13
Pogkootow ni Samson
1 Nighutuk man do nakasao ka mgo otow to Israil duon to pogpitow to Magboboot, woy sikan ian no pigpaugutan to Magboboot no ogkadiraom sikandan to pogboot to mgo Filistihanon sood to kohop-atan no tuid. 2 No kuntoon, duon sagboka no otow no matig Tsora. Ka ngaran din ian si Manoa no kapunganan ni Dan. Duon asawa rin no waro anak su kono ian ogpanganak sikandin. 3 Nigtokow ka diwata to Magboboot to boi woy nigkagi sikandin to “Waro anak nu, woy kono ka porom ogpaka-anak, di ogkaboros ka woy ogpaka-anak ka to lukos. 4 No kuntoon, bantoy ka no kono ka og-inom to binu woy agad nokoy no ogpakalasing, woy no kono ka ogkoon to agad nokoy no maligsoma 5 su ogkaboros ka woy og-anak ka to lukos. Kono ogkakagisan ka uu rin to kakagisoy su ogkohimu sikandin no lukos no Nasirbno in-oog to Magboboot ligkat to pogkootow rin. Woy sikandin ka ogbunsud to pogpangabang to Israil ligkat to boad to mgo Filistihanon.” 6 No nighondio ka boi duon to iglukos din, woy pignangonan din sikandin to “Duon makahinhinaat no otow to Magboboot no niglopow kanak no inat diwata pitawon sikandin. Waro a nig-inso kandin ko hondoi sikandin puun, woy waro a rin nangoni to ngaran din. 7 Di pignangonan a rin to ‘Ogkaboros ka woy ogpaka-anak ka to lukos. No kuntoon, doka og-inom to binu woy to duma pad no ogpakalasing, woy doka ogkoon to agad nokoy no maligsom su ogkohimu ka bato no Nasir to Magboboot ligkat to pogkootow rin taman to allow to kamatadyon din.’” 8 No nigpanubad si Manoa duon to Magboboot to “Igbudyag ku, ogpoid-uhoid-u a koikow no ogpaugutan nu porom no oglibong ka otow to Magboboot no inpa-aap nu, odyow no ogpakanangon sikandin kanami ko ogmonuon noy to pog-aap to bato no ogko-otow to pogtulin din.” 9 Nigpamminog ka Magboboot ki Manoa, woy niglibong ka diwata to Magboboot duon to boi to dio sikandin to kamot; di waro nakaruma ka iglukos din no si Manoa. 10 Nig-agpas nighondio ka boi odyow to pognangon to iglukos din to “Kaid on sikandin! Ka otow no niglopow kanak to nigligad no allow!” 11 Nighasindog si Manoa woy nigsundul sikandin to asawa rin. To poglopow ran to otow, nig-inso si Manoa to “Koikow buwa ka nig-aaukuy to asawa ku?”
Nigtabak ka otow to “Kanak ian.”
12 No nig-inso si Manoa kandin to “Ko ogkatood on ka innangon nu, nokoy naan ka udlin to pog-ugpo woy pogtarabau to bato?” 13 Nigtabak ka diwata to Magboboot to “Oghimuon ian to asawa nu ka tibo no innangon ku kandin. 14 Kono ian ogkoon sikandin to agad nokoy no ogligkat to lobut to ubas, woy kono og-inom sikandin to binu woy agad nokoy no ogpakalasing, woy kono ogkoon sikandin to agad nokoy no maligsom. Oghimuon din ian ka tibo no insugu ku kandin.”
15 Nignangon si Manoa duon to diwata to Magboboot to “Ogkoiniat koy no ogpalinggaat ka taman to ogkahilutuan noy sikoikow to nati no kambing.”
16 Nigtabak ka diwata to Magboboot to “Agad ko oghawiran a now to pogpalinggaat, kono a ogkoon to koonon now. Di ko ogkoiniat kow, himu kow to panubad no tutungonon woy itaruwoy now to Magboboot.” (Waro mataga si Manoa no diwata to Magboboot naan ka pig-aukuy rin.)
17 No nig-inso si Manoa to diwata to Magboboot to “Hontow ka ngaran nu, odyow no ogkangaranan ka ko ogkatood ka innangon nu?”
18 Nigtabak sikandin to “Manio to nig-inso kow to ngaran ku? Ko ogdinogon nu ka ngaran ku, ogkabol-boongan nu.c” 19 No nigpurut si Manoa to nati no kambing, duma to igtaruwoy no bogas, woy inpanubad din duon to Magboboot to sagboka no dakol no batu. No nighimu ka Magboboot to ogko-in-inuan duon to pogpitow ni Manoa woy to asawa rin: 20 Tagood to niglogdog ka hapuy to tubaranan pohondio to langit, nakawoy ka diwata to Magboboot dio to hapuy. To pogpitow ni Manoa woy to asawa rin to sikan, niglangkob sikandan to tano. 21 To waro niglibong ka diwata to Magboboot ki Manoa woy to asawa rin, nakasabut on si Manoa no diwata to Magboboot naan ka nakita ran. 22 Nigkagi sikandin duon to asawa rin to “Ogkamatoy kid! Hoo, su nakakita ki to Magboboot!” 23 Di nigtabak ka igboi rin to “Ko ogkoiniat ka Magboboot to poghimatoy kanta, waro poron sikandin nigtinawo to panubad no tutungonon woy to panubad no bogas puun to boad ta, woy waro porom sikandin nignangon woy nigpakita to soini tibo kanta.”