PETIRUQ
Htang Dàm Hun Kat é Laiká
(2 Peter)
1
Yesuq Hkrisidùq é duìnhâng zoshâng eq lagyo nghut sû, ngò Simun Petiruq gi, ngá-nhûng é Garai Gasang eq hkyi yù Sû nghut é Yesuq Hkrisidùq é díngmán hkyô dông, ngá-mòq su, hpaû dik é lùmjíng hkyô lé hàp yù bê bâng chyáng dang kyô kat lhê.2 Garai Gasang eq ngá-nhûng é Yhûmsîng Yesuq lé, núngmòq sê jàt nyi é hkyô má, jeju eq nguì ngón hkyô gi, núngmòq chyáng agùn agó jòq nyì sháng gàq ô!
Ji Yu É Eq Hkyin Yu É Hkyô Lé Lhoqging Lhoqtíng Râ Hkyô
3 Yhâng é hpungwup shingkang eq ge é hkyô dông ngá-nhúng lé ji yù Sû lé ngá-nhúng sê é dông mai, Garai Gasâng é hpungwup a-tsam gi, chyungxe duì hkyô eq târâ hkúngga hkyo é matú ngá-nhúng râ é jung hkangmó lé byi bê nghut ri. 4 Haú pé dông mai, Yhang gi, Yhang htûm tô é, kô dik, hpaû dik é danghtum pé lé, ngá-nhúng lé byi bê nghut ri; haú hkûn, núngmòq gi, danghtum htûm tô é haú pé dông mai, Garaî é myìt sâmlai lé wó bo hkam yù râ eq agè ashop hkyô lé yùt yùt ô nau é yánmai htoq lo é, mingkan má jòq é htên byòq hkyô mai wó lùt kôrâ nghut lhê.
5 Hau é yánmai yhang, núngmòq gyai yhang shi-kùt luî, núngmòq é lùmjíng hkyô má ge é hkyô lé jàt yù keq; ge é hkyô má sumsé hpàqchyî lé, 6 sumsé hpàqchyî má yhûmsing gùng yhûmsîng hkang é hkyô lé, yhûmsing gùng yhûmsîng hkang é hkyô má jân shirang é hkyô lé, jân shirang é hkyô má târâ hkúnggâ é hkyô lé, 7 târâ hkúnggâ é hkyô má gu-mang chyitkâng myìt lé, gu-mang chyitkâng myìt má chyitdàp myìt lé, jàt yù keq. 8 Hkâsu mù gâ le, hau pé lé núngmòq wó sing myô jàt lo é nghut jáng, hau pé gi, ngá-nhûng é Yhûmsîng Yesuq Hkrisidùq lé núngmòq sê é hkyô má, núngmòq lé akôm a dùt nhang é htoq agó, ashi a zui le dùt nhâng râ a nghut. 9 Nghut kôlhang, rayùq yùq gi, haú pé lé a wó é nghut jáng, chyâng é lé za myang é eq myòqjìt é sû nghut luî, laî lò bê yhâng é yubàk mara pé mai lhoq sanséng byî é hui bê hkyô lé, tô-myhî pyám bê sû nghut ri.
10 Haû mù luî, ngá é gu-mang wuì ê, núngmòq lé ji yu é hkyô eq hkyin yu é hkyô lé, je riyhang lhoq gingtîng nyì keq. Hkâsu mù gâ le, haú hkyô pé lé núngmòq kut nyi é nghut jáng, hkâ-nhám le núngmòq myìt lèqbàt kôrâ a nghut; 11 hau htoq agó, ngá-nhûng é Yhûmsîng eq hkyi yù Sû nghut é Yesuq Hkrisidùq é ahtum abyùq é mîngdán má agùn agó lhom pang yu é lé, núngmòq myang hàp yù kôrâ nghut lhê.
Chyúmdang Mâ É Myìqhtoi Dang
12 Haû mù luî, núngmòq gi, haú pé lé sé kô é htoq agó, núngmòq wó tô é tengmán hkyô má gingtîng nyì kô é nghut kôlhang, ngò, núngmòq lé hkâ-nhám le hau pé lé ru lhoqpûn nyì râ nghut lhê. 13 Shî gùngdu má ngò rû dui nyì nyì gi, núngmòq lé lhoqpûn kying byî le ge ri nghû, ngò wó myìt ri; 14 haî mù gâ le, ngá-nhûng é Yhûmsîng Yesuq Hkrisidùq gi, ngo lé san za sé nhâng bê eq rajung za, hkâ-myháng a myáng má, ngò gi, gùngdu shî lé tô pyâm to râ nghut é lé sê lhê. 15 Ngò htoq ló byùq é htâng má, núngmòq, hkâ-nhám le haú pé lé ru wó bûn nyì râ lé myàng naù mù, ngò, wó dùt é í shi-kùt nyì râ nghut lhê.
16 Ngá-nhûng é Yhûmsîng Yesuq Hkrisidùq é a-tsam eq lé lo é hkyô eq séng luî, núngmòq lé ngá-mòq taî kyô wú é hkûn, ngá-mòq gi, kut htoq yu é labyoq mhô-myi lé a châng é za, Yhâng é kô làm hkìkhkâm hkyô lé myòq èq myang é sàksé pé nghut lhê. 17 Hkâsu mù gâ le, haû Kô Làm Hkìkhkâm Hkyo é Hpungwup Shingkang mai, “Shí yùq gi, Ngò chyitdàp é Ngá zo nghut lhê; Yhang má Ngò nhik dìk nyi lhê.”a ga taî é htê, Yhâng chyáng jé é hkûn, haû Îwa Garai Gasâng chyáng mâ é xânghpoq nge wó hkyô eq hpungwup shingkang lé Yhang wó hàp yù bê nghut ri. 18 Ngá-mòq yhang, chyoiyúng bùm má Yhang eq rahá nyi tô é hkûn, htê haû mauhkûng mai htoq lo é lé wó gyô é nghut lhê.
19 Haû mù luî, myìqhtoi dang lé je lhoqging bê hkyô, ngá-mòq wó é nghut lhê; haû mù, maubó lô luî, núngmòq é myìt má bó‑myhû htoq lo é hkûn jé shoq, mauchut tuq dùt é jowò má dùq nyi é myibung lé su, myìqhtoi dang haú lé, núngmòq gyo mù rago châng kut râ dùt lhê. 20 Bànshoq htoq má, Chyúmdang mâ é myìqhtoi dang gi, haû myìqhtoî pé mai ó le ó lichyúm lhoqhtoq yu é dông a nghut é lé, núngmòq sê to râ dùt lhê. 21 Hkâsu mù gâ le, myìqhtoi dang gi, byù ô nau é dông hkâ-nhám le a htoq wú é za, haû Chyoiyúng So èq shuî u huî é bang mai, Garai Gasâng chyáng mâ é dang taî é ru nghut lhê.