16
1 Ogbabantaan ka otow duon to goinawa rin, di ka Magboboot ka ogbogoy to tabak to sikan.
2 Naan to otow no litos ka tibon mgo oghimuon din, di ka Magboboot ian ka ogpaka-ongod-ongod to mgo tuud din.
3 Ibogoy now ka mgo oghimuon now duon to Magboboot, woy ogkatood ka tibon mgo pigbabantaan now.
4 Duon tuud to Magboboot to tibo no oghimuon din, agad ka allow to poglogpad din to mgo maroot no mgo otow.
5 Pig-usig to Magboboot ka tibo no ogparakol-dakol. Maugot ian: ogkalogparan ian sikandan.
6 Pinabadyo to koid-u woy kamaugotan, ogko-ulian ka mgo sao, woy pinabadyo to pogkahallok duon to Magboboot ogpakapamariu ka otow to karootan.
7 Agad ka mgo usig nu og-aaukuy koikow ko ogkarago ka Magboboot to mgo hinimuan nu.
8 Madmarodyow ka maintok no puun to pogkamatuarong woy to dakol no puun to kono'n mahusoy.
9 Ogbabantaan ka otow duon to goinawa rin ko hondoi sikandin ogdoog, di Ka Magboboot ian ka ogboot to ogkoumaan din.
10 Unawa to nigkagi ka Magboboot ko ogkagi ka hari, woy sikan ian no kono porom sikandin ogkagi to kono’n litos duon to husoy.
11 Puun to Magboboot ka litos no gantangan woy kiluhan; woy ogkoiniat sikandin no litos ka pogsokod ta.
12 Og-usigon to mgo hari ka karootan, su ogkarigon do ka pogboboot dan pinabadyo to pogkamatuarong.
13 Ogkarago ka mgo hari to ogkagi to kamaugotan; ogkoiniatan dan ka otow no ognangon to litos.
14 Ko ogkabou ka hari, duon ogkamatoy, di ogko-im-imuan sikandin to mougsob no otow.
15 Ko ogpo-iyum-iyum ka hari, duon koudyagan; unawa to pigtagaran no uran ka karago to hari.
16 Madmarodyow lagboy ka kougsoban woy to bulawan; madmarodyow ko og-aamon ka pogsabut labow to saapi.
17 Kono ogdoog to karootan ka daan to matuarong no otow, woy ko ogbantoy ki to daan ta, ogbantadyan ta ka koudyagan ta.
18 Oghun-a to pogkagugus ka pogparakol-dakol woy oghun-a to pogkapood ka pogpagarol-garol.
19 Madmarodyow ka pog-ugpo no ogpariraom duma to mgo nawaraan woy kono'n ka pogbaad-baad to pig-agow duma to mgo nigparakol-dakol.
20 Ogtulin ka otow no ogpannalinga to igtuaro, woy ogkaboligan ka otow no ogsalig duon to Magboboot.
21 Ogko-ilaan no marodyow to pogdoromdom ka mougsob no otow, woy ko moumol ka pogpangagi-kagi, ogtulin ka igtuaro.
22 Unawa to sobsob to koudyagan ka pogsabut duon to nakasabut, di logpad do ka ogkoumaan to ka-angoi to mgo angol-angol.
23 Ogpuun to marodyow no goinawa rin ka mgo kinagian to mougsob no otow, woy ogpakatuaro ka mgo nangnangonon din.
24 Unawa to tonob ka moumol no mgo kinagian; moomis oggoramon to goinawa ta woy ogpakatimul to dadyagang ta.
25 Duon daan no naan to otow no litos, dokad di ogdoog naan sikan no daan to kamatadyon to koopusan.
26 Ogpoomot ogtarabau ka otow odyow no duon ogkatinawo din, su gutasan sikandin.
27 Maroot ka ogbantaanon to dorooti no otow, woy unawa't hapuy no ogpakatutung ka mgo kinagian din.
28 Og-aap to kasamuk ka ogsuwoy-suwoy no otow, woy ogpakapaluat to mgo aukoy ka otow no ogtaosob.
29 Og-adyaton to mabuut no otow ka duma rin, odyow no og-aapon din to daan no kono'n marodyow.
30 Duon maroot no tuud to otow no ogsingyas to mata rin woy bobo din.
31 Unawa't indanan to kabantug ka uu no ubanon; ogkapurut sikan to poghipanow to daan to pogkamatuarong.
32 Madmarodyow to mabuut no otow ka otow no mananoy ogkabou, woy marodyow pad to otow no oglusud to lunsud ka otow no ogpakaponod to goinawa rin.
33 Ogtimao ka mgo otow di ka Magboboot ian ka ogboot ko nokoy ka tabak.