Hebre 1

HEBRE

Pê Chyáng Hun Kat é Laiká

(Hebrews)

Garaî Yhangzo Gi, Maumang Lagyô Pê Htoq Je Gyaú É Hkyô

Laî ló bê i-pyàt pé má, Garai Gasang gi, ngá-nhûng é îchyí îwâ pé lé myìqhtoî pé dông alhîng lhîng eq adông dông mai dáng nyo wú bê nghut lhê. 2 Nghut kôlhang, ló htâng é buìnyì shí pé má, Yhang gi, Yhang Zo dông mai ngá-nhúng lé dang nyô bê nghut ri; Yhang gi, lhúnglháng lé sîng sû dùt râ matú haû Zo lé masàt to mù, Zo dông mai, nyì mî-nyî, jòq mîjòq lé hpan to bê nghut ri. 3 Haû Zo gi, Garai Gasâng é hpungwup shingkang dùq bó é hkyô eq Yhâng é gùnghkyâng isâm roq nghut nyì mù, lhúnglháng lé Yhâng é a-tsam byíng é dâng èq zuî zing tô ri. Yhang gi, yubàk mara lé lhoq sân-yúng é hkyô lé ban kut é htâng, mauhkûng htoq má Hkìkhkam dik Sû Garai Gasâng é lòqyo hkyam má zung to bê nghut ri. 4 Haû mù luî, Yhang gi, maumang lagyô pê é myìng htoq gyaú é myìng lé wó sing yù bê nghut é eq rajung za, yhángmòq htoq je riyhang gyaú sû dùt bê nghut ri.

5 Hkâsu mù gâ le, Garai Gasang gi,

“Nàng gi, Ngá zo nghut ri. Hkû-nyí, Ngò gi, Náng Wa dùt bê nghut lhê.”

ga le, dum,

“Ngò gi, Yhâng Wa dùt râ nghut mù, Yhang gi, Ngá zo dùt râ nghut lhê.”

ga le, maumang lagyo hká yùq lé hkâ-nhám wá taî wú é nghut lhê lhú? 6 Dum, Garai Gasang gi, Yhâng é zo-mún lé mingkan shut nhang hâng kat é hkûn,

“Ngá é maumang lagyô pé bànshoq gi, Yhang lé noqkuq kó sháng gàq.”

ga taî ri. 7 Maumâng pé eq séng luî Garai Gasang taî é má,

“Yhang gi, Yhâng é maumang lagyô pé lé laì su dùt nhâng mù, Yhâng é duìnhâng zoshâng wuì lé, myishâm pé su dùt nhang é nghut ri.”

gâ ri. 8 Nghut kôlhang, haû Zo eq séng luî, Yhang gi,

“Garai Gasang ê, Náng é hkóhkâm tángmyhâng gi, pyàt dedu ahtum abyùq gîng nyì mù,

Náng é díngmán hkyô gi, Náng é mîngdán lé ùphkang é hkyô dùt râ nghut lhê.

9 Nàng gi, díngmán hkyô lé chyitdàp luî, agè ashop hkyô lé a ngui byùq nghut ri.

Haû mù luî, Garai Gasang, náng é Garai Gasang gi, Nang lé, gabú nhang é xû bùt byî é dông, Náng é byìnzùm wui htoq je lhoqtoq to bê nghut ri.”

ga taî ri. 10 Hau htoq agó, Yhang gi,

“Yhûmsîng ê, Nàng gi, a‑nham sânghi má myìdam é a-pûn awang lé hi tô é nghut mù,

mauhkûng pé gi, Náng é lòqmú chyat nghut ri.

11 Haú pé gi, htên byòq byùq râ nghut lhê; nghut kôlhang, nàng gi, ru gîng nyì râ nghut lhê; haú pé bànshoq gi, mèbu su xaû byùq râ nghut lhê.

12 Nàng gi, haú pé lé, bumó lé su dîng yùp râ nghut lhê; Nàng gi, haú pé lé, mèbu su htaî pyám râ nghut lhê.

Nghut kôlhang, Nàng gi, rajung za ru gîng nyì râ nghut mù, Náng é zànwut pé gi, hkâ-nhám le htum râ a nghut.”

ga le taî ri. 13 Garai Gasang gi,

“Ngò, náng é gyè pé lé, náng é hkyî nang tánghkuq kut pyám byî é hkyíng jé shoq,

Ngá é lòqyo hkyam shut zung nyì shi aq.”

ga maumang lagyo hká yùq lé hkâ-nhám wá taî wú é lhú? 14 Maumâng pé bànshoq gi, hkyi yù hkyô lé hkam yù râ nghut é bang lé dójaú râ matú, nhang kat huî é mû wùn sô pé chyat za nghut akô, a nghut lhú?