8
Ka Ipod ni Gidion
22 Nignangon ka mgo otow to Israil ki Gidion to “Ligkat kuntoon, koikow ka ogboot kanami, iglagkos pad ka anak nu woy ka apu nu, su pigpangabangan koy nu ligkat to boad to mgo otow to Midian.” 23 Di nigtabak si Gidion to “Kono a ogboot kaniu, woy songo kono ogboot ka anak ku kaniu. Ka Magboboot do ka ogboot kaniu.” 24 Woy nigparagas sikandin to “Di, duon sagboka no ogbudyuon ku kaniu, no kara sagboka kaniu ogbogoy kanak to sagboka no arikis puun to baad now to in-agow no mgo kaaglagan.” (Hoo su nig-ungud nig-aarikis to bulawan ka mgo kapunganan ni Ismail.)
25 Nigtabak ka mgo otow to “Ogkarago koy to pogbogoy sikan koikow.” No nigboat sikandan to manggad duon to tano, woy intugdo to kara otow ka sagboka no arikis puun to in-agow rin duon. 26 Mgo 20 no kilu ka kabogati to tibon mgo arikis no inbogoy ran, no waro makalagkos ka mgo in-agow ni Gidion no mgo arikis, mgo baliog woy mgo malaab no mahal no manggad no insau-ub to mgo hari to mgo otow to Midian, woy ka mgo paliog-liog to mgo kamil dan. 27 Piggamit ni Gidion ka bulawan to poghimu to sagboka no ipoda, woy insabuk din to lunsud din no Opra. Pigduad to tibon mgo otow to Israil ka ngaran dan pinabadyo to pogsadyo to sikan no ipod dio, woy nohimu sikan no lit-ag ki Gidion woy to tibon lunggunan din.
28 No, sikan ian no naroog ka Midian to tangkaan to Israil woy waro sikandan nig-onow oghutuk. Tagood to manokal dod si Gidion, warad nigminangadyawoy to tano sood to kohop-atan no tuid. 29 Nig-uli si Gidion no anak ni Yoas (no songo pighingaranan ki Yirub-Baal), woy dio sikandin nig-ugpo. 30 Kapituan ka mgo anak din no lukos, su moon-ing ka mgo asawa rin. 31 Songo duon anak din no lukos pinabadyo to as-asawa rin no nig-ugpo to Sikim. Pighingaranan din sikandin ki Abimilik. 32 Namatoy si Gidion no anak ni Yoas to budyag-budyag on ian sikandin, woy inlobong dan ka lawa rin to lobonganan to amoy rin no si Yoas duon to Opra to tano to mgo kapunganan ni Abiisir. 33 To iam pad namatoy si Gidion, pigduad to mgo otow to Israil ka ngaran dan no nigga-at sikandan to mgo Baal. Pighimu ran no tinuuhan si Baal-Birit woy 34 nalingawan dan ka Magboboot no Igbudyag dan, no ian ka nigpangabang kandan ligkat to tibon mgo usig dan no niglingut kandan. 35 Songo nalingawan dan to pog-otow-otow to marodyow ka lunggunan ni Yirub-Baal (no ian si Gidion) tongod to tibon pighimu ni Gidion tongod kandan.