Sará A-pyoq Pê É Hkyô
2
Nghut kôlhang, myìqhtoi pyoq pé gi, Isira-elaq byù haú bâng é ahkaû má nyi wú bê nghut lhê; haû eq rajung za, núngmòq é ahkaû má le sará a-pyoq pé nyì râ za nghut lhê. Yhángmòq gi, htên byòq hkyô nghut é byòq gang râ mhoqshit hkyô pé lé, haq lhoqpyo é htoq agó, yhángmòq lé wui yu é, Yhûmsîng lé lháng he-ngìk pyám kôrâ nghut lhê. Haû mù, yhángmòq gi, yhûmsing gùng yhûmsîng byò dàn tung htên byòq hkyô jé nhâng bekô râ nghut lhê. 2 Byù myo myo gi, haú bâng é ahoq ahî hkyô má cháng kôrâ eq tengmán hkyô lé taî hpoî pyám nhâng kôrâ nghut lhê. 3 Sará a-pyoq haú bang gi, yhángmòq myòqnòq é hkyô má, yhángmòq kut htoq tô é mhô-myi dông núngmòq lé mhaú zo kôrâ nghut lhê. Yhángmòq lé mara dam byi hkyô gi, góhkûn mai yhángmòq ahtoq má lhâng to gù bê nghut é htoq agó, yhángmòq é htên byòq hkyô gi, yhup myhî tô nyi é a nghut.4 Hkâsu mù gâ le, Garai Gasang gi, mara kut shut é maumang lagyô pé lé lháng a ha bûn é za, ngaraî ming má hkyô pyám luî, târâ jéyáng é hui râ hkûn jé shoq, yhángmòq lé tuq tuq chut é dong hkaû má kat tô é nghut lhê. 5 Yhang gi, târâ a hkúnggâ é byu pé lé dowuî tîng é hkûn, góhkun lhê é mingkan lé a ha bun nghut ri; nghut kôlhang, díngmán é hkyô lé hko kyô é sû No-aq eq gótû nyhit yùq lé hung yu é nghut ri; 6 Yhang gi, Sodom eq Gomora wà mó lé, myi-mhop dùt shoq nyhê hkyô pyâm é dông mara dam byi luî, târâ a hkúngga bâng chyáng dùt lò râ hkyo é azòng kut tô é nghut ri; 7 nghut kôlhang, târâ a chûng bâng é achaq achyut chyungxe duì hkyo é yánmai myìt wui myìt hke huî é, haû díngmán sû Lot lé hkyi htoq yu é nghut ri. 8 (Hkâsu mù gâ le, díngmán sû haû gi, nyí hkangmó yhángmòq ahkaû má nyi nyi é nghut luî, târâ a chung é múzó hkyô lé, yhang wó myâng wó gyô é yánmai, yhâng é díngmán myìt má gunjâng é hui sû nghut ri.) 9 Haû su nghut é nghut jáng, Yhûmsîng gi, târâ hkúnggâ é byu pé lé, wuîhke hkyô mai hkâsu kut hkyi htoq yû râ eq, a díngmán é bang lé, târâ jéyáng é buìnyì jé shoq, dam byî é hkyô lé xoq kut nyi é u má hkâsu kut zuî zing to râ lé sê lhê. 10 Haû yubàk gùngshô é htên byòq sê é yùt yùt ô naù hkyô châng é eq ahko ahkáng lé wú tiq bâng chyáng, haú hkyô hkyak dùt râ nghut lhê.
Byù haú bang gi, ngegáng htu é eq nghutbûn é bang nghut kôluî, mauhkûng bang lé lùmù gànsâng râ lé a gyùq kó nghut ri; 11 nghut kôlhang, maumang lagyô pé lháng gi, wum je bo é eq a-tsam je bo é nghut kôle, haû Yhûmsing é hí má, haû mauhkûng bang lé mara hun é dông lùmù gànsâng hkyô a wám kut kó nghut ri. 12 Nghut kôlhang, haû sará a-pyoq pé gi, yhûmsîng a sê gyô é hkyô pé lé rhoî dang taî akô. Yhángmòq gi, haû chyup yu é hui luî, lhoqhtên pyâm é hui râ matú za hku lé lo é, nhik a bo é tân jung gaunyhaú dông nghut akô; gaunyhaú haú pé su, yhángmòq le, htên byòq byùq kôrâ nghut lhê.
13 Yhángmòq gi, nò shoq kut bekô nghut é yánmai, nò shoq kut é hui zo kôrâ nghut lhê. Yhángmòq é ngón kún nau é myìt gi, nyí mó káng lé lháng gùngsho yùt yùt ô naù hkyô lhoqdìk râ matú nghut ri. Yhángmòq gi, núngmòq eq rahá zoshuq poî kut kô é hkûn, mhaû é lé yhángmòq é ngón hkyô kut kômù, agè agaú é eq achaq achyut é bang nghut akô. 14 Yhángmòq é myòqjí pé má gi, su-myi sulàng lú hkyô byíng zan to kômù, mara kut é hkyô lé hkâ-nhám le a hkying kó nghut ri; yhángmòq gi, a gingtîng é bang lé mhoq hpyoq yu akô; yhángmòq gi, myòqnòq é hkyô má kûng é bang nghut kômù, nhîng pyâm é hui bang nghut akô. 15 Yhángmòq gi, haû díng é hkyô lé tô pyâm to kômù, Be‑ora é yhang zo nghut é, agè ashop hkyo é ahpau lé chyitdàp sû Balam é hkyô má châng yông wún bekô nghut ri. 16 Nghut kôlhang, Balam gi, yhang kut shut é hkyo é yánmai, lozê èq tân mhoqshit é huî ri; dang a dàt nyo é loze haû gi, byu é htê dông dang taî lò mù, myìqhtoi hpó a gyîng é hkyô lé hkûm tang pyâm ri.
17 Byù haú bang gi, wuì a bo é wuìhtúng eq, laìdûn èq mùt tâng ló é nghânsoq eq pûng kômù, yhángmòq é matú gi, tuq tuq chut é mauchut hkaû lé lajâng to bê nghut ri. 18 Hkâsu mù gâ le, yhángmòq gi, asôm gyáng dang lé taí mù, yubàk gùngshô é yùt yùt ô nau é hkyô dông mai, haû shut shai é hkyô má chyungxe dui nyi é mai asik za hpang htoq lo é bang lé, mhoq hpyoq yu akô nghut ri. 19 Yhángmòq gi, haú bang lé lùthkyô byi râ gidìq byi kô é nghut kôle, yhángmòq gùng gi, htên byòq hkyô lhoqhtoq é gùngsho yùt yùt ô naù hkyo é jùn dut nyi akô; haî mù gâ le, byù rayùq gi, yhûmsîng lé hai èq ùp sing le, hai é jùn nghut lhê. 20 Byu pé gi, ngá-nhûng é Yhûmsîng eq hkyi yù Sû nghut é Yesuq Hkrisidùq lé sê é dông mai, mingkân é agè ashop hkyô mai wó hpang lùt htoq bê nghut kôle, yhángmòq lé hau èq tuî yùp tô é dum hui luî, ung pyâm é hui kô é nghut jáng, yhángmòq é matú, hí lhê htoq má je wuî byùq kôrâ nghut lhê. 21 Haû díngmán é hkyô lé yhángmòq sé luî, yhángmòq lé àp byî to bê nghut é chyoiyúng hkunmó lé tô pyâm to mù lhing taû ló byùq kô é htoq má, haú hkyô lé a sê é gi, yhángmòq é matú je gè kôrâ nghut lhê. 22 “Hkui gi, yhang hpat tô é lé dum taû zô lhê.” gâ é eq, “Wàq gi, chî pyám byî é htâng, yhâng é galhu htum má dum taû lhû lhê.”a gâ é sânghkyang gi, yhángmòq chyáng dik bê nghut ri.