14
Si Samson woy Ka Boi no Matig Timna
1 No kuntoon, nighondio si Samson to Timna, woy duon nakita rin dio no boi no Filistihanon. 2 To pog-uli din, pignangonan din ka amoy woy inoy rin to “Nakakita a to boi no Filistihanon dio to Timna. No kuntoon, puruti a now kandin su og-asawoon ku.”
3 Nigtabak ka amoy woy inoy rin to “Waro buwa nakita nu no boi kai to karumahan nu woy kai to koot-otawan ta? Manio no oghondio ka to mgo Filistihanon no waro matuli odyow to pogpurut to og-asawoon nu?”
Di nigkagi si Samson to amoy rin to “Puruti a nu kandin. Sikandin ka litos kanak.” 4(Waro mataga naan ka amoy woy inoy rin no puun to Magboboot atag soini, su nigpamangho ka Magboboot to daan odyow no ogka-atuan ka mgo Filistihanon; hoo su to sikan no mgo allow, sikandan ka nigboot to Israil.)
5 Nighondio si Samson to Timna duma to amoy woy inoy rin. To marani on sikandan to mgo pigpamua-an to mgo ubas to Timna, duon niglopow no lion no nighinigol no nigdani ki Samson. 6 Piglona-an si Samson to Gimukud to Magboboot pinabadyo to kabogbogan woy pighigbit-higbit din ka lion pinabadyo to boad din unawa to poghigbit-higbit din porom to sagboka no maintok no nati to kambing. Di waro din pignangonan ka amoy woy inoy rin to pighimu rin. 7 No, nighondio si Samson woy pig-aukudyan din ka boi woy noiniatan din sikandin.
8 To nakaligad on ka mgo allow, niglibong si Samson odyow to pogpangasawa to boi. To poghondio din, pigsagpitan din pad ka lawa to namatoy no lion. Pigsasaagan ka lawa to mgo patiukan woy duon tonob. 9 Pighakup din ka tonob woy nigkokoon sikandin tagood to poghipanow rin. To pogtomu rin to amoy woy inoy rin, songo pigbogadyan din sikandan to tonob woy songo nigkoon sikandan. Di waro din pignangonan sikandan no napurut din ka tonob to lawa to lion. 10 No kuntoon, nighondio ka amoy rin odyow no ogkitoon ka boi. Nighimu si Samson to pogkoonan unawa to oghimuon to mgo ogpangasawa no lukos. 11 To poglopow rin, pigparumaan dan sikandin to 30 no otow.
12 Nigkagi si Samson kandan to “Og-antukan ku sikaniu. Ko ogpakahokad kow to sikan sood to papitu no allow to pogkoonan, ogbogadyan ku sikaniu to 30 no linu no manggad, woy to 30 no kinabo. 13 Di ko kono kow ogpakahokad to antukon ku, ogbogadyan a now to 30 no linu no manggad woy to 30 no kinabo.”
Nigtabak sikandan to “Nangoni koy to antukon nu. Ogpamminogon noy.”
14 Nigtabak sikandin to “Ligkat to ogkoon, duon ogkakoon; Ligkat to manokal, duon moomis.” Sood to tatou no allow waro sikandan nakabogoy to litos no tabak. 15 To igkohop-at no allow, nignangon sikandan to asawa ni Samson to “Im-imui nu ka iglukos nu to poghokad to antukon din kanami. Ko kono ka, ogsilaban noy ka lunggunan nu woy to amoy nu odyow no ogkammatoy kow. Pighinggat koy now buwa odyow no ogtakawon koy now?” 16 No, nighondio ka boi ki Samson no nigsisinogow no kagi “Pigdomotan a nu! Konon maugot ka goinawa nu kanak. Pig-antukan nu ka mgo otow ku, di waro ka mognangon kanak to hokad.”
Nigtabak si Samson to “Waro a makanangon to hokad duon to amoy woy inoy ku, iam pad naan ko sikoikow?” 17 Nigsisinogow ka boi to tibon papitu no allow to pogkoonan. No sikan ian to igkapitu no allow pignangonan din ka boi, su nig-ungud nig-inso sikandin ki Samson. Songo pignangonan to boi ka koot-otawan din to hokad to antukon. 18 To waro pad nakasaop ka allow to igkapitu no allow, nignangon ka mgo lukos to lunsud ki Samson to “Nokoy naan ka moomis pad to tonob? Woy nokoy naan ka manokal pad to lion?”
Nigkagi si Samson kandan to “Ko waro kow niggamit to koddi no baka to pogdadaru, waro kow porom nakahokad to antukon ku.” 19 No, piglona-an si Samson to Gimukud to Magboboot to kabogbogan. Nighondio sikandin to Askilon, woy pighimatadyan din ka 30 no otow dio. Inluung din ka kinabo dio to lawa ran, woy inbogoy rin ka mgo kinabo duon to mgo otow no nakahokad to antukon din. Nabou lagboy sikandin, woy nig-uli do sikandin to baoy to amoy rin. 20 Woy inbogoy ka asawa ni Samson duon to usi din no nakaduma kandin to kasal din.