6
Jùn dùt é wòlai hkaû má nyi é lhúnglhâng bang gi, yhángmòq é yhûmsîng wuì lé gyai yhang hkúngga gíng lhê nghû, myìt yù râ dùt lhê; haú hkûn shèq, Garai Gasâng é myìng eq ngá-nhûng é mhoqshit hkyô gi, lùmù gànsang é a hui râ nghut lhê. 2 Lùmjíng é yhûmsîng wui é jùn gi, gu-mang wuì nghut é yánmai, yhángmòq lé a wú myhuq é za, yhángmòq dójaú luî a-kyû myang hkâm zô é bang gi, lùmjíng bang eq chyitdàp gíng é bang nghut é yánmai, yhángmòq lé je ge é dông dójaú râ lhê. Shí hkyô pé lé, nàng gi, yhángmòq lé mhoq byî nyi é eq lhoqpun lhoqkying byî nyì àq.Ngùn Lé Chyitdàp É Hkyô
3 Rayùq yùq gi, shut é lùmjíng hkyô lé mhoqshit luî, ngá-nhûng é Yhûmsîng Yesuq Hkrisidùq é tengmán mhoqshit hkyô eq târâ hkúnggâ é mhoqshit hkyô lé a myìt huî é nghut jáng, 4 haú yùq gi, nghutbûn é sû eq haî lé le a sê gyô é sû nghut ri. Yhang gi, htuqhtîng lhûm é hkyô pé lé ô nau é, a ge é myìt bò luî, dang eq séng mù mabyòq lhoqhtoq ri; haû mai, mânon é hkyô, byòq lhum byòq cheq é hkyô, lùmù gànsang é hkyô, agè ashop é dông myìt ngam pyâm é hkyô eq, 5 haû tengmán hkyô lé lhoqhpyuq pyám mù, târâ hkúngga hkyô gi, ngùn zè wó hkyô za nghut ri ga myìt yu é, i‑myìt lhoqhtên pyám bê bâng é gyoro má, byìn a huî é hkyô pé lé, lhoqhtoq kat ri.
6 Nghut kôlhang, târâ hkúnggâ hkyô má nhik dìk é hkyô bo é nghut le gi, a-myàt mó nghut nyi ri. 7 Hkâsu mù gâ le, ngá-nhúng gi, mingkan htoq má haí jung le a yu wang lé, haû mai le haî wó yu htoq ló râ a nghut. 8 Haû mù luî, ngá-nhúng gi, wùtbu wùtmè eq zoshuq wó é nghut jáng, hau èq nhik dìk nyì sháng. 9 Wó naû sùt nau é byu pé gi, gúnglaú hkyô eq tuihkyó má le, haû byòq yèq hkyô eq htên byòq hkyô má, byu pé lé myùp shî nhang é, ngha é hkyô myo myo eq myìt nò nhâng nau é hkyô má le, byìt gyó wâng kôrâ nghut lhê. 10 Hkâsu mù gâ le, ngùn lé chyitdàp é hkyô gi, agè ashop hkyô ajung jûng é a-pûn awang nghut nyi ri. Byù ra-am gi, ngùn lé ô naù luî, haû lùmjíng hkyô mai sô nghoq ló mù, yhûmsing gùng lé yhûmsîng, haû yón kuq hkyo èq htaû ròt pyám bekô nghut ri.
Timohti Lé Pying Kat É Dang
11 Nghut kôlhang, Garai Gasâng é byù nàng gi, haú pé bànshoq lé koi pyám luî, díngmán hkyô, târâ hkúngga hkyô, lùmjíng hkyô, chyitdàp hkyô, hkam jan hkyô eq nú nhâm é hkyô pé lé châng hkat nyî àq. 12 Lùmjíng hkyô eq sêng é ge é majan le zân nyì àq. Hàp yù lùmjíng bê ga, sàksé myo myô pê é hí má, ge é dông nàng yín yu é hkûn, wùt yu é hui luî wó é ahtum abyùq é chyungxe lé, zuî zing nyì àq. 13 Haû lhúnglháng lé chyungxe byî é Garai Gasâng é hí má le, Pontu Pilat chyáng sàksé hkâm nyi é hkûn, ge é dông yín yu é Hkrisidùq Yesuq é hí má le, ngò, nang lé pying kat lhê: 14 Yhâng é ahkyíng yàm-yòq jé jáng, Garai Gasang htoq shit nhâng râ nghut é sû, ngá-nhûng é Yhûmsîng Yesuq Hkrisidùq htoq shit é buìnyì jé shoq, 15 nàng gi, agòt a‑u é hkyô eq mara hûn râ hkyô a bo é za, hkunmó shî lé châng nyì àq. Garai Gasang gi, hkungsô wó sû, Yhang za ùp sû, hkóhkam pê é Hkóhkâm, yhûmsing pê é Yhûmsîng, 16 Yhang za ahtum abyùq dui nyì sû, a ge chyâng htèp e é maubó má dui nyì sû, ó yùq èq le a myang wú é, a wó myang é sû nghut nyi ri. Xânghpoq nge wó hkyô eq hpungwup a-tsam gi, Yhâng chyáng ahtum abyùq ru joq nyî sháng gàq ô! Amen.
17 Shí i-pyàt má wó sùt é bang gi, myìt myhâng nghutbûn é hkyô a jòq râ eq a gîng é sùtzè má yhángmòq é myìt myòqbyù hkyô a tô é za, ngá-nhúng nguì ngón yùqyo nyì râ matú junghkang jungmó lé agùn agó byî é sû, Garai Gasâng chyáng za, yhángmòq myìt myòqbyu nyì râ matú, hkunmó hkyó aq. 18 Ge é hkyô kut luî, ge é múzó má wó sùt nyì mù, a chum é za, gam chûng nau é myìt bò râ matú, yhángmòq lé hkunmó hkyó aq. 19 Haú dông mai, yhángmòq gi, jé lô râ i-pyàt é matú gîng é a-pûn awang dông, yhángmòq é matú sùtzè wó tsîng to kôrâ nghut lhê; haú hkûn shèq, yhángmòq gi, chyungxe kyîng nghut é chyungxe haû le wó zuî zing to kôrâ nghut lhê.
20 Timohti ê, nang lé àp to bê hkyô lé, zúng nyî àq. Târâ a hkúnggâ é pô-ming ming bâng èq hpàqchyî nghut lhê ga myhîng shut é htuqhtîng lhum lhum kut é hkyô lé, koi pyám aq. 21 Byù ra-am gi, haû lé hpàqchyî nghut lhê ga yín yû kôluî, haû lùmjíng hkyô mai sô nghoq htoq ló byùq bekô nghut ri.
Jeju gi, núngmòq chyáng ru joq nyî sháng gàq ô.