PETIRUQ
Hî Dàm Hun Kat é Laiká
(1 Peter)
1
Yesuq Hkrisidùq é lagyo nghut sû, ngò Petiruq gi, Pontuq, Galatiq, Kapadoki-a, Asi-a eq Bihtuni mau pé má byo myín tô bum é, Yesuq Hkrisidùq é jì-no gyo râ matú le, Yhâng é suî èq hpyûn gyûn é huia râ matú le, haû So é lhoq sân-yúng nyi é múzó dông mai, Îwa Garai Gasâng é hî te sê tô é hpàqchyî má cháng luî, hkyin yù huî é bang nghut é, 2 Garai Gasâng èq hkyin htoq yû luî, mingkân é byù bíng dùt bâng chyáng dang kyô kat lhê. Jeju eq nguì ngón hkyô gi, núngmòq chyáng agùn agó jòq nyì sháng gàq.Dui Nyi É Myìt Myòqbyù Hkyô
3 Hkya-on kúngtôn hkyô gi, ngá-nhûng é Yhûmsîng Yesuq Hkrisidùq é Yhâng wa nghut sû Garai Gasâng chyáng nghut nyî sháng gàq! Yhang gi, Yesuq Hkrisidùq, shi é mai dum dui toq é hkyô dông, Yhâng é gyai shogyo nhikmyîn é yánmai, ngá-nhúng lé, asik hku é dum hui nhâng mù, rû dui nyi é myìt myòqbyù hkyô lé wó nhang é htoq agó, 4 núngmòq é matú mauhkûng htoq má tô to byi bê nghut é, hkâ-nhám le, a hten a byòq é, agòt a‑û a dùt é, a hpoî byùq é muì lé le wó nhang é nghut lhê. 5 Núngmòq gi, lùmjíng kô é yánmai, ló htâng é ahkyíng má lhoqhtoq shit râ rì rì nghut é hkyi yù hkyô jé shoq, Garaî é hpungwup a-tsâm èq ùpzúng é hui bang nghut akô. 6 Haû mù, núngmòq gi, ahkuî razùp zo, wuîhke hkyô junghkang jungmó má yón hpuzô é hui kôrâ nghut kôlhang, gyai yhang gabú nyî keq. 7 Wuîhke hkyô haú pé mai, núngmòq é lùmjíng myìt gi, jèt é hkyô lé wó chyam htoq mù, myi mai jên yù kôlhang htên byòq sê é hîng htoq je gyaú luî, Yesuq Hkrisidùq htoq shit é hkûn, hkya-on kúngtôn hkyô, hpungwup shingkang eq xânghpoq nge wó hkyô lé, núngmòq wó kôrâ nghut lhê. 8 Núngmòq gi, Yesuq lé a myang wú kôlhang, Yhang lé chyitdàp bum akô; Ahkuî, núngmòq, Yhang lé a myàng kôlhang, Yhang lé lùmjíng kô é nghut mù, a ung htoq taî é eq hpungwup bo é gabú hkyô gi, núngmòq chyáng byíng jùp nyi ri. 9 Hkâsu mù gâ le, núngmòq gi, núngmòq é chyungxe sô lé hkyi yù hkyô nghu é, núngmòq é lùmjíng myìt é a-kyû lé wó yu nyi kô é nghut ri.
10 Hkyi yù hkyô haû eq séng luî, núngmòq chyáng jé bê nghut é jeju hkyô lé taî é myìqhtoî pé gi, gyai yhang sidìq myìt èq jí jí chyun chyun ho gôn wú bekô nghut ri. 11 Yhángmòq gi, Hkrisidùq wuîhke jamjau hui luî, hpungwup shingkang wó râ nghut é hkyô lé, yhángmòq má lúng nyi é, Hkrisidùq é Sô mai te taî é hkûn, hkâ-nhám nghut râ eq hkâsû é u má nghut râ hkyô lé ho gôn wú bekô nghut ri. 12 Mauhkûng mai nhang kat é Chyoiyúng Sô èq, núngmòq lé gabú danglù hko kyo bê bang mai, ahkuî núngmòq lé taî kyo bê nghut é hkyô pé lé, yhángmòq taí kô é gi, yhûmsing matú dójaú é a nghut é za, núngmòq matú nghut é hkyô lé, yhángmòq lé lhoqhtoq shit mù sé kô é nghut ri. Maumang lagyô pé lháng gi, haú hkyô pé lé gyai wú nau bum akô nghut ri.
Chyoiyúng Nyî Râ Hkyô
13 Haû mù luî, zui saí râ matú núngmòq é i‑myìt lé hen to keq; yhûmsing gùng yhûmsîng hkang nyì keq; Yesuq Hkrisidùq htoq shit é hkûn, núngmòq lé byi râ nghut é jeju lé, hkyak za myìt myòqbyu nyì keq. 14 Jì-no gyô é zoshâng wuì su, myòq a bóng shî é pyàt má núngmòq nyi tô é hkûn, núngmòq é agè ashop ô naù hkyô lé a châng kut é za, 15 haû núngmòq lé ji yu é Sû gi, chyoiyúng é su, núngmòq zui saî é hkyô bànshoq má chyoiyúng nyî keq. 16 Hkâsu mù gâ le, “Ngò gi, chyoiyúng Sû nghut é yánmai, núngmòq le chyoiyúng nyî keq.”b ga kâ tô ri.
17 Byù yùq hkangmó é múzó lé, myòqdong a hkyin é za târâ jéyáng é sû Îwa lé, núngmòq wùt dung kô é yánmai, byù bíng dông shî má nyi é u lé, Garai lé gyùq hkúnggâ é myìt mai chyungxe duì keq. 18 Hkâsu mù gâ le, núngmòq gi, núngmòq é îchyí îwâ pê chyáng mai bo gyó lo é hpau a dàp é chyungxe duì hkyô mai, htên byòq sê é ngùn, hing èq hkyi yù huî é a nghut é za, 19 gúmjùp é eq mara a bo é sau zo nghut sû, Hkrisidùq é hpaû dik é suî èq shèq hkyi yù huî é ru nghut é lé, núngmòq sê lhê. 20 Yhang gi, mau htoq xâng hkun mai hkyin yu é hui bê nghut kôlhang, jihtûm ahkyíng shí pé má shèq, núngmòq é matú htoq shit nhang é hui bê nghut ri. 21 Yhang lé, shi é mai lhoqdui toq yû mù, hpungwup shingkang bò nhang é Garai Gasang lé, núngmòq gi, Hkrisidùq dông mai lùmjíng kô é nghut luî, núngmòq é lùmjíng myìt eq myìt myòqbyù hkyô gi, Garai Gasâng chyáng nghut nyî bekô nghut ri.
22 Ahkuî kúm, núngmòq gi, haû tengmán hkyô lé châng é dông mai, yhûmsing gùng yhûmsîng lhoq sân-yúng yû bekô nghut mù, núngmòq é gu-mang wuì lé, lhumzuî é dông chyitdàp bekô nghut luî, myìt nhiklhum mai, rayùq eq rayùq gyai yhang chyitdàp lhum keq. 23 Hkâsu mù gâ le, núngmòq gi, htên byòq sê é a-myui mai dum hkû huî é a nghut é za, Garai Gasâng é, rû dui nyi é eq ru gîng nyi é mungdang dông, htên byòq a sê é a-myui mai dum hku é hui bang ru nghut lhê. 24 Hkâsu mù gâ le,
“Byù lhúnglhâng bang gi, wàhu mhan eq pung ri, yhángmòq bànshoq bâng é hpungwup shingkang gi, yò mâ é banbó pé eq pung ri;
wàhu mhan gi, nyhuî kyuq byùq luî, banbó pé gi, yòq gyó byùq lhê;
25 nghut kôlhang, haû Yhûmsing é mungdang gi, ahtum abyùq gîng nyi lhê.”c
gâ tô ri. Haû gi, núngmòq lé hko kyo bê mungdang nghut lhê.