I-kun Myhî Pé Eq I-kun Hpô Pé
3
I-kun myhî pé ê, haû eq rajung za, yhûmsing é i-kun hpó ùphkang é a‑ô má nyì keq; haú hkûn, yhángmòq mâ é rayùq yùq, haû mungdang lé a lùmjíng kôlhang, 2 yhûmsing é chyungxe duì hkyô mâ é sansêng é hkyô eq hkúnggâ é hkyô lé myàng kôjáng, dang dông a nghut é za, yhâng é yhûmsîng myhî é nyì yàp é sâmlai dông mai yhang lé wó lhoqlhik yû râ nghut lhê. 3 Núngmòq yúng é hkyô gi, ahtoq pyâm za nghut é, xâmban nìk é dông, hîng zè mhôn chung é eq réng é mèbu wùt é dông mai lo é a ge nghut. 4 Hau é malaî, haû gi, Garai Gasâng é hí má gù bo é, nú nhâm é eq zim za dùt é so é, a dàt hpoî é yúng hkyô nghut é núngmòq é i‑myìt ûnghkaû mâ é su é yúng hkyô shèq dùt râ lhê. 5 Hkâsu mù gâ le, góhkûn, Garai Gasâng chyáng myìt myòqbyù bang nghut é, chyoiyúng é myiwe wuì gi, yhángmòq gùng lé haú dông mhôn yù yù kut kô é nghut lhê. 6 Sara gi, Abraham é jì-no gyo luî, yhang lé yhâng é yhûmsîng ga wùt é su, yhángmòq gi, ó le ô é yhûmsing é i-kun hpó ùphkang é a‑ô má nyi akô nghut ri. Núngmòq gi, jô é hkyô lé kut mù, gyùq é hkyô a bo é nghut jáng, Sarâ é byìzô pé nghut bê.7 I-kun hpô pé ê, haû eq rajung za, yhûmsing é i-kun myhí eq rahá nyì yàp e ló é hkûn, sê gyo byi mù, núngmòq htoq wum nyhôm é bang eq, núngmòq eq rahá chyungxe jeju chyûnghuq wunlî wó é bang dông, yhángmòq lé hkúngga keq. Haú hkûn, núngmòq é kyûdung dang lé a he-ngìk pyám byi râ nghut lhê.
Ge É Kut Luî, Jamjau Hkam É Hkyô
8 Dang htâng sat é má, núngmòq bànshoq bang gi, rayùq eq rayùq myìt huî lhûm nyì keq; myìt wú nô mù, gu-mang nhiktâng wuì su chyitdàp lhûm nyì keq; shogyo nhikmyin myìt bò luî, i‑myìt nyhum nyì keq. 9 Agè ashop é lé, agè ashop é dông lató a hpuq é eq rhoi é lé rhoi é dông lató a hpuq é za, shimân byi keq; haî mù gâ le, núngmòq gi, haú pê é matú, shimân jeju muì wó hkam yù kó sháng gàq ga, ji yu é hui kô é ru nghut lhê. 10 Hkâsu mù gâ le,
“Chyungxe duì râ lé chyitdàp é eq ge é buìnyì pé lé myàng nau é sû ó yùq le, yhâng é shô lé, agè ashop é mai, yhâng é nhutwuî lé, mhaú dang taî é mai, lhoqkâng pyám ra râ nghut lhê.
11 Yhang gi, agè ashop hkyô mai taû lhing lò luî, ge é kut ra râ nghut lhê; yhang gi, nguì ngón yùqyò hkyô lé hô mù, châng hkat nyì ra râ nghut lhê.
12 Hkâsu mù gâ le, haû Yhûmsing é myòqjí gi, díngmán bang lé wú nyi é nghut luî, yhángmòq é kyûdung dang lé, Yhâng é nohkyap èq gyo byî ri;
nghut kôlhang, haû Yhûmsing é myòqdong gi, agè ashop hkyô kut bang lé gyè dông myang pyâm ri.”a
gâ tô ri.
13 Ge é hkyô lé, núngmòq gyai yhang kut nau nyi é nghut le gi, ó yùq wá núngmòq lé wó gunjang râ lhú? 14 Nghut kôlhang, díngmán hkyo é matú, núngmòq wuîhke jamjau huî le lháng, núngmòq gi, hkungsô wó nyi ri. “Yhángmòq kyuq é hkyô lé hkâgyùq kó; hkâgyùq dàn kó.”b 15 Núngmòq kúm gi, myìt nhiklhum má, Hkrisidùq lé, Yhûmsîng dông jowò byi keq. Nàng wó é myìt myòqbyù hkyô lé myî é sû yùq hkangmó lé, haî mù wó é hkyô tû taî kyo râ matú, ayang hen to aq. Nghut kôlhang, nú nhâm é eq hkúnggâ é dông haû lé kut nyì àq; 16 núngmòq é ûnghkaû myìt san za dùt nyì keq, haú hkûn, Hkrisidùq dông mai núngmòq wó é ge é a-kyang lé rhoî dang taî é bang gi, yhángmòq lùmù gànsang é yánmai hoq hpû é hui kôrâ nghut lhê. 17 Garai Gasang ô nau é nghut le gi, agè ashop kut luî jamjau hkâm râ htoq má, ge é kut luî jamjau hkam le gi, je ge é nghut lhê. 18 Hkâsu mù gâ le, núngmòq lé Garai Gasâng chyáng shuî jé shoq, Hkrisidùq gi, byu pê é yubàk marâ é yánmai, radàm za shî hkâm pyâm bê nghut ri; haû gi, díngmán Sû, a díngmán bâng é matú shî hkâm byî é nghut lhê. Yhang gi, gùngdu shî bê nghut kôlhang, haû Sô má lhoqdui é hui bê nghut ri. 19 Yhang gi, Sô dông, htóng lúng tô é sô pé lé ê hko kyô ri. 20 Sô haú pé gi, a‑nham lé, No-aq é i-pyàt má wuìsanghpo lé No-aq tsuq nyi é hkûn Garai Gasang myìt hîng hîng láng nyi é u lé, jì-no a gyô é bang nghut akô. Wuìsanghpo má wàng mù, wuì mai hkyi yù huî é byù shau luî, shit yùq za nghut akô. 21 Wuì haû gi, ahkuî núngmòq lé le hkyi yu é nghut é baptisima é azòng nghut ri; haû gi, gùngdu mâ é agòt a‑û lé huî sêng pyám byî é a nghut é za, sansêng é ûnghkaû myìt mai Garai Gasâng é hí má gidìq tô é ru nghut lhê. Yesuq Hkrisidùq é dum dui toq hkyô dông, núngmòq gi, baptisima hkâm yù luî, hkyi yu é hui kô é nghut lhê. 22 Yesuq Hkrisidùq gi, mauhkûng má dòq ló luî, Garai Gasâng é lòqyò hkyam má nyi tô é nghut mù, maumang lagyô pé, ahkáng ayá pé eq a-tsam pé gi, Yhâng é ùphkang é a‑ô má nghut nyi bum akô.