Ge É Múzó Zui Saí Râ Hkyô
3
Nàng gi, lùmjíng bang lé, zau wuî eq ahko ahkáng wó bâng é a‑ô má nyì mù, jì-no gyô nyì râ eq, hkâ-nhám le ge é múzó hkangmó zui saí râ lé hen nyì uchyang, 2 ó yùq lé le lù a mù râ; nguì ngón hkyô hô râ; myìt tê byî é hkyô tûn shit râ eq byù bànshoq lé nûm é i‑myìt tûn shit râ hkyô kut nyî kó sháng gàq, lhoqpun lhoqkyîng nyì àq.3 Hkâsu mù gâ le, ngá-nhúng le, hí hpyang gi, byù ngòk pé, jì-no a gyô é bang, mhaú zo huî é bang eq gùngsho ô nau é hkyô eq mingkan ngón hkyô ajung jûng èq jùn kut é hui bang, dùt mù luî, agè ashop é eq mânon lhûm é hkyô kut nyî mù, rayùq eq rayùq a naù a wôm lhûm é dông nyi laî lò bê nghut lhê. 4 Nghut kôlhang, ngá-nhûng é hkyi yù Sû Garai Gasâng jeju eq chyitdàp myìt htoq shit é hkûn, 5 ngá-nhúng yhang kut é díngmán é múzó èq a nghut é za, Yhâng é shogyo nhikmyîn é jeju yánmai shèq, Garai Gasang gi, ngá-nhúng lé hkyi yù bê nghut ri. 6 Yhang gi, ngá-nhûng é hkyi yù Sû Yesuq Hkrisidùq é yánmai, ngá-nhûng é ahtoq má agùn agó hut hkyó byî é Chyoiyúng So èq ngá-nhúng lé chî san chî sêng pyám byi mù, sô má dum hku é hui nhâng luî, myìt sik htaí byî é hkyô dông ngá-nhúng lé hkyi yù bê nghut ri. 7 Haû mù luî, Yhâng é jeju mai mara hkyut san byî é hui bê nghut é yánmai, ahtum abyùq é chyungxe lé myìt myòqbyu nyi é eq rajung za, ngá-nhúng gi, silî wunlî wó hkam yu é bang dùt lò râ nghut lhê. 8 Dang shí pé gi, lùm gíng é dang nghut lhê mù luî, Garai Gasang lé lùmjíng é bang gi, ge é múzó lé myìt lòm luî rago zui saî nyì kó sháng gàq, haú hkyô pé lé nàng wum zùq tung mhoqshit byi râ lé, ngò ô nau nyi lhê. Shí pé gi, byù lhúnglhâng bâng é matú ge é eq, a-kyû bo é hkyô nghut lhê.
9 Nghut kôlhang, ana apâ ga luî taî htîng lhûm é hkyô lé le, byùxik labaû gôn é hkyô lé le, nyo byòq lhûm é hkyô lé le, jep é târâ eq séng mù byòq lhûm é hkyô pé lé le, koi pyâm nyì àq; hkâsu mù gâ le, haú pé gi, a-kyû a bo é hkyô eq chûng a ge é hkyô pé nghut ri. 10 Gam hkuî é myìt bò sû lé gi, í dâm mhoqshit wú mù, a wó jáng, yhang lé baú tô pyám aq. 11 Haû su kut sû gi, yhang kut é múzó má mara wó to bê nghut mù, yhûmsing gùng lé yhûmsîng mara hun é sû nghut é lé, nàng sê to lo aq.
Je Htâng Má Pying É Dang
12 Ngò gi, Nikopoli wà má gyòqmyò lhoqlhai râ dông myìt hpyit tô é yánmai, Aritema lé, a nghut jáng Tuhkiku lé, náng chyáng nhang kat byi râ, jé eq yhang, nàng gi, shi-kùt luî, haû wà shut ngá chyáng lé lô àq. 13 Nàng gi, târâ sê é sû Zena eq Apolo nhik lé, yhángnhik é hkyôwuì má râ é hkyô bànshoq, shi-kùt luî garúm kat àq. 14 Ngá-nhûng é byu pé gi, nyí wuî râ é hkyô lé wó htuq é eq ashi zuî é bang wó dùt kó sháng gàq, ge é múzó lé myìt lòm mù zui saî nyì râ hkyô lé mhoq yû râ lhê.
15 Ngò eq rahá nyi é bang yùq hkangmó gi, nang lé shi-kyâm kat akô. Lùmjíng hkyô má ngá-mòq lé chyitdàp é bang lé, bo shi-kyám byi aq.
Garaî é jeju gi, núngmòq eq rahá jòq nyì sháng gàq ô!