Sûwún Wuì, Chuimó Pé, Jùn Pé Eq Séng Luî Hpàqchyî Byî É Hkyô
5
Chyungxe zànwut ko sû lé dang htân a tân é za, yhûmsing é îwa lé su, yhang lé lhoqpun lhoqkying aq. Zorâm wuì lé gi, gu-mang wuì lé su, 2 chyungxe zànwut kô é myiwe wuì lé gi, înû pé lé su zùm yàp luî, zo-myi wuì lé gi, nhammó wuî lé su sansêng é i‑myìt bànshoq èq zùm yàp nyì àq.3 Gè gè yhang garúm râ dùt é chuimó myhî pé lé, hkúnggâ nyì keq. 4 Nghut kôlhang, chuimó myhí rayùq yùq gi, zoshâng nghut nghut, gashu nghut nghut, wó é nghut jáng, haú bang gi, yhûmsing é i-kun lé wú gon luî, înu îwa eq îchyí îwhoî pé lé jeju taû é dông, yhángmòq é lùmjíng hkyô lé, zui saî é má lhoqmhán nhâng râ lé hí mhoq yû ra râ nghut lhê; hkâsu mù gâ le, haû gi, Garai Gasang ô nau é hkyô nghut ri. 5 Haû lùm râ ó yùq le a wó mù, gè gè yhang râ tô é chuimó myhí gi, Garai Gasâng chyáng myìt myòqbyu nyì luî, nyí, myín xoq xoq kyûdung mù, Garai Gasang garúm râ hkyô lé dûng nyi ri. 6 Nghut kôlhang, ngón hkyô za cháng luî chyungxe dui é chuimó myhí gi, chyungxe dui nyì kôlhang, shî gù nghut bê nghut ri. 7 Yhángmòq lé, ó yùq èq le mara a hûn kó sháng gàq, haú hkyô pé lé le mhoqshit byî nyì àq. 8 Rayùq yùq, yhâng é buìnùm ji-myi wuì lé a baú é htoq agó, je luî yhûmsing é i-kun byù lé a baú é nghut le gi, haû lùmjíng hkyô lé he-ngìk pyám bê nghut luî, a lùmjíng su htoq má je ashop é sû dùt bê nghut ri.
9 Hkyuq xê zàn byíng bê é chuimó myhí za a nghut jáng, chuimó jihpán má wó kat râ a nghut; hau htoq agó, yhang gi, yùqgè rayùq za wó wú é sû; 10 zoshâng wuì lé hku baú é sû, bíng lé rago dàt hkûlum é sû, sân-yúng bê bâng é hkyî lé chi byî é sû, wuîhke huî tô é bang lé garúm luî, ge é múzó junghkang jungmó má yhûmsing gùng yhang àp nhong nyi ri ga, yhang kut é ge é múzó má myìng hû é sû le, nghut râ lhê.
11 Chyungxe zànwut tiq é chuimó myhî pé lé, jihpán haú má hkâkat. Hkâsu mù gâ le, gùngsho ô nau é hkyo èq Hkrisidùq chyáng yhángmòq àp nhong tô é hkyô lé ung pyâm é hkûn, yhángmòq gi, myi ló naû kôrâ nghut lhê. 12 Haû mù, yhángmòq gi, sânghi lé yhángmòq danghtum htûm tô é lé lhoqhpyoq pyám kô é yánmai, târâ darâ é hui zo kôrâ nghut lhê. 13 Hau htoq agó, yhángmòq gi, rayhûm htâng rayhûm châng wang wún kômù, lagôn mán byùq kôrâ nghut lhê. Lagôn é bang za dùt kôrâ a nghut, lùmù gànsang é bang eq yhángmòq taí a ge é pé lé taí kômù, yhûmsîng eq a sêng é mû má châng wang nyo wún é bang le, dùt kôrâ nghut lhê. 14 Haû mù luî, gye pé mai lùmù gànsâng dang a wó taî pyám kó sháng gàq, chyungxe zànwut tiq é chuimó myhî pé gi, myi ló mù, zoshâng hkû luî, yhángmòq é i-kun lé gôn lajang râ matú, ngò, yhángmòq lé hpàqchyî byî kat lhê. 15 Hkâsu mù gâ le, ra-am gi, lhing taû ló kôluî, Tsádán é htâng châng nyì lùgù nghut bekô nghut ri.
16 Lùmjíng é myiwe rayùq yùq gi, yhâng é i-kun má chuimó myhí wó é nghut le, haú yùq é matú noqkuq hpúng lé wòlai a hun é za, yhang mai garúm yû ra râ nghut lhê; haú hkûn shèq, noqkuq hpúng gi, gè gè yhang râ tô é chuimó myhî pé lé wó garúm râ nghut lhê.
17 Haû noqkuq hpúng lé rago za shuî û é hpúng sûwún wuî gi, a-kyû í tú hkam yù gíng lhê; haû mungdang hko é hkyô eq mhoqshit é hkyô má shi-kùt é sûwún wuî gi, je riyhang hkam yù gíng lhê. 18 Hkâsu mù gâ le, “Gùq nâng nyi é no lé, nhuttsung hkâ-tsûng to byi.”a ga le, “Mû zui sû gi, yhâng é zuihpau wó yû gíng lhê.”b ga le, Chyúmdang má taî tô ri. 19 Hpúng sûwún rayùq lé mara hun é hkyô lé, í yùq sum yuq mai sàksé hkâm é za a nghut le gi, hkâlhom yù. 20 Nghut kôlhang, lhoqpun lhoqkyîng é hkyô lé góbang wó yû kó sháng gàq, mara kut shut é bang lé, shiwa byu pê hí má tân mhoqshit àq.
21 Pying kat é dang shi pé lé, gamhkui myìt a bo é za châng nyì râ eq, myòqdong hkyîn luî haî le a kut râ matú, Garai Gasang eq Hkrisidùq Yesuq é hí má le, hkyin yù huî é maumang lagyô pê é hí má le, ngò, nang lé pying kat lhê.
22 Ó yùq é ahtoq má le lòq kec byi râ lé hkâhân; góbâng é mara hkaû má le hkâbo lòm. Yhûmsîng yhang yhûmsîng sân-yúng shoq kut nyî àq.
23 Náng é wamdau ra luî, a-num num no lò lò dùt é yánmai, nàng gi, wuì za shuq é hkyô lé nô pyám luî, tsibyiq wing ra-tsuí tsuí shuq byi aq.