HPILEMON
Chyáng Hun Kat é Laiká
(Philemon)
1
Hpilemon ê, Hkrisidùq Yesuq é yánmai htóng lúng nyî sû, ngò Poluq eq ngá-nhûng é gu-mang Timohti nhik gi, ngá-nhik chyitdàp é mû wùn luzúm nghut é sû nang lé le, 2 ngá-nhik é gu-nhá Ahpi-aq lé le, ngá-nhik é sarhê luzúm Arihkipo lé le, náng é yhûm má huî lhum lhum kut é noqkuq hpúng lé le, dang kyô kat lhê.3 Ngá-nhûng é Îwa Garai Gasang eq Yhûmsîng Yesuq Hkrisidùq chyáng mâ é, jeju eq nguì ngón hkyô gi, núngmòq chyáng ru joq nyî sháng gàq ô!
Jeju Hkya-ôn É Hkyô Eq Kyûdung Dang
4-5 Ngò gi, Yhûmsîng Yesuq lé nàng lùmjíng é hkyô lé le, sân-yúng bang bànshoq lé nàng chyitdàp é hkyô lé le, wó gyô é yánmai, ngò kyûdûng é hkûn, nang lé myìtbûn nyì luî, hkâ-nhám le ngá é Garai Gasang lé jeju hkya-ôn nyi lhê. 6 Ngò gi, Hkrisidùq é matú ngá-nhûng chyáng bo tô é ge é mû lhumjup lé sê gyô é hkyô lé, nàng wó yù sháng gàq nghû, náng é lùmjíng hkyô lé, nàng sàksé hkâm é má a-kyû htoq râ matú, kyûdung byî nyi lhê. 7 Náng é chyitdàp myìt gi, ngo lé gyai gabú nhang é eq wum-o wó yû nhang ri; hkâsu mù gâ le, gu-mang hpó ê, náng é yánmai, sân-yúng bâng é i‑myìt má nguì ngón yùqyò é hkyô wó yû bekô nghut ri.
Onesimu É Matú Tôngbán Byî É Hkyô
8 Haû su mù, nàng kut gíng é múzó hkyô, ngò, nang lé pying kat lhê. Hkrisidùq má, ngò gi, a gyùq a kyum é za nang lé haû wó kut nhang lhê nghut kôlhang, chyitdàp myìt dông za nang lé pying kat lhê. 9 Ngò, Poluq gi, mang bê htoq agó, ahkuî Hkrisidùq Yesuq é yánmai htóng lúng sû le nghut luî, 10 ngò kyum hut huî nyi é u lé ngá zo dùt lo é Onesimu é matú nang lé ngò dûng tôngbán kat lhê. 11 Yhang gi, hí hpyang náng é matú a-kyû a bo é nghut kôlhang, ahkuî gi, náng é matú le, ngá é matú le, a-kyû bò bê nghut ri.
12 Ngò nhik htûng é Onesimu lé náng chyáng dum taû nhang kat lhê. 13 Haû gabú danglu é yánmai, ngò htóng lúng nyi é má náng é malaî ngo lé garúm râ matú, yhang lé ngò shuî nyi to naû kôlhang, 14 ngò gi, nàng myìt a huî le haî le a kâm kut. Hau é yánmai, ngò, nang lé kut nhang é dông a nghut é za, nàng ô nau é dông kut é san za nghut sháng gàq. 15 Hkâsu mù gâ le, náng chyáng mai yhang rayòq rabun zo gâng nyi é gi, yhang dum taû lò mù hkâ-nhám le nàng eq rahá dum wó nyi nyì râ matú nghut lhê âbe. 16 Yhang gi, htâng hpyang, jùn rayùq dông a nghut é za, jùn htoq má je ge é chyitdàp gu-mang hpó dùt râ nghut bê; ngá matú, yhang gi, ngò chyitdàp dik é sû nghut lhê; náng matú kúm gi, byù rayùq dông le, Yhûmsîng Yesuq má gu-mang hpó rayùq dông le, je riyhang chyitdàp râ sû dùt bê nghut ri.
17 Haû mù luî, nàng, ngo lé luzúm rayùq sû ngam é nghut le gi, ngo lé hàp yu é su, Onesimu lé le lom hàp yù àq. 18 Yhang, nang lé rajung jung shut pyâm é nghut le le, chyîn dàp tô é nghut le le, haû gi, ngá chyáng dàp é chyîn nghû sôn yù àq. 19 Ngò, Poluq gi, chyîn haû xap râ nghû luî, ngá é lòq èq yhang kâ kat kôlhang, nàng yhang lháng, ngo lé chyungxe chyîn xap râ sû nghut é lé bûn ngham aq. 20 Nghut bê, gu-mang hpó ê, náng é yánmai, haû Yhûmsîng má ngò gabú é hkyô wó yu nyì sháng gàq, Hkrisidùq má ngá é i‑myìt lé lhoqnguî lhoqngón byî é dông, shî, ngò pying kat é dang lé gyo byi laq. 21 Nàng gi, ngò taî kat é htoq má je lhom kut râ nghut é lé, hkyak za sé luî, ngò kâ kat é nghut lhê.
22 Hau htoq agó, ngá é matú nyì râ wàp lajang láng aq. Hkâsu mù gâ le, núngmòq kyûdung byî é yánmai, ngò gi, núngmòq chyáng dum wó jé râ lé myìt myòqbyu nyi lhê.
23 Hkrisidùq Yesuq é yánmai, ngá é htóng lúng luzúm nghut é sû Epahpra gi, nang lé shi-kyâm kat ri. 24 Ngá é htuq lùq htuq bang nghut é Marikuq, Arisitakuq, Demaq, Lukaq pé le, nàng lé shi-kyâm kat akô.
25 Yhûmsîng Yesuq Hkrisidùq é jeju gi, núngmòq é sô eq rahá za ru joq nyî sháng gàq ô!