16
Si Samson woy ka Boi to Gasa
1 Sagboka no allow to sikan, nighondio si Samson to Gasaa, woy nakakita sikandin to agkadyon no boi dio. Nigsood si Samson odyow to poghulid kandin to maukilom. 2 Pignangonan ka mgo otow to Gasa to “Kai si Samson!” No sikan ian no piglingutan dan ka sikan no ugpaan woy nigtatagad sikandan to tibon maukilom dio to gomawan to lunsud. Waro pighimu ran to maukilom no nigkagi sikandan to “Oghimatadyan tad sikandin ko ogsilo ka allow.” 3 Di nighibat do si Samson taman to taliwaro to kaukiloman. No nig-onow sikandin woy pighonat din ka lokob to gomawan to lunsud, iglagkos ka daruwa no suwoy to sikan. Pigbagnus din ka tibo, iglagkos ka trangka. Pigtiang din sikan woy pig-aap din taman to igdus to bubungan no ogtangko to Hibron.b
Si Samson woy Si Dalila
4 To nakaligad on ka pila no allow, niglopow no nigdakol ka goinawa ni Samson to sagboka no boi ligkat to Aug to Sorik.cKa ngaran to boi ian si Dalila. 5 Nighondio ka mgo igbudyag to mgo Filistihanon ki Dalila, woy pignangonan dan sikandin to “Pitow ka ko ogka-adyat nu sikandin to pognangon koikow ko nokoy ka inhoos no puunan to dakol no dadyagang din, woy ko ogmomonu koy odyow no ogkabanggutan noy sikandin woy ogkaroog noy sikandin. Kara sagboka kanami ogbogoy koikow to songo libu woy songo gatus no saapi.” 6 No pignangonan si Samson ni Dalila to “Nangoni a nu to inhoos no puunan to dakol no kabogbogan nu, woy ko ogmonuon ka odyow no ogkabaku ka woy ogkaroog ka.”
7 Nigtabak si Samson kandin to “Ko ogkabanggutan a to papitu no iam pad no tagpos no waro narampil, ogkohimu a no maotoy iing to duma no mgo otow.” 8 No nig-aap ka mgo igbudyag to mgo Filistihanon to papitu no iam pad no tagpos no waro narampil, woy pigbanggutan ni Dalila si Samson to sikan. 9 To duon mgo otow no nighoos to sinabong, nig-umow si Dalila kandin to “Samson, ogkatinagpaan kad on to mgo Filistihanon!” Di nabigtow rin ka mgo tagpos unawa to kagaan to pogbigtow to lubid no nakarani to hapuy. No sikan ian no waro pad makitoi ka inhoos no puunan to dadyagang ni Samson. 10 No pignangonan si Samson ni Dalila to “Piggawadyan a nu; pig-ubatan a nu. No, nangoni a nu ko ogmonuon no ogkabanggutan ka.”
11 Nigtabak si Samson to “Ko oghogotan a now to pogbanggut to iam pad no mgo lubid no waro pad magamit, ogmaotoy a unawa to duma no mgo otow.” 12 No nigpurut si Dalila to iam pad no mgo lubid woy pighikotan din si Samson. No to duon mgo otow no nighoos to sinabong nig-umow sikandin to “Samson, ogkatinagpaan kad on to mgo Filistihanon!” Di nabigtow rin ka mgo lubid no duon to boad din iing to mgo sinulid do sikan.
13 No nigkagi si Dalila kandin to “Ligkat to binunsuran taman kuntoon piggawadyan a nu, woy pig-ubatan a nu. Nangoni a nu ko ogmonuon no ogkabaku ka.”
Nigtabak si Samson to “Ko oghabolon ka papitu no saapid to bulbul ku duon to manggad no duon to haboanan, woy oghogoton nu pinabadyo to tiukd, ogmaotoy a unawa to duma no mgo otow.” No tagood to nighirogo si Samson, nigpurut si Dalila to papitu no saapid to bulbul ni Samson woy pighabol din to manggad, 14 woy pighogot din to tiuk. Nighutuk nig-umow si Dalila kandin to “Samson, ogkatinagpaan kad on to mgo Filistihanon!” Niggimuat sikandin woy nohusud din do ka tiuk woy ka haboanan duma to manggad.
15 No nigkagi si Dalila kandin to “Manio no ognangon ka to ‘dakol so goinawa ku koikow,’ no kono ka ognangon kanak to maugot? Soini ka igkatatou no poggawoy nu kanak, no waro a nu manangoni to inhoos no puunan to dakol no dadyagang nu.” 16 To iing sikan no mgo pog-inso-inso, nigparagas si Dalila to pog-ulingol ki Samson allow-allow taman to nabooy on sikandin no ogkoiniat no ogkamatoy porom. 17 No pignangonan din sikandin to tibo, kagi “Waro makagisi ka uu ku ligkat to pogkootow ku, su in-oog a no Nasir to Magboboot ligkat to dio a pad to aanakan to inoy ku. Ko ogkakagisan ka uu ku, ogka-awaan a to dadyagang ku, woy ogmaotoy a unawa to duma no mgo otow.” 18 To pogkakita ni Dalila no pignangonan on sikandin to maugot, nigpa-aap sikandin to kinagian to mgo igbudyag to mgo Filistihanon no kagi “Libong kow to kasagboka naan do; pignangonan a rin on to tibo.” No niglibong ka mgo igbudyag to mgo Filistihanon no nig-aap to saapi dan duon to mgo boad dan. 19 Inpohirogo ni Dalila si Samson no inpo-uunan duon to bubun din, woy pig-umow rin ka sagboka no otow no ogkagis to papitu no saapid to bulbul din. Nigbunsud on nigmaotoy si Samson, woy na-awaan sikandin to dadyagang din. 20 No nig-umow si Dalila to “Samson, ogkatinagpaan kad on to mgo Filistihanon!” Niggimuat sikandin, woy nigdoromdom sikandin no oglibuwas sikandin no ogpakabutuas unawa to nokohun-a, di waro sikandin mataga no noongkoran naan sikandin to Magboboot. 21 Pigtinagpaan si Samson to mgo Filistihanon, woy piglokat dan ka mgo mata rin woy pig-aap dan sikandin to Gasa. Pighikotan dan si Samson to mgo tumbaga no mgo kadina, woy pigpatarabau ran sikandin to poggaling duon to kalabusuan. 22 Di nigbunsud on nigtulin man do ka bulbul din duon to kalabusuan takas to nakagisan.
Ka Kamatadyon ni Samson
23 No kuntoon, niglimud-limud ka mgo igbudyag to mgo Filistihanon odyow to pogpanubad to dakol no tubad duon to Tinuuhan dan no si Dagon. Nigkukuus sikandan no nigkagi to “Pigbogadyan kid ni Dagon to pogkaroog to usig ta no si Samson.” 24 To pogkakita to mgo otow kandin, nigsadyo sikandan to tinuuhan dan no nigkagi “Nabogadyan kid ni Dagon to pogkaroog to usig ta no nakadaat to mgo kamot noy woy no niglimud to mgo namatoy no lawa to mgo duma ta.” 25 To narago-dago sikandan, nigbabansagon sikandan to “Palibuwasa now si Samson odyow no oghimuon ta no liaganan.” No pig-aap dan si Samson ligkat to kalabusuan woy nighimu sikandin to mgo ogko-in-inuan to tangkaan dan, no nighasindog sikandin to taliwaro to mgo suwoy. 26 Nignangon si Samson to suguonon no nigtudyuk kandin to “Aapa a nu to longod no ogkasamsaman ku ka mgo suwoy no nakatukog to baoy no panubaranan odyow no ogpakasandig a.”
27 No kuntoon, sokol-sokol on ka baoy no panubaranan to mgo lukos woy boi, woy duon ka tibon mgo igbudyag to mgo Filistihanon dio. Dio to atop pad duon mgo tatou no libu no otow no nigpitow ki Samson to poghimu rin to mgo ogko-in-inuan. 28 No nigpanabisabi si Samson to Magboboot to “Magboboot no Igbudyag to tibo, doromdomi a nu. Magboboot, bogadyi a oghutuk to kasagboka ro to dadyagang ku, odyow no ogkasulian ku ka soini no mgo Filistihanon tongod to daruwa no mgo mata ku.” 29 To taliwaro to baoy no panubaranan duon daruwa no suwoy no nigtukog to sikan. Nigdopa si Samson to mgo boad din no duon ka kawanan no boad din to sagboka no suwoy, woy duon ka gibang no boad din to dangob woy nigpagindadyagang sikandin. 30 Nigkagi si Samson to “Pauguti a to pogkamatoy duma to mgo Filistihanon!” No pigboko din ka mgo suwoy to tibon dadyagang din, woy napood ka baoy no panubaranan ampow to mgo igbudyag woy to tibon mgo otow no duon to sood. No sikan ian no mol-moon-ing lagboy ka pighimatadyan ni Samson to pogkamatoy rin to pighimatadyan din to manokal pad sikandin.
31 No nighondio ka mgo suod ni Samson woy ka tibon lunggunan to amoy rin odyow to pog-angoy kandin. Pig-aap dan ka lawa rin uli to taliwaro to Tsora woy Istaol, woy inlobong dan to lobonganan ni Manoa no amoy rin. Naka-aap sikandin to Israil sood to kawaan no tuid.