2
Haû mù luî, i‑myìt dû é hkyô bànshoq eq mhaú zô é hkyô bànshoq, gègùn labyoq kut é hkyô, mânon é hkyô eq lùmù gànsang é hkyô jung hkangmó pé lé tô pyám keq. 2 Asik hku é zonú pé naú lé ô naù gadaú é su, sô eq sêng é jèt é naúa lé ô naù gadaú nyî keq, haû jáng, núngmòq gi, hau é yánmai, núngmòq é hkyi yù hkyô má wó kô myhâng kôrâ nghut lhê. 3 Hkâsu mù gâ le, haû Yhûmsîng gi, gè sû nghut é lé, núngmòq chyam wú bekô nghut ri.Rû Dui Nyi É Lùqgòk Eq Hkyin Yù Huî É Byù Myû
4 Byu pé mai hkyin htoq pyám kôlhang, Garai Gasâng é matú hpaudap luî, Yhâng èq hkyin yù huî é, rû dui nyi é Lùqgòk nghut sû, haû Yhûmsing chyáng núngmòq jé lé é hkûn, 5 núngmòq le, rû dui nyi é lùqgòk pé su, sô eq sêng é yhûmb saî nyi é hui luî, Yesuq Hkrisidùq dông mai, Garaî èq hàp yù gíng é, sô eq sêng é hkungga nhông byi râ matú, chyoiyúng é hkyangjong a-myû dùt bekô nghut ri. 6 Hkâsu mù gâ le, Chyúmdang má,
“Wú keq, hkyin yù huî é eq hpaudap é htúngchyûn lùqgòk racham lé, ngò, Zi-un bùm má lheq tô é nghut lhê;
Yhang lé lùmhkau é sû gi, hkâ-nhám le hoq hpû é hui râ a nghut.”c
ga taî tô ri. 7 Haû mù, lùmjíng bang núngmòq é matú gi, lùqgòk haû hpaudap é nghut lhê. Nghut kôlhang, a lùmjíng bâng é matú gi,
“Haû yhûm saí bang hkyin htoq pyâm é lùqgòk gi, htúngchyûn mâ é ahkyàk dik é lùqgòkd dùt bê nghut ri.”e
ga le,
8 “Byu pé lé, htûng leng râ lùqgòk eq myìt lèqbàt nhâng râ lùqmó cham dùt bê nghut ri.”f
ga le, taî tô ri. Yhángmòq gi, mungdang lé a cháng kô é yánmai, myìt lèqbàt kô é nghut lhê. Haû dùt râ lé, yhángmòq é matú masàt to gû nghut bê nghut ri.
9 Nghut kôlhang, núngmòq gi, mauchut hkaû mai Yhâng é maúhpo maubó shut núngmòq lé wùt htoq yû Su é maúhpo múzó lé wó taî pyô kó sháng gàq ga, hkyin yù huî é byùhú, hkóhkâm hkyangjong a-myû, chyoiyúng é byù myû, Garai Gasang eq sêng é byu pé nghut akô nghut ri. 10 Núngmòq gi, hí lé byù ra-myû a nghut wú kôlhang, ahkuî gi, Garai Gasâng é byù myû nghut bekô nghut ri; núngmòq gi, hí lé shogyo nhikmyin hkyô lé a wó yu wú kôlhang, ahkuî gi, shogyo nhikmyin hkyô lé wó yû bekô nghut ri.
11 Chyitdàp é luzúm wuî ê, núngmòq é chyungxe sô lé majan zân nyi é, yubàk mara byíng jùp é ô naù gadaú hkyô lé koi pyám keq nghû, gó-mîng byu pé eq byù bíng pé dông mingkan htoq má nyi é bang núngmòq lé, ngò, wum taî tsuq kat lhê. 12 Haû a lùmjíng shî é byu pé gi, núngmòq shut nyi ri ga, núngmòq lé mara hun bùm kôle, núngmòq é ge é múzó lé myàng kômù, ngá-nhúng lé Garai Gasâng èq lé kûm é buìnyì má Garai lé shigyaú kó sháng gàq, a lùmjíng shî é byu pê é ahkaû má haû su ge é chyungxe duì hkyô dông nyì yàp keq.
Ùphkâng Bang Eq Yhûmsîng Wui É A‑ô Má Nyì Râ Hkyô
13 Haû Yhûmsing é yánmai, byu pé mâ é ahko ahkáng wó bang bànshoq é a‑ô má nyì keq: kô dik é ahkáng ayá wó é hkósêng é a‑ô má nghut kôle, 14 shut é hkyô kut bang lé dam byi râ matú eq jô é hkyô kut bang lé shigyaú râ matú, hkósêng èq nhang tô é mauzaû pê é a‑ô má nghut kôle, nyi nyì keq. 15 Hkâsu mù gâ le, ge é hkyô kut é dông, byù nâ pê é a sé a dàt é dang lé núngmòq lhoqzîm pyâm é gi, Garai Gasang ô nau é hkyô nghut lhê. 16 Lùt bê bang dông nyì keq, nghut kôlhang, agè ashop é hkyô lé nghop pyám râ matú núngmòq é lùthkyô lé hkâchûng kó; Garai Gasâng é duìnhâng zoshâng wuì dông nyì keq. 17 Yùq hkangmó lé rago za hkúnggâ é hkyô shit keq; lùmjíng é gu-mang wuì lé chyitdàp keq; Garai Gasang lé gyùq hkúnggâ nyì keq; hkóséng lé hkungga keq.
18 Duìnhâng zoshâng wuì ê, hkúngga myìt bànshoq èq, núngmòq é yhûmsîng wui é a‑ô má nyì keq; ge é eq nú nhám bâng é a‑ô má za a nghut, byùwuî pê é a‑ô má le nyì keq. 19 Hkâsu mù gâ le, byù rayùq gi, Garai Gasang lé bûn nyì sû nghut é yánmai, mara dông a nghut kôlhang, wuîhke jamjau huî é hkyô lé hpuzô é lé, jân pyâm é nghut le gi, hkya-on gíng é sû nghut lhê. 20 Nghut kôlhang, núngmòq gi, mara kut shut é yánmai, nhuq bàt é hkâm zo luî, haû lé jân nyi é nghut le gi, hkâsû é xânghpoq nge wó kôrâ lhú? Nghut kôlhang, núngmòq gi, ge é hkyô kut luî, wuîhke hui zô é lé jân pyâm é nghut jáng, haû gi, Garai Gasâng hí má hkya-on gíng é hkyô nghut lhê. 21 Núngmòq gi, haú hkyo é matú ji yù huî é nghut lhê; haî mù gâ le, Hkrisidùq gi, núngmòq é matú wuîhke hkyô huî é má, núngmòq lé alìk dông tô to byi bê nghut mù, núngmòq gi, Yhâng é hkyî-kám pé lé cháng râ dùt lhê.
22 “Yhang gi, hai mara le a kut shut, Yhâng é nhut mai mhaû é lé a myàng.”g
23 Yhang gi, rhoî huî é hkûn, yhángmòq lé a dum taû rhoî; wuîhke hkyô huî é hkûn, kyuq é dang a taí. Haû kut râ malaî, tengmán é dông jéyáng é Su chyáng, Yhânggùng lé àp pyâm ri. 24 Ngá-nhúng gi, yubàk mara eq wó shi gang mù, díngmán hkyo é matú chyungxe wó duî kó sháng gàq ga, Yhang gi, sik zîng má, Yhânggùng èq yhang, ngá-nhûng é yubàk mara lé Yhânggùng má wun pyám byi bê nghut ri; Yhâng é dàm pê é yánmai, núngmòq gi, lhoqgê byî é hui bekô nghut ri. 25 Hkâsu mù gâ le, núngmòq gi, hkyô nghoq byùq é sau pé su dùt wú kôlhang, ahkuî, núngmòq gi, haû sau zúng Sû eq núngmòq é chyungxe sô lé ùpzúng Su chyáng lhing taû lò bekô nghut ri.