Haû Yhûmsîng Jé Lé Râ Buìnyì
3
Chyitdàp é luzúm wuî ê, shî gi, núngmòq lé ngò í dá nghû râ dàm ká byî kat é laiká nghut lhê. Laiká shî í lhum má, núngmòq é sansêng é i‑myìt lé lhoqtoq râ matú taî pûn kat é laiká nghut lhê. 2 Haû gi, chyoiyúng myìqhtoî pé mai laî lò bê hkûn taî tô é dang pé eq, ngá-nhûng é Yhûmsîng eq hkyi yù Sû mai, núngmòq é lagyô pé dông byî to bê nghut é hkunmó lé, ngò, núngmòq lé bun nhâng naù luî nghut lhê.3 Sânghi má, ló htâng é buìnyì pé má yhûmsing é agè ashop ô naù hkyô má cháng luî taî hpoi bang htoq lô râ nghut é lé, núngmòq sê gyô to ra râ nghut lhê. 4 Haú bang gi, “‘Dum jé lé râ’ ga Yhang gidìq byî é gi, hká má lhú? Ngá-nhûng é îchyí îwâ pé gi, shi byùq ló bekô nghut mù, junghkang jungmó gi, mau htoq xâng hkun mai dùt é su roq dùt nyi ri.” ga taí kôrâ nghut lhê. 5 Nghut kôlhang, yhángmòq gi, a‑nham lé, Garai Gasâng é hkunmó mai, mauhkûng pé jòq é eq, myigùng gi, wuì mai dùt htoq nhâng mù, wuì dông hpan tô é hkyô lé, a sé gûn kut pyâm akô nghut ri. 6 Wuì hau èq shèq, haú hkun lhê é mingkan lé dowuî tíng mù, lhoqhtên pyâm é nghut lhê. 7 Ahkui lhê é mauhkûng pé eq myigùng lé gi, târâ a hkúngga bang htên byòq hui râ nghut é, târâ jéyáng é buìnyì jé shoq, myi má nyhé râ matú, hkunmó hau èq Yhang hkong to bê nghut ri.
8 Nghut kôlhang, chyitdàp é luzúm wuî ê, haû Yhûmsing é hí má, ra-nyí gi, zànwut rahkyîng dông, zànwut rahkyîng gi, ra-nyí dông nghut é hkyô shî lé, hkâ tô-myhí kó. 9 Haû Yhûmsîng gi, Yhang danghtum htûm tô é lé hân a lhoqdìk ga byù ra-am myìt ngam pyâm é su, nyhâm é Sû a nghut. Yhang gi, ó yùq le htên byòq byùq râ lé a ô nau é yánmai, yùq hkangmó myìt lhîng râ lé za ô naù mù, núngmòq lé myìt hîng byî nyi é nghut lhê.
10 Nghut kôlhang, haû Yhûmsing é buìnyì gi, hkau sû su a bûn nùng má jé râ nghut lhê. Haú buìnyì má, mauhkûng pé gi, mying hum htê eq byùq byùq râ nghut lhê; dùq bó gûng pé gi, myî èq lhoqhtên pyâm é hui luî, myigùng eq haú mâ é jòq mîjòq gi, nyé gyó byùq râ nghut lhê.
11-12 Jòq mîjòq gi, haú hkyô dông lhoqhtên pyâm é hui râ nghut é yánmai, núngmòq gi, hkâsû é byu pé dùt ra râ lhú? Núngmòq gi, haû Garai Gasâng é buìnyì lé ho nyi é eq buìnyì haû hân za jé râ lé ô nau nyi é hkûn, chyoiyúng é eq târâ hkúnggâ é chyungxe duì hkyô dông nyì ra râ nghut lhê. Buìnyì haû gi, mauhkûng pé lé, myî èq lhoqhtên pyám luî, dùq bó gûng pé le, lûm nyé luî, nyé yui pyâm é buìnyì dùt râ nghut lhê. 13 Nghut kôlhang, ngá-nhúng gi, Garai danghtum htûm tô é, díngmán hkyô é yhûm, mauhkûng asik eq myigùng asik lé, myòqbyu nyi é bang nghut lhê.
14 Haû nghut mù luî, chyitdàp é luzúm wuî ê, núngmòq gi, haú hkyô lé myòqbyu é bang nghut kô é yánmai, Yhâng é hí má achaq achyut a dùt é eq mara hûn râ hkyô a bo é za, Yhang eq nguì ngón nyî râ hkyô lé gyai yhang shi-kùt nyì keq. 15 Ngá-nhûng é chyitdàp gu-mang Poluq gi, yhang lé, Garai Gasang byî tô é hpàqchyî byéng-yá èq, núngmòq chyáng ká byi bê eq rajung za, ngá-nhûng é Yhûmsing é myìt hîng hkyô gi, hkyi yù hkyô nghut é lé xûm yu to keq. 16 Poluq gi, yhang kâ é laiká pé bànshoq má, haú hkyô pé eq séng luî rajung za kâ shit tô ri. Yhâng é laiká hkaû pé má, ra-am gi, sê gyo wuî é hkyô pé bo é yánmai, a mhoq wú é bang eq a gingtîng é bang gi, gótû Chyúmdang pé lé lichyúm htaî lhik pyám kô é su, yhángmòq lichyúm htaî lhik pyám kômù, yhûmsîng htên byòq hkyô kut yu nyi akô nghut ri.
17 Haû mù luî, chyitdàp é luzúm wuî ê, núngmòq gi, shí hkyô lé sê to gù nghut é yánmai, târâ a chûng bâng é shut shaî hkyo èq núngmòq lé a wó shuî nghoq yû râ eq, núngmòq é gaû é jowò mai a wó byìt gyó byùq sháng gàq, yhûmsing gùng yhûmsîng ùpzúng nyî keq. 18 Ngá-nhûng é Yhûmsîng eq hkyi yù Sû nghut é Yesuq Hkrisidùq é jeju eq hpàqchyî hkyô má, núngmòq kô myhang lò kó sháng gàq. Hpungwup shingkang gi, Yesuq Hkrisidùq chyáng, ahkuî le, ahtum abyùq le, ru joq nyî sháng gàq ô! Amen.