7
300 Do ka mgo Sundau ni Gidion to Pogmangadyow
1 Masoom pad to pogkapawo, nighondio si Gidion (no pighingaranan ki Yirub-Baal) duma to tibon mgo otow rin woy namos-ok sikandan to mgo tukbung dan marani to sobsob to Harod. Duon ka pig-ugpaan to mgo otow to Midian to amihananadan dio to aug no marani to bubungan to Mori. 2 Nignangon ka Magboboot ki Gidion to “Marasig do ka mgo otow nu odyow no igbogoy ku ka Midian duon to boad nu. Odyow no kono ogpaka-parakol-dakol ka Israil no ognangon no pigpangabangan sikandan pinabadyo to kandan do no kabogbogan, 3 nangon ka to mgo otow to ‘Agad hontow kaniu no nangolkol to kahallok, ogpaka-uli on no og-ongkod to Bubungan to Gilaad.’” No sikan ian no nighipanow ka 22,000 no mgo otow, woy 10,000 ro ka nagaat. 4 Di nignangon ka Magboboot ki Gidion to “Agad pad kuntoon, moon-ing dod sikandan. Aapa nu sikandan duon to woig, woy ogbaaron ku sikandan koikow dio. Ko ognangon a to ‘Ogduma soini koikow,’ ogduma ian sikandin; di ko ognangon a to ‘Kono ogduma soini koikow,’ kono ian ogduma sikandin.”
5 No sikan ian pig-aap ni Gidion ka mgo otow rin duon to woig. Nignangon ka Magboboot kandin dio to “Baara nu ka ogmandilo to woig iing to asu, woy ka ogmanluhud odyow to pog-inom.” 6 Tatou no gatus ka nigmandilo to woig ligkat to mgo boad dan. Ka tibon mgo duma nigluhud odyow to pog-inom. 7 Nigkagi ka Magboboot ki Gidion to “Pinabadyo to tatou no gatus no otow no nigmandilo to woig ogpangabangan ku sikaniu, woy igbogoy ku ka mgo otow to Midian duon to mgo boad nu. Po-ulia nu ka mgo duma, kara sagboka to ugpaan din.” 8 No, pigpohipanow ni Gidion ka duma no otow to Israil no og-uli to mgo tukbung dan, woy ka tatou no gatus do ka nagaat kandin. Natagtuun on to tatou no gatus ka mgo koonon woy mgo budyung to mgo duma. No kuntoon, duon ka pig-ugpaan to mgo otow to Midian dio to diddiraom ni Gidion dio to aug. 9 To sikan no maukilom, nignangon ka Magboboot ki Gidion to “Onow ka. Tupang ka no og-atu ka to pig-ugpaan dan, su igbogoy ku sikan duon to mgo boad nu. 10 Ko ogkahallok ka to poglusud kandan, logsad ka duon to ugpaan dan duma to suguonon nu no si Pura 11 woy pamminog ka to mgo kinagian dan. Takas to sikan ogkabaghot ka to poglusud to ugpaan dan.” No sikan ian nigtupang si Gidion duma ki Pura no suguonon din pohondio to ngilaman to mgo usig dan. 12 Naka-ugpo to aug ka mgo otow to Midian, to Amalik woy to mgo duma pad no mgo koot-otawan to ogsilaan, no nalibuung sikandan iing to mgo taangas. Kono ogkasool ka mgo kamil dan unawa to kono ogkasool ka badyokbok to ilis to dagat. 13 To poglopow ni Gidion duon sagboka no otow no nignangon to natagoinop din duon to aukoy rin. Kagi rin to “Nakatagoinop a no duon sagboka no malibuson no pan no pighimu to sibada no naliid pohondii to pig-ugpaan to mgo matig Midian. Pigdo-ogan ka sagboka no tukbung, woy tongod to kaagbot to pogdo-og din, napood woy nagugus ka tukbung.” 14 Nigtabak ka aukoy rin to “Kono ogkaligal no soini ka kampilan ni Gidion no anak ni Yoas no otow to Israil. Pigpaugutan to Magboboot no ogkaroog ni Gidion ka tibon mgo otow to Midian woy ka tibon ugpaan to mgo otow kai.” 15 To pogkarinog ni Gidion to tagoinop woy to hokad to sikan, pigsadyo din ka Magboboot. Niglibong sikandin to pig-ugpaan to mgo otow to Israil, woy nigbabansagon sikandin to “Onow kow! Inbogoy on to Magboboot ka pig-ugpaan to mgo matig Midian duon to mgo boad now.” 16 Pigbaad din ka tatou no gatus no otow rin to tatou no puntuk. Pigbogadyan din sikandan to mgo budyung woy mgo kuron no duon mgo ilaw to sood. 17 Kagi rin to “Pitow kow kanak. Unug kow to oghimuon ku. Ko oglopow a to ilis to pig-ugpaan dan, ko nokoy ka oghimuon ku, sikan dod ian ka oghimuon now. 18 Ko ogparagingon ku ka budyung ku duma to tibon puntuk no ogludyud kanak, songo ogparagingon now ka kaniu no mgo budyung no linguti now ka pig-ugpaan dan, woy ogbabansagon kow to ‘Tongod to Magboboot woy tongod ki Gidion.’”
19 Niglopow si Gidion woy ka songo gatus no otow no duma rin dio to ilis to pig-ugpaan to mgo usig to taliwaro to kaukiloman to iam pad nasoipan ka mgo otow no nigngilam. Pigparaging dan ka mgo budyung woy piggopang dan ka mgo kuron no duon to mgo boad dan. 20 Pigparaging to tatou no puntuk ka mgo budyung dan, woy piggopang dan ka mgo kuron dan. Pigpamurut dan ka mgo ilaw to gibang no mgo boad dan, woy piggon-gonan dan ka mgo budyung dan duon to kawanan no mgo boad dan, woy nigbabansagon sikandan to “Ka kampilan to Magboboot woy ni Gidion!” 21 Tagood to nigsasindog do ka kara sagboka kandan to pig-ay-adyaran din, nigpallaguy ka mgo otow to Midian no nig-ngangang tagood to nigpanlaguy sikandan. 22 To pogdaging to tatou no gatus no budyung, pigsasow to Magboboot ka tibon mgo otow to pig-ugpaan dan odyow no ogmatig-tigbasoy sikandan. Nigpanlaguy ka tibon mgo sundau to Bit-Sitta pohondio to Sirira taman to oatan to Abil-Mihola marani to Tabat. 23 Nohinggat ka mgo otow to Israil no mgo kapunganan ni Naptali, ni Asir woy ni Manasi, woy piggapon dan ka mgo otow to Midian. 24 Nigpa-aap si Gidion to mgo taagnangon dio to tibon kabubunganan to Ipraim no kagi “Logsad kow no og-atu kow to mgo otow to Midian. Atangi now ka mgo talipaganan to Jordan no woig taman to Bit-Bara.” No sikan ian no nohinggat ka tibon mgo otow to Ipraim woy pig-atangan dan ka mgo talipaganan to Jordan no woig taman to Bit-Bara. 25 Songo narakop dan ka daruwa no mgo igbudyag to mgo otow to Midian no ian si Orib woy si Siib. Pighimatadyan dan si Orib dio to ‘Batu ni Orib’ woy pighimatadyan dan si Siib dio to ‘Pogo-anan to binu ni Siib’. Piggapon dan ka mgo otow to Midian, woy pig-aap dan ka mgo uu ni Orib woy ni Siib duon ki Gidion no duon to ilis to Jordan no woig.