YAKUQ
Hun Kat é Laiká
(James)
1
Garai Gasang eq Yhûmsîng Yesuq Hkrisidùq é jùn, ngò Yakuq gi, byo myín tô é Isira-elaq raxe í myû lé, nguì ngón dang shit kyô kat lhê.Lùmjíng Myìt Lé Chyam É Hkyô Eq Hpàqchyî Byéng-yá
2 Ngá gu-mang wuì ê, núngmòq é lùmjíng myìt lé chyam wú é hui jáng, shi-kùt shirâng sê é myìt jàt nyi é lé, núngmòq sê nyi lhê nghut mù, 3 wuîhke jamjau ajung jung lé htûng huî é hkûn, gaù jowò mó nghut nyi lhê nghû luî myìt yù keq. 4 Hau htoq agó, núngmòq bànshoq gúm gúm jùp jùp dùt mù luî, haî le a langhpyùt shoq, shi-kùt shirang é myìt gi, yhûmsîng kut nyi é múzó lé wó lhoq gúmjùp nyì sháng gàq. 5 Núngmòq má rayùq yùq hpàqchyî byéng-yá langhpyùt tô é nghut le gi, haû bànshoq bang lé, mara a hun é za, agùn agó byî nyi é Garai Gasâng chyáng dûng nyì sháng gàq; haû jáng, Garai gi, yhang lé byi râ nghut lhê. 6 Nghut kôlhang, lum shut é myìt a bo é za, lùmjíng é myìt èq dûng nyì sháng gàq, hkâsu mù gâ le, lum shut é sû gi, laìdûn èq hik luî toq lo é nhông mâ é wuìlhêng eq wuí nyi ri. 7 Haú yùq gi, Yhûmsîng Garaî chyáng mâ é haî le wó yû râ su a ngam nyì sháng gàq. 8 Yhang gi, myìtkoq xan sû nghut luî, yhâng é hkyô hkat hkangmó má, mú htâng a nyang é sû nghut nyi ri.
Myùng Sû Eq Wó Sû
9 Myung é gu-mang hpó gi, wàq toq huî é má, wó sû gi, lhoqnyhûm huî é má, gabú myìt mai nghutbûn nyì sháng gàq. 10 Hkâsu mù gâ le, wó sû gi, wàhu banbó su woî byùq ló râ nghut lhê. 11 Buì gi, nyé é laì eq toq lô jáng, haû wàhu mhan nyhuî byùq ló mù, abó le yòq gyó byùq é eq, hau é yúng sâm pé gi, htên byùq é su; wó sû le haû eq rajung za, yhang kut nyi é múzó má woî byùq ló râ nghut lhê.
Gúnglaú É Hkyô
12 Wuîhke jamjau huî le, wó shi-kùt shîrang nyì sû gi, hkungsô wó nyi ri; hkâsu mù gâ le, chyam wú é ban hui jáng, yhang gi, Garai Gasang lé chyitdàp é bang lé, danghtum htûm tô é chyungxe jánmaú lé, wó yû râ nghut lhê.
13 Gúnglaú huî é sû ó yùq nghut kôlhang, gúnglaú huî é hkûn lé, “Garai Gasang, ngo lé gúnglaú nyi ri.” nghû luî, a taí sháng gàq; hkâsu mù gâ le, agè ashop é hkyô gi, Garai Gasang lé wó gúnglaú é a nghut, ó yùq lé le Garai Gasang gúnglaú râ a nghut. 14 Nghut kôlhang, ó yùq nghut le le, yhûmsing é gùngsho ô nau é dông, shuî lâng nghoq ló é nghut le gi, agúng alaú hui bê. 15 Gùngsho ô nau é hkyô kúm gi, zogûng dùt jáng, mara lé hku htoq lo ri. Mara kô dìng jáng, shi é má jé râ nghut lhê.
16 Ngò chyitdàp é gu-mang wuì ê, i‑myìt hkyô nghoq hkâ-nghoq nyî kó. 17 Gè réng é eq byíng jùp é chyûnghuq lhúnglháng gi, ahtoq shut mâ é nghut mù luî, maubó gùng pêa é Yhâng wa Garaî chyáng mai gyó lo é nghut ri. Yhang gi, ahpuq alik a-tau ahû dùt é buìshûm su dùt râ a nghut. 18 Yhang hpan tô é a-myû pé má, ngá-nhúng gi, sânghi myhîng é ashi pé dùt lò sháng gàq ga, Yhang gi, Yhang ô nau é hkyô cháng luî, haû tengmán é mungdang mai, ngá-nhúng lé hku to bê nghut ri.
Gyô Yu É Eq Châng Kut É Hkyô
19 Ngò chyitdàp é gu-mang wuì ê, shí hkyô lé núngmòq sê nyi akô. Byù ó yùq nghut kôlhang, gyô yù râ lé han nyì sháng; dang taí râ lé a hân sháng gàq; nhik-yo râ lé le hkâhân kó. 20 Hkâsu mù gâ le, byù nhik-yô é hkyô gi, Garai Gasang ô nau é díngmán é dông chyungxe duì hkyô wó lhoqhtoq râ a nghut. 21 Haû mù luî, achaq achyut é bànshoq eq ladu lai agè ashop é pé lé lhoqsan lhoqsêng pyám luî, núngmòq é i‑myìt lé wó hkyi yù râ matú, i‑myìt ûnghkaû má Garai Gasang hô tô é mungdang lé, nú nhâm é myìt èq hkam yu nyì keq.
22 Núngmòq gi, yhûmsing gùng lé a mhaû pyám sháng gàq, haû mungdang lé wó gyô yu é bang za a nghut, haú dông châng kut é bang le nghut nyî sháng gàq. 23 Mungdang haû lé wó gyô yù mù, a châng kut é sû ó yùq le, yhûmsing é gùngdu lé myòqjàm má wú sû eq wuí ri. 24 Yhang gi, yhâng é gùngdu lé wú yû mù, myòqdong lhik é eq, yhûmsing gùngdu hkâsu dùt é lé tô-myhî pyâm ri. 25 Ngá-nhúng lé wó lhoqlhut yu é gúmjùp é târâ má, rago za wú tsuq nyî sû kúm gi, wó gyô yù mù tô-myhî pyâm é sû a nghut, múzó èq tûn shit é sû nghut é yánmai, haú yùq gi, yhang châng kut é múzó má shimân jeju wó râ nghut lhê.
26 Byù rayùq yùq, “Ngò gi, noqkuq htûng lé lhoqdìk sû nghut lhê.” ga luî, myìt to kôlhang, yhûmsing nhut shô lé a wó hkâng mù, yhûmsing myìt lé mhaû pyâm é nghut le gi, haú yùq é noqkuq htûng gi, akôm za nghut nyi ri. 27 Îwa Garai Gasâng é hí má sansêng é eq, râ é hkyô a bo é noqkuq htûng gi, wuîhke jamjau huî é chuimó chuízô pé lé, châng wú garúm é hkyô eq, mingkan htoq mâ é achaq achyut é hkyô lé koi pyâm é hkyô nghut ri.