15
Pigsilaban ni Samson ka mgo Pinamua to mgo Filistihanon
1 To waro do nigmaugoy, to buwan to pogga-ani to trigu, nigpurut si Samson to sagboka no nati no kambing woy nighondio sikandin odyow to poglouy to asawa rin. Nigkagi sikandin to “Ogsood a to sinabong to asawa ku.” Di pigbaabagan sikandin to amoy to boi. 2 Nigkagi ka amoy to “Naan ku no pigdomotan nud on ian ka boi, woy nokoy naan no inbogoy ku sikandin duon to usi nu. Di, waro ka mogdoromdom buwa no madmarodyow pitawon ka hari rin? Ka hari ro ka ogpuruton nu liwan to kakoy.”
3 Pignangonan sikandan ni Samson to “To soini, ogkalitosan a ko ogsulian ku ka mgo Filistihanon. Ogpasakitan ku lagboy sikandan.” 4 No niglibuwas sikandin woy narakop din ka tatou no gatus no mgo magintaunan no asu. Pinoghikot-hikot din ka mgo ikug to tagdaruwa kandan woy inlagkos ka saong to poghikot. 5 Pigparokotan din ka mgo saong woy pigsabukan din ka mgo asu taliwaro to mgo kamot to trigu to mgo Filistihanon. No sikan ian pigsilaban din ka mgo kamot to trigu, iglagkos ka mgo binagkos no naga-ani on, woy ka mgo pinamua no ubas woy olibu. 6 Nigmoin-insooy ka mgo Filistihanon to “Hontow ka nighimu to soini?” Pignangonan sikandan to “Si Samson no maka-amung to otow to Timna ian ka nighimu to soini. Hoo, su inbogoy ka asawa rin duon to usi din.” No nighondio ka mgo Filistihanon, woy pigsilaban dan ka boi woy ka amoy rin odyow no ogkamatoy on sikandan. 7 Nigkagi si Samson kandan to “Tongod su soini ka pighimu now, kono a ogtakas taman to ogkasulian ku sikaniu.” 8 Piglusuran din sikandan to waro koid-u woy moon-ing kandan ka pighimatadyan din. No nighipanow si Samson woy nig-ugpo sikandin to sagboka no pilang duon to batu to Itam.
Pighimatadyan ni Samson Ka 1000 no Filistihanon Pinabadyo to Bokog do.
9 Nighipanow ka mgo Filistihanon no nig-ugpo to tano to Juda no nigtangkap sikandan to marani to Lihi. 10 Nig-inso ka mgo otow to Juda to “Manio to nighondii kow to pog-atu kanami?”
Nigtabak ka mgo Filistihanon to “Nighondii koy odyow to pogdakop ki Samson su ogsulian noy sikandin to pighimu rin kanami.” 11 No nighondio ka tatou no libu no otow to Juda dio to pilang duon to batu to Itam, woy pignangonan dan si Samson to “Waro ka mataga no mgo igbudyag ta ka mgo Filistihanon? Nokoy soini no pighimu nu kanami?”
Nigtabak si Samson to “Waro nohimu ku no waro dan himua panoy kanak.”
12 Pignangonan dan sikandin to “Nighondii koy odyow to pogbanggut koikow woy ighatod noy sikoikow to mgo Filistihanon.”
Nigkagi si Samson to “Pangulibot kow kanak no kono a now oghimatadyan.”
13 Nigtabak sikandan to “No man. Oghikotan noy ro sikoikow woy igbogoy noy sikoikow dio’t kandan. Kono noy oghimatadyan sikoikow.” No pigbanggutan dan sikandin to daruwa no iam no lubid, woy pig-aap dan sikandin ligkat to batu. 14 To marani on si Samson to Lihi, nigparoog kandin ka mgo Filistihanon no nigbabansagon. Piglona-an sikandin to Gimukud to Magboboot to kabogbogan. Ka mgo lubid duon to mgo boad din nohimu no unawa to natutung no lanut to abaka no magaan ogkabigtow. Nahokad ka inbanggut to mgo boad din. 15 Nakakita sikandin to iam pad no bokog to bako to asnu, woy pigpurut din woy piggamit din to poghimatoy to songo libu no otow. 16 Nigkagi si Samson to “Pinabadyo to bako to asnu piglimudakud ka mgo lawa ran. Pinabadyo to bako to asnu nakahimatoy a to songo libu kandan.” 17 To pogtakas din to pogkagi, indogpak din ka bako. Pighingaranan dan ka sikan no longod to ‘Ramat Lihi,’ no to kanta pad ‘Bubungan to Bako.’
18 No kuntoon, ogpaka-inom lagboy si Samson woy sikan ian nigpangiak sikandin duon to Magboboot to “Pigbogadyan nud ka soini no suguanon nu to dakol no pogkaroog, di kuntoon ogbaagaron a nu buwa no ogkamatoy to ogkammaraan a woy ogkarakop a to mgo otow no waro matuli?” 19 No pigpuwasan to Magboboot ka sagboka no bangaug to Lihi woy nigtu-aug ka woig ligkat to sikan. To pog-inom ni Samson, niglibong ka dadyagang din woy marodyow on ka oggoramon din. No pighingaranan dan ka sikan no longod no ‘In Hakkori’, no ogpasabut to ‘Sobsob to Nig-umow’, woy duon dod ka woig dio to Lihi kuntoon. 20 Si Samson ka nohimu no igbudyag to mgo otow to Israil sood to kawaan no tuid to mgo allow to pogboot to mgo Filistihanon.