow to dau ko duon pad marodyow no pogdoromdom din, di kono ogkoulian sikandin ko warad on pog-iman-iman din.
15 Katagaanan ka ogpuruton to otow no duon marodyow no pogdoromdom; woy sikan do ka ogpamminogon to mgo talinga to mougsob no otow.
16 Ogpakapuwas to gomawan ka igbogoy, woy ogpakamarani ka nigbogoy duon to mgo mabantug.
17 Inat litos ka an-anadyan no otow no ogkagi to husoy taman to duon dangob no og-inso-inso kandin.
18 Ogkohusoy ka pogpo-og-ogotoy pinabadyo to timaoawoy ogpo-onong-onong on ka mabbuut no mgo usig.
19 Kono og-ituos ka suod no nasao-an unawa't lunsud no kono ogkalusuran su piglingkusan to aad no batu. Songo makogal oghusadyon ka mgo pogpo-og-ogotoy unawa't to madigon no lokob to aputanan no kono ogkasooran.
20 Ko nokoy ka ig-orok to bobo to otow ian dod ka ogga-anion din; ko marodyow ka ogkagion din, marodyow ka ogkapurut din.
21 Duon kabogbogan to koudyagan woy kamatadyon duon to bobo to otow; ogkoonon to matao no otow ka bogas to ingkakagi rin.
22 Marodyow ka ogkitoon to otow no ogpakakita to asawa, woy ogpakatinawo sikandin to karodyowan puun to Magboboot.
23 Ogpoid-uhoid-u ka otow no nawaraan ko ogkagi sikandin, di mabuut ko ogtabak ka naruonan no otow.
24 Duon otow no moon-ing ka aukoy, di kono ogbulig sikandan to koirapan, di duon aukoy no madmarodyow pad to suod no kono ogloko.