14
1 Ogpadigonon to mougsob no boi ka lunggunan din, di ogguguson to angol-angol no boi ka kandin no lunggunan pinabadyo to mgo oghimuon din.
2 Nahallok duon to Magboboot ka otow no nig-ugpo to litos, di pigsamilian ka Magboboot to otow no ogsuwoy-suwoy to daan.
3 Ogkabarasan ka poka to angol-angol no otow tongod to mgo kinagian din, di ogkakaasagan ka mougsob no otow tongod to kandin no igkakagi.
4 Ko waro igdadaru no karabaw, songo waro igkasunggud to karabaw, di ka dakol no pogga-ani ogligkat to dadyagang to karabawa.
5 Kono oggawoy ka otow no ogpamaugot to litos, di olin do ubat ka ogkagion to otow no kono ogkasaligan.
6 Kono ogkohimu no mougsob ka otow no ungud ogsuy-at, agad ko og-ol-oog sikandin, di magaan ogpaka-anad ka otow no marodyow so pogsabut.
7 Dokow ogdumaruma to angol-angol no otow, su waro katagaanan no ogkadinog now no oglibuwas to bobo din.
8 Mougsob ka marodyow no otow su ogdoromdom sikandin panoy ko nokoy ka oghimuon din, di angol ian ka mgo angol-angol su oggawoy sikandan.
9 Inat wa do duon to mgo angol-angol ko ogpakasao sikandan, di ogpoomot ka mgo matuarong to pogpokog-uli.
10 Ka goinawa to otow ro ian ka nataga ko nokoy ka igmasakit din, woy songo waro duma no ogpakagoram to igkarago din.
11 Ogkagugus ka lunggunan to dorooti no otow, di ogtulin ka pog-ugpo to matuarong no otow.
12 Duon daan no naan to otow no litos, dokad di ogdoog naan to kamatadyon.
13 Ogkapakoy no agad taliwaro to pogngisi duon dod igmasakit to goinawa, woy ogkohimu no ka igkarago kuntoon ogkabawi no igmasakit to goinawa angkuwan.
14 Ogkasulian ka ogsuwoy-suwoy no otow tongod to tibon mgo pighimu rin, woy songo ogkadassagan ka marodyow no otow tongod to kandin no pighimu.
15 Ogtuu to agad nokoy ka otow no waro gindawanan, di ogdoromdom panoy ka mougsob no otow ko nokoy ka litos.
16 Ogkahallok ka mougsob no otow duon to Magboboot woy og-iniugan din ka karootan, di ka angol-angol no otow atag, magaan ogkabou sikandin woy kono ogdoromdom to marodyow.
17 Angol-angol ka mgo hinimuan to otow no magaan ogkabou, woy og-usigon ka otow no ungud oggawoy.
18 Ka pogka-angol-angol do ka ogkatinawo to otow no waro gindawanan, di ogkadassagan to katagaanan ka otow no marodyow to pogdoromdom.
19 Ogluhud ka mgo maroot no otow to tangkaan to mgo marodyow, woy ka mgo dorooti dio to gomawan to mgo matuarong.
20 Ogkasamilian ka mgo otow no nawaraan agad to mgo songo baoy ran, di moon-ing ka mgo aukoy to mgo datu.
21 Ogpakasao ka ogsamili to songo baoy rin, di ogkaboligan ka otow no duon marodyow no goinawa duon to otow no nawaraan.
22 Ogpakasuwoy to daan ka mgo otow no ogbabantak to karootan, di ogkasulian pinabadyo to marodyow no goinawa woy pogkasaligan ka mgo otow no ogbabantaan to marodyow.
23 Ko ogpoomot ka ogtarabau, ogtulin ka, di ko ungud ka ro ogkagi, ogkawaraan ka.
24 Ogkadassagan ka mougsob no otow pinabadyo to pogkadatu din, di timul no pogka-angol do ka ogkatinawo to mgo angol-angol tongod to ka-angoi ran.
25 Ogpakalipuwas to ukul to mgo otow ka ogpamaugot to litos, di ogpakagawoy ka ogpamaugot to ubat.
26 Unawa't nig-ugpo to madigon no lunsud ka otow no duon kahallok to Magboboot woy unawa't nig-ugpo ka mgo anak din to aputanan no ilian.
27 Unawa't sobsob to koudyagan ka kahallok duon to Magboboot, ogpakapasuwoy sikan to otow puun to lit-ag to kamatadyon.
28 Ogmabantug ka hari ko moon-ing ka mgo otow rin, di ko waro sakup din ogkagugus ka pog-ugpo to datu.
29 Dakol ka pogsabut to otow no ogpasaad-saad, di ogpakita to ka-angoi rin ka otow no magaan ogkabou.
30 Ogmanokal ka lawa ko maawang ka goinawa, di ogkamou ka mgo bokog to otow no ogko-ima.
31 Ogkasubali ka Magboboot to otow no nig-uang-uang to mgo otow no nawaraan su pighimu sikandan to Magboboot, di pig-ila ka Magboboot to otow no moid-uon to mgo nawaraan.
32 Ko oglopow ka igkobaybadyari, ogkangkapood ka mgo dorooti no otow, di agad taliwaro to kamatadyon duon aputanan to mgo matuarong no otow.
33 Nig-ugpo ka kougsoban duon to goinawa to mgo otow no ogpakasabut, woy ogpakakita ka mgo angol-angol to sikan.
34 Ogkabantug ka nasud tongod to pogkamatuarong, di ogkasiporan ka koot-otowan tongod to pogpakasao.
35 Ogkarago ka hari ko duon ogkasaligan no suguanon din, di ogkabou sikandin to suguanon no og-aap to ogpakasipod kandin.