TIMOHTI
Chyáng Htang Dàm Hun Kat é Laiká
(2 Timothy)
1
Hkrisidùq Yesuq chyáng mâ é chyungxe byi râ ga danghtum htûm tô é eq rajung za, Garai Gasang ô nau é dông, Hkrisidùq Yesuq é lagyo nghut sû, ngò, Poluq gi, ngò chyitdàp é ngá zo Timohti lé, dang kyô kat lhê.2 Haû Îwa Garai Gasang eq ngá-nhûng é Yhûmsîng Hkrisidùq Yesuq chyáng mâ é jeju eq shogyo nhikmyin hkyô, nguì ngón hkyô gi, ru joq nyî sháng gàq ô!
Lùmlùq Râ Matú Myìt Wum Byî É Hkyô
3 Ngò gi, ngá é kyûdung dang má, nyí, myín, abyìt alan nang lé bûn nyì uchyang, sân-yúng é i‑myìt mai, ngá é îchyí îwâ pé dójaú é su, ngò dójaú nyi é Garai Gasang lé, jeju hkya-ôn nyi lhê. 4 Ngò gi, ngò má gabú hkyô byíng jùp sháng gàq nghû, náng é ngaùbyi lé myìtbûn nyì mù, nang lé gyai yhang myàng nau nyi ri. 5 Ngò gi, náng é gyíng é lùmjíng myìt lé lhoqpûn yù mù, náng whoí Lu‑i eq náng nu Yu‑ni nhik chyáng má hí bo é lùmjíng myìt, ahkuî, náng chyáng le bo ri nghû, hkyak myìt lum nyi lhê. 6 Hau é yánmai, ngò lòq ke byî é dông, nàng má bo tô é Garai Gasâng é chyûnghuq lé, gyúng nhang nyì râ matú, nang lé ngò lhoqpûn kat lhê. 7 Hkâsu mù gâ le, Garai Gasang gi, gyùq sê é myìt ngá-nhúng lé a kat byî é za, a-tsam bo é myìt, chyitdàp sê é myìt, yhûmsing gùng lé dàt hkang é myìt shèq kat byî tô é ru nghut lhê.
8 Haû mù luî, nàng gi, ngá-nhûng é Yhûmsîng eq séng luî sàksé hkâm é hkyô má le, Yhâng é yánmai htóng byû dùt to sû ngá é hkyô má le, hoq myìt a bo é za, Garai Gasâng é wum-o mai, haû gabú danglu é matú, ngò eq rahá wuîhke jamjau chôm hui gòq. 9 Garai Gasang gi, ngá-nhúng zui saî é múzó dông a nghut é za, Yhânggùng yhang myìt sôn tô é hkyô eq Yhâng é jeju yánmai za, ngá-nhúng lé, hkyi yù luî chyoiyúng é chyungxe duì hkyô má ji yù bê nghut ri. Ahkyíng nghu é lháng a jòq shi mai yhang, jeju haû gi, Hkrisidùq Yesuq má ngá-nhúng lé byî to gù nghut bê. 10 Nghut kôlhang, ngá-nhûng é hkyi yù Sû, Hkrisidùq Yesuq nyi htoq é dông, ahkuî, haû lé lhoqhtoq shit bê nghut ri. Yhang gi, shî‑nò hkyô lé lhoqhtên pyám luî, haû gabú danglù dông mai, chyungxe lé le, a dàt htên byòq é hkyô lé le, lhoqhtoq shit bê nghut ri. 11 Ngò gi, gabú danglu é matú hko kyo sû, lagyo eq mhoqshit sû dông, hkyin tô é hui sû nghut lhê. 12 Hau é yánmai, ngò gi, wuîhke jamjau shî lé huî nyi é nghut lhê. Nghut kôlhang, ngò gi, ó yùq lé lùmjíng bê nghut é hkyô lé, sê é htoq agó, Yhang lé ngò àp tô é pé lé, haú buìnyì jé shoq, Yhang wó zúng râ nghut lhê nghû hkyak myìt lum tô é yánmai, ngò a hoq.
13 Nàng gi, ngá chyáng mai wó gyô yu é tengmán dang pé lé, Hkrisidùq Yesuq má, lùmjíng myìt eq chyitdàp myìt mai alìk kut yu nyì àq. 14 Nang lé àp byî to bê, haû ge é mungdang lé, ngá-nhûng chyáng bo tô é Chyoiyúng So é wum-o mai zúng nyî àq.
15 Asi-a mau mâ é bang yùq hkangmó gi, ngo lé pyâm to kô é hkyô lé, nàng sê lhê; haú bang má, Hpugelu eq Heramoge nhik le bo akô nghut ri.
16 Haû Yhûmsîng gi, Onesihpuru é yhûmbyù lé shogyo nhikmyîn é hkyô tûn shit sháng gàq; hkâsu mù gâ le, yhang gi, ngo lé a-num num myìt lhoqngón é htoq agó, ngò wùt tô é shâmtoqtuî é yánmai, a hoq é za, 17 yhang, Romaq wà mó má jé nyi é hkûn, ngo lé myang hui shoq, ho shi-kùt é sû nghut ri. 18 Haû Yhûmsîng gi, haú buìnyì má, yhang lé haû Yhûmsing é shogyo nhikmyin hkyô byi sháng gàq! Ehpesu wà mó má, yhang ngo lé hkâ-myhó garúm bê nghut é gi, nàng rago yhang sê lhê.