6
Si Gidion
1 Nighutuk man do nakasao ka mgo otow to Israil duon to pogpitow to Magboboot. Woy tongod to sikan, pigpaugutan to Magboboot no inloig-loig sikandan to mgo otow to Midian sood to papitu no tuid. 2 Tongod to kabogbogan to mgo otow to Midian no nig-uang-uang kandan, nigpipinadyag ka mgo otow to Israil dio to mgo tingkob, mgo pilang, woy mgo ilian. 3 To kara og-orok ka mgo otow to Israil, ogmanlopow ka mgo otow to Midian, to Amalik woy to duma pad no mgo koot-otawan puun to ogsilaan. 4 Namos-ok sikandan to mgo tukbung dan duon to mgo kamot no pigdaat dan ka mgo ogga-anion taman to Gasa. Waro adyam no ingaat dan to mgo otow to Israil, agad ko karniru, baka woy ko asnu. 5 Niglopow sikandan duma to mgo adyam dan woy mgo tukbung dan iing to mgo taangas no nalibuung. Kono ian ogkasool ka mgo otow ran woy mgo kamiladan. Piglusuran dan ka tano odyow to pogpang-agow to tibo. 6 Nawaraan lagboy ka mgo otow to Israil to mgo otow to Midian, woy tongod to sikan nigpangiak sikandan duon to Magboboot odyow no ogbuligan poron sikandan. 7 To pog-umow to mgo otow to Israil duon to Magboboot tongod to Midian, 8 nigpa-aap sikandin kandan to taagtagna no nignangon to “Soini ian ka kinagian to Magboboot no Igbudyag to Israil: pig-aap ku sikaniu ligkat to Ehiptu, ligkat to pogko-uripon now dio. 9 Pighawi ku sikaniu ligkat to kabogbogan to Ehiptu, woy ligkat to boad to tibon mgo otow no nig-uang-uang kaniu. Pigdogil ku sikandan to tangkaan now woy inbogoy ku kaniu ka tano dan. 10 Pignangonan ku sikaniu to ‘Sikoddi ka Magboboot no Igbudyag now; dokow ogsadyo to mgo tinuuhan to mgo kapunganan ni Amor no ian tagtuun nokani to tano no pig-ugpaan now.’ Di waro kow nigpannalinga kanak.”
11 Niglogsad ka diwata to Magboboot woy nigpinnuu sikandin dio to Opra diraom to dakol no kadyu no ian tagtuun si Yoas no kapunganan ni Abiisir. Duon ka anak ni Yoas no si Gidion no nighoos-hoos to poggigiok to trigu dio to pogo-anan to binu, odyow no kono ogkitoon to mgo otow to Midian. 12 To poglopow to diwata to Magboboot duon ki Gidion nigkagi sikandin to “Mabogbog no bagani, pigdumaan ka to Magboboot.” 13 Nigtabak si Gidion to “Di, Anggam, ko pigdumaan koy to Magboboot, manio to piglopowan koy to soini tibon mgo ingkabaybadyari noy? Hondoid on ka tibon mgo ogko-in-inuan din no innangon to mgo kabuybudyagan noy to pogkagi ran to ‘Pig-aap koy to Magboboot ligkat to Ehiptu.’ Di, kuntoon pig-ongkoran koy to Magboboot woy inbogoy koy on duon to boad to mgo matig Midian.”
14 Nigpitow ka Magboboot kandin woy nigkagi to “Hondio ka pinabadyo to dadyagang no duon to koikow, woy pangabangi nu ka Israil ligkat to boad to mgo matig Midian, hoo, su koddi ka ogpa-aap koikow.”
15 Nig-inso si Gidion to “Di ogmonuon ku, Igbudyag ku, to pogpangabang to Israil? To tibon mgo kapunganan ni Manasi, waro lunggunan no maotoy pad to lunggunan to amoy ku, woy to lunggunan ku waro maintok pad to koddi.”
16 Nigtabak ka Magboboot to “Ogdumaan ku sikoikow, woy ogpokogdungan ogkaroog nu ka tibon mgo otow to Midian.”
17 Nigtabak si Gidion to “Ko maugot no narodyowan ka to pogpitow nu kanak, bogadyi a to tuus no ian-ian sikoikow ka nigkagi kanak. 18 Doka pa bag og-awo taman to poglibong ku no duon igbogoy no igtaruwoy ku koikow.” Woy nigkagi ka Magboboot to “Ogtagaran ku ka poglibong nu.” 19 Nigsood si Gidion to baoy, woy pighilutu din ka sagboka no nati no kambing, woy songo pighilutu din ka pan no waro igpatulin to songo gantang no harina. Pigsabuk din ka sapu duon to sagboka no sandadyo, woy pigsabuk din ka sabow to kuron, woy pig-aap din sikan no intaruwoy rin to diwata dio to diraom to kadyu. 20 Nigkagi ka diwata to Magboboot kandin to “Puruta nu ka sapu woy ka pan no waro igpatulin, woy isabuk nu to soini no dakol no batu, woy bus-uga nu ka sabow.” Woy pighimu ni Gidion. 21 Pigtinduk to diwata to Magboboot ka sapu woy ka pan pinabadyo to koopusan to tukod din. Niglogdog ka hapuy puun to batu no nasilaban ka sapu woy ka pan. Woy nahaglong ka diwata to Magboboot.
22 To pogkasabut ni Gidion no diwata to Magboboot naan ka nakita rin, nigkagi sikandin to “Magboboot no mabogbog to tibo! Nakakita a to langlanguan to diwata to Magboboot!” 23 Di nigkagi ka Magboboot kandin to “Mahanong! Doka'g kasasow. Kono ka ogkamatoy.” 24 No nighimu si Gidion to tubaranan to Magboboot, woy pighingaranan din to ‘Mahanong ka Magboboot.’ Nigpalinggaat sikan dio to Opra to tano to mgo kapunganan ni Abiisir taman to kuntoon no allowb.
25 To sikan dod no maukilom, nigkagi ka Magboboot ki Gidion to “Purut ka to igkorangob no lukosan no baka ligkat to mgo adyam to amoy nu, ian ka baka no papitu on no tuid ka kabudyagi rin. Gugusa nu ka tubaranan to amoy nu tongod ki Baal, woy poora nu ka suwoy tongod ki Asira no nigtopad to sikan. 26 No, himu ka to litos no tubaranan tongod to Magboboot no Igbudyag nu dio to ampow to sikan no bub-bubungan. Guadya nu ka kadyu to suwoy ni Asira no pigpood nu no igtomog nu, woy itaruwoy nu ka igkorangob no baka no ogtutungon nu to tubaranan.” 27 No nig-aam si Gidion to sampuu no mgo suguonon din, woy pig-aap din to poghimu to tibo no innangon to Magboboot. Di tongod su nahallok sikandin to mgo karumahan din woy to mgo otow to lunsud, pighimu rin to maukilom woy konon to ma-allow. 28 To pogkapawo, nig-onow ka mgo otow to lunsud, woy duon naan ka tubaranan ni Baal no nagugus on, woy ka suwoy ni Asira no napood on, woy songo duon ka igkorangob no baka no intubad on dio to iam pad no tubaranan! 29 Nigma-in-insooy sikandan to “Hontow ka nighimu to soini?” To pogtagataga ran lagboy pignangonan sikandan to “Si Gidion no anak ni Yoas ian ka nighimu to soini.” 30 Nighondio ka mgo otow to lunsud ki Yoas no nigsugu to “Palibuwasa nu ka anak nu. Oghimatadyan tad sikandin su piggugus din ka tubaranan ni Baal woy pigpood din ka suwoy ni Asira no topad to sikan.” 31 Di nigtabak si Yoas duon to nabou no mgo otow no niglingut kandin to “Kaniu buwa ka og-oog ki Baal no ogpangabangan now sikandin? Ko hontow ka og-ogot tongod kandin ogpohimatadyan to kono pad ogkapawo! Ko maugot no tinuuhan si Baal, sikandin ka og-atu to otow no oggugus to tubaranan din!” 32 To sikan no allow pighingaranan dan si Gidion ki ‘Yirub-Baal’csu nignangon sikandan to “Si Baal ka og-atu kandin” su piggugus din ka tubaranan ni Baal.
33 No kuntoon, nasagboka ka tibon mgo otow to Midian, to Amalik woy to duma pad no mgo koot-otawan to ogsilaan. Nigtalipag sikandan tibo to Jordan no woig, woy namos-ok sikandan to mgo tukbung dan to aug to Yitsriil. 34 No piglona-an si Gidion to Gimukud to Magboboot, woy pigparaging din ka budyung to pog-umow to mgo kapunganan ni Abiisir to pogsundul kandin. 35 Nigpa-aap sikandin to mgo taagnangon dio to tibon mgo kapunganan ni Manasi, woy dio pad to mgo kapunganan ni Asir, ni Sibulun woy ni Naptali, odyow no ogkalimud sikandan tibo no og-aap to mgo panganiban dan. 36 Nigkagi si Gidion duon to Magboboot to “Ko ogpangabangan nu ka Israil pinabadyo to boad ku unawa to inpangulibot nu; 37 pitow ka, isabuk ku ka soini no bulbuon no laplap to karniru duon to soog to giokanan. Ko ka laplap do ka ogkadom-hugan woy mammara pad ka tano no niglingut to sikan, ogkataga a no ogpangabangan nu ka Israil pinabadyo to boad ku, unawa to innangon nu.” 38 Woy sikan ian ka niglopow. Nigsoom-soom nig-onow si Gidion to pogkapawo; piggulibid din ka bulbuon no laplap, woy songo lipung no woig to domhug ian ka nagulibid din. 39 No, nigkagi si Gidion dio to Magboboot to “Kono ka porom ogkabou kanak. Pauguti a nu ro bag to pogbudyu koikow to kasagboka pad. Sagboka pad ka ig-ol-oog ku to laplap. Soini no maukilom himua nu no ogkammara ka laplap, di ka tano do no oglingut to sikan ka ogkadom-hugan.” 40 To sikan no maukilom, sikan ian ka pighimu to Magboboot. Ka bulbuon no laplap naan do ka nammara, woy nasubid to domhug ka tibon tano no nakalingut to sikan.