YOHAN
Hî Dàm Hun Kat é Laiká
(1 John)
Chyungxe Mungdang
1
Ngò gi, haû sânghi mai jòq nyì mù, ngá-mòq wó gyô wú, ngá-mòq é myòq èq myang wú, ngá-mòq rago za wú wú, ngá-mòq é lòq eq záng wú bê é, chyungxe mungdang eq sêng é hkyô lé, núngmòq lé taî kyô kat lhê. 2 Chyungxe haû gi, htoq shit bê nghut mù, ngá-mòq gi, haû lé myang wú luî, sàksé hkám bê; haû Îwa eq rahá nyi wú é, ngá-mòq chyáng htoq shit bê nghut é ahtum abyùq é chyungxe haû lé núngmòq lé taî kyô lhê. 3 Ngá-mòq eq zùm yàp é hkyô lé, núngmòq le wó sháng gàq nghû, ngá-mòq gi, myang wú bê eq wó gyô wú bê hkyô lé, núngmòq lé taî kyô lhê. Ngá-mòq gi, haû Îwa eq le, Yhang zo Yesuq Hkrisidùq eq le, zùm yàp nyi é bang nghut lhê. 4 Ngá-mòq é gabú hkyô byíng jùp sháng gàq nghû, ngá-mòq gi, núngmòq lé shí hkyô ká byî kat lhê.Maubó Hkaû Má Sô Nyì Râ Hkyô
5 Garai Gasang gi, maubó nghut lhê; Yhâng chyáng mauchut ra-tsuí lháng a bò nghut ri. Shí hkyô gi, Yhang zô chyáng mai ngá-mòq wó gyô yù luî, núngmòq lé taî kyô é danglù nghut lhê. 6 Ngá-nhúng gi, Yhang eq zùm yàp nyi lhê nghû taí kôlhang, mauchut hkaû má ru sô nyi bum é nghut jáng, ngá-nhúng gi, mhaû é bang dùt mù, haû tengmán hkyô dông chyungxe a dui é bang nghut ri. 7 Nghut kôlhang, Yhang gi, maubó má nghut nyi é eq rajung za, ngá-nhúng le haû maubó má sô nyi é nghut le gi, ngá-nhúng rayùq eq rayùq zùm yàp nyì bê nghut luî, Yhang zo Yesuq é sui gi, ngá-nhûng é mara bànshoq lé lhoq sân-yúng pyám byi râ nghut lhê.
8 Mara a bò nghû ngá-nhúng taî é nghut le gi, yhûmsing gùng yhûmsîng mhaû pyám luî, haû tengmán hkyô gi, ngá-nhûng chyáng a bò nghut ri. 9 Nghut kôlhang, ngá-nhúng gi, yhûmsing é mara lé yín yu é nghut jáng, Yhang gi, wó lum é sû eq tengmán é sû nghut é yánmai, ngá-nhûng é mara lé hkyut pyám byi luî, a díng a mán é hkyô bànshoq mai le, ngá-nhúng lé lhoq sân-yúng byi râ nghut lhê. 10 Ngá-nhúng gi, mara a kut shut nghû taî é nghut jáng, ngá-nhúng mai Yhang lé mhaú sû nghû chyo pyâm é nghut luî, Yhâng é mungdang gi, ngá-nhúng má a bò nghut ri.