Hkrisidùq Gi, Ngá-nhúng Lé Garúm Sû
2
Ngò chyitdàp é zo wuî ê,
ngò gi,
núngmòq mara a kut shut kó sháng gàq nghû,
núngmòq lé shí hkyô ká byî kat lhê.
Nghut kôlhang,
rayùq yùq mara kut shut é nghut le gi,
ngá-nhûng é matú haû Îwâ chyáng bo taî xoq byî é,
Yesuq Hkrisidùq gâ é Díngmán Sû lé,
ngá-nhúng wó lhê.
2 Yhang gi,
ngá-nhûng é yubàk marâ é matú,
shîhtaí gùnglik hkungga nghut nyi ri.
Ngá-nhûng é yubàk marâ é matú baú za a nghut,
mingkan gón mâ é byu pê é yubàk marâ é matú le nghut nyi ri.
3 Ngá-nhúng gi,
Yhang hkyô tô é hkunmó pé lé châng kut é nghut jáng,
Yhang lé ngá-nhúng rago sé bê nghut é hkyô lé,
wó sé bê nghut ri.
4 Byù rayùq yùq mai,
“Ngò gi,
Yhang lé rago sê lhê.”
ga taí kôlhang,
Yhang hkyô tô é hkunmó lé a châng kut é nghut jáng,
haú yùq gi,
byù mhaú nghut luî,
tengmán hkyô gi,
yhang má a bò nghut ri.
5 Ó yùq nghut kôlhang,
Garai Gasâng é mungdang lé châng kut nyi é nghut jáng,
Yhang lé chyitdàp é myìt gi,
haú yùq má gè gè byíng jùp bê nghut ri.
6 Yhang má chyungxe dui nyi lhê ga taî é sû ó yùq nghut kôlhang,
Yesuq kut bê eq rajung za,
châng kut râ lhê.
Haú hkûn shèq,
ngá-nhúng gi,
Yhang má nghut nyì bê hkyô lé,
wó sê lhê.
Hkunmó Asik
7 Chyitdàp é luzúm wuî ê,
ngò gi,
núngmòq lé hkunmó asik ká byî kat é a nghut é za,
haû sânghi mai núngmòq wó to bê hkunmó axau shèq ru nghut lhê.
Hkunmó axau shî gi,
núngmòq wó gyô wú bê mungdang nghut nyi ri.
8 Nghut kôlhang,
ngò gi,
núngmòq lé hkunmó asik ká byî kat lhê;
hau é tengmán hkyô lé,
Yhang má le,
núngmòq má le,
byu myang ri;
hkâsu mù gâ le,
haû mauchut gi,
laî ló byùq luî,
haû tengmán é maubó gi,
dùq nyì gù bê nghut ri.
9 Ngò gi,
maubó hkaû má nghut nyi lhê ga luî,
yhûmsing é gu-mang lé a naù a wôm é sû ó yùq nghut kôlhang,
haû mauchut hkaû má ru nghut nyi ashî.
10 Yhûmsing é gu-mang lé chyitdàp é sû ó yùq nghut kôlhang,
haû maubó má chyungxe dui nyi é nghut mù luî,
yhang má myìt lèqbàt nhâng râ hkyô haî le a bò nghut ri.
11 Nghut kôlhang,
yhûmsing é gu-mang lé a naù a wôm é sû kúm gi,
haû mauchut hkaû má nghut nyî luî,
haú má sô lhing jón wún ri;
haû mauchut gi,
yhang lé myòq lhoqchit to byî é yánmai,
yhang gi,
hká shut e ló nyi é hkyô lé a sé nghut ri.
12 Chyitdàp é zo wuî ê,
Yhâng mying é yánmai,
núngmòq é mara pé hkyut pyám byi hui bekô nghut luî,
núngmòq lé ngò kâ kat é nghut lhê.
13 Îwâ pé ê,
núngmòq gi,
haû sânghi mai nyi é Sû lé sé bekô nghut é yánmai,
núngmòq lé ngò kâ kat é nghut lhê.
Zorâm wuì ê,
núngmòq gi,
haû agè ashop sû lé ung pyám bekô nghut é yánmai,
núngmòq lé ngò kâ kat é nghut lhê.
Chyitdàp é zo wuî ê,
núngmòq gi,
haû Îwa lé sé bekô nghut é yánmai,
núngmòq lé ngò kâ kat é nghut lhê.
14 Îwâ pé ê,
núngmòq gi,
haû sânghi mai nyi é sû lé sé bekô nghut é yánmai,
núngmòq lé ngò kâ kat é nghut lhê.
Zorâm wuì ê,
núngmòq gi,
wum-o bo é eq,
haû Garai Gasâng é mungdang núngmòq chyáng dui nyi é nghut mù,
haû agè ashop sû lé ung pyám bekô nghut é yánmai,
núngmòq lé ngò kâ kat é nghut lhê.
Mingkan Lé A Chyitdàp Râ Hkyô
15 Mingkan eq mingkan htoq mâ é haî le lé,
hkâ chyitdàp kó.
Byù rayùq yùq,
mingkan lé chyitdàp é nghut le gi,
haû Îwa lé chyitdàp é myìt,
yhâng chyáng a bò nghut ri.
16 Hkâsu mù gâ le,
mingkan htoq má jòq é lhúnglháng gi,
gùngsho yùt yùt ô nau é hkyô,
myòqjí yùt yùt ô nau é hkyô,
yhûmsîng wó é eq kut é lé nghutbûn é hkyô pé chyat nghut ri.
Haû gi,
Îwâ chyáng mai htoq lo é a nghut,
haû mingkan mai htoq lo é ru nghut lhê.
17 Mingkan eq mingkan ô naù hkyô pé gi,
laî ló byùq râ nghut lhê;
nghut kôlhang,
haû Garai Gasang ô nau é hkyô lé kut é sû gi,
ahtum abyùq dui nyì râ nghut lhê.
Hkrisidùq É Gye Pé
18 Chyitdàp é zo wuî ê,
shî gi,
ló htâng é ahkyíng nghut bê;
haû anti-hkrisidùq a gi,
lé lo nyi ri gâ é lé,
núngmòq wó gyô wú bê eq rajung za,
ahkuî lháng,
anti-hkrisidùq myo myo gi,
jé lé bekô nghut ri.
Hau é yánmai,
ngá-nhúng gi,
ló htâng é ahkyíng nghut bê hkyô lé wó sé bê nghut ri.
19 Yhángmòq gi,
ngá-nhûng é hpúng mai htoq ló byùq bê bang nghut kôle,
gè gè ga jang,
ngá-nhúng eq a sêng é bang nghut akô.
Hkâsu mù gâ le,
ngá-nhúng eq sêng é nghut jáng,
yhángmòq gi,
ngá-nhúng eq nyi to râ nghut lhê,
nghut kôlhang,
yhángmòq htoq ló byùq bekô nghut é yánmai,
yhángmòq rayùq lháng ngá-nhúng eq a sêng é hkyô lé tûn shit bê nghut ri.
20 Nghut kôlhang,
núngmòq gi,
haû Chyoiyúng Sû mai xû bùt byî é huib bekô nghut mù luî,
núngmòq bànshoq bang haû tengmán hkyô lé sê akô nghut ri.
21 Haû tengmán hkyô lé núngmòq a sé kôluî,
núngmòq lé ngò kâ kat é a nghut;
haú hkyô lé núngmòq sé gù nghut luî le,
haû mhaû é hkyô gi,
tengmán hkyô mai lo é a nghut é lé núngmòq sé gû nghut luî le,
núngmòq lé ngò kâ kat é nghut lhê.
22 Mhaû é sû gi,
ó yùq nghut lhê lhú?
Haû Yesuq gi,
Hkrisidùq a nghut ga he pyâm é sû nghut ri.
Haû Îwa eq Yhang zo lé he-ngìk é sû gi,
anti-hkrisidùq yhang nghut nyi ri.
23 Haû Yhang zo lé he-ngìk sû ó yùq nghut kôle,
haû Îwa lé sé sû a nghut.
Haû Yhang zo lé hàp yu é sû kúm gi,
haû Îwa lé le sé bê sû nghut lhê.
24 Haû sânghi mai núngmòq wó gyô wú bê é hkyô pé lé,
núngmòq i‑myìt má ru bo nyì keq.
Haû nghut jáng,
núngmòq gi,
haû Yhang zo eq Îwâ chyáng nyi nyì râ nghut lhê.
25 Haû gi,
ngá-nhúng lé Yhang byî tô é ahtum abyùq é chyungxe wó yû râ ga danghtum htûm tô é nghut ri.
26 Ngò gi,
núngmòq lé hkyô shuî nghoq shi-kùt nyì bâng é hkyô eq séng luî,
núngmòq lé shí gû kâ kat é nghut lhê.
27 Núngmòq chyáng kúm gi,
Yhâng chyáng mai xû but jeju lé núngmòq wó yù bekô nghut mù luî,
mhoqshit râ góyùq a ra lo nghut ri.
Nghut kôlhang,
haû Yhâng é xû but jeju gi,
hkyô hkangmó má núngmòq lé mhoqshit byi mù,
haû gi,
tengmán nyi é nghut luî,
mhaû é hkyô haî le a bo é za,
núngmòq lé mhoqshit byî nyi é eq rajung za,
Yhâng chyáng núngmòq nyi nyî keq.
28 Chyitdàp é zo wuì ê,
ngá-nhúng gi,
Yhang jé lé mù htoq shit é hkûn,
Yhâng é hí má a gyùq a kyum é,
hoq a hpû é,
wó dùt râ matú Yhâng chyáng rû nyi nyì keq.
29 Yhang gi,
díngmán sû nghut é lé,
núngmòq sé bê yánmai,
díngmán hkyô lé kut é sû ó yùq nghut kôle,
Garai Gasang mai hku kat é sû nghut é hkyô lé,
núngmòq sê akô nghut ri.