15
1 Ogka-awo ka langot ko moumol ka tabak, di ogmoinit pad ka goinawa ko mabuut ka ingkakagi.
2 Ogbogoy to katagaanan ka mgo kinagian to mgo mougsob no otow, di waro puus to mgo igpangagi-kagi to mgo angol-angol.
3 Nigpipitow ka Magboboot to tibon mgo ugpaan, no pigmolmoogan din ka mgo dorooti woy ka mgo marodyow no mgo otow.
4 Unawa to kadyu no ogbogoy to koudyagan ka kinagian no ogpokog-uli, di ogko-obuk ka kabaghot tongod to ogpakagawoy no kinagian.
5 Angol-angol ka otow no ogsamili to igsapad to amoy rin, di marodyow ka pogsabut to otow no ogpamminog to ogpakatul-id kandin.
6 Maddodyow ka mgo kaaglagan duon to baoy to matuarong no otow, di ka ogkoutol to dorooti ogbogoy to kasamuk.
7 Ogpakatangkap to katagaanan ka mgo kinagian to mougsob no otow, di kono ogkohimu sikan to mgo angol-angol.
8 Ogdomotan to Magboboot ka igtaruwoy to mgo dorooti no otow, di ogkarago sikandin ko ogpanubad ka mgo matuarong.
9 Og-usigon to Magboboot ka mgo daan to dorooti no otow, di dakol ka goinawa rin to mgo otow no ogpamangho to pogkamatuarong.
10 Dakol ka logpad no ogko-im-imanan to otow no ogsuwoy to litos no daan, woy ogkamatoy ka otow no ogsamili to igsapad.
11 Ogkitoon to Magboboot ka ugpaan to mgo nammatoy on, nokoy naan pad no ogpakakita sikandin to mgo ogdoromdomon to mgo otow.
12 Ogkabou ka taagsuy-at ko ogsaparan sikandin; kono og-inso sikandin to mgo mougsob.
13 Ko duon maawang no goinawa, songo duon pogpo-iyum-iyum, di ko duon dakol no igkasasow, ogko-obuk ka kabaghot.
14 Katagaanan ian ka ogpamanghoon to otow no duon marodyow no pogdoromdom, di ka igkoiniat to angol-angol no otow ian ka pogka-angol!
15 Maroot ladyun ka oggoramon to mgo otow no piglup-lupigan, di inat makoonon ladyun ka pog-ugpo to otow no ungud ogkarago.
16 Madmarodyow ko mointok ka kaaglagan nu no duon kahallok to Magboboot woy to otow no dakol ka kaaglagan di songo dakol ka ingkasasow.
17 Madmarodyow pad ko ogkoon ki to labay ro duma to mgo indakoli to goinawa ta, woy to ogkoon ki to pinaambog no nati duma to mgo usig ta.
18 Ogtimul to kasamuk ka otow no magaan ogkabou, di ogpahagtongon to ogpasaad-saad no otow ka ogpo-og-ogotoy.
19 Pigbaabagan to dugion ka daan to poguon no otow, di maawang ka daan to matuarong no otow.
20 Ogkarago ka amoy ko mougsob ka anak din, di angol-angol ka otow no ogsamili to inoy rin.
21 Ogkarago ka otow no waro marodyow no pogdoromdom to poghimu to igko-angol, di ogpalinggaat no matul-id ka daan to otow no marodyow to pogdoromdom.
22 Kono ogpakatood ka pigbantaan ko waro ogtambag, di ko moon-ing ka ogtambag, ogkatood ian sikan.
23 Ogkarago ka otow ko duon litos no igtabak din woy marodyow lagboy ka kinagian no kono ogkamoori.
24 Unawa't ogpamatikang ka daan to ukul to mougsob no otow odyow kono ogko-uug sikandin dio to lobonganan.
25 Oglupoton to Magboboot ka baoy to otow no ogparakol-dakol, di ikannugun din ka oatan to tano to bau.
26 Ogdomotan to Magboboot ka mgo sumsumanon to mgo dorooti, di ogkarago sikandin to mgo ogdoromdomon to mgo malinis to goinawa.
27 Ogkabaybadyaran ka lunggunan to otow no magolgol, di ogmaadyat ka ukul to otow no ogdomot to ig-adyat no saapi.
28 Og-ong-ongoron pad to matuarong no otow ka igtabak din, di ogpangagi-kagion do duon to bobo to dorooti ka maddoot no mgo kinagian.
29 Mariu ka Magboboot to mgo dorooti, di ogdinogon din ka mgo igpanubad to mgo matuarong.
30 Ogmaawang ka goinawa ta ko ogpakakita ki to langlanguan no narago, woy ogmarodyow ka oggoramon ta ko ogdinogon ta ka marodyow no nangnangonon.
31 Ogkohimu no duma to mgo mougsob ka otow no ogpamminog to sapad no ogtimul to ukul din.
32 Waro goinawa to pogko-otow rin ka otow no kono ogpamminog to insapad kandin, di ogkatimuan ka pogsabut to otow no ogpannalinga to pogpatul-id.
33 Og-anad to kougsoban ka kahallok duon to Magboboot, woy ogpasaad-saad ka otow woy on ogkabantug sikandin.