Timohti Lé Mhoqshit É Hkyô
4
Ló htâng buìnyì pé má, byù ra-am gi, lùmjíng hkyô mai yhik htoq ló luî, mhaú zô é sô pê htâng cháng kôrâ eq nàt gang mai lo é mhoqshit hkyô pé lé gyo byi kôrâ nghut lhê ga, haû Sô gi, san za taî ri. 2 Haû sû é mhoqshit hkyô pé gi, gègùn labyoq kut é byù mhaû pê chyáng mai lo é nghut lhê; haú bâng é myìt nhiklhum gi, nyhê nhe tô é shâmtoq èq nyhê man tô é su dùt byùq bê nghut ri. 3 Haú bang gi, hâng lhûm é hkyô lé hkûm tang é hkyô lé le, haû lùmjíng luî tengmán hkyô lé sê é bang mai jeju hkya-on mù hàp yù ge é, Garai Gasang hpan to byî é zoshuq lé koi pyám nhang é le, kut akô nghut ri. 4 Garai Gasang hpan tô é lhúnglháng gi, ge é chyat nghut ri; Garai Gasâng é mungdang eq kyûdûng é dang dông haú pé lé lhoq sân-yúng nyi é nghut lhê yánmai, 5 jeju hkya-on luî hàp yu é nghut le gi, haí jung lé lháng he-ngìk pyám râ hkyô a bò nghut ri.6 Haû gu-mang wuì lé, nàng haú hkyô pé lhoqpun lhoqkyîng é nghut le gi, nàng gi, haû nàng cháng bê ge é mhoqshit hkyô eq lùmjíng hkyô mâ é tengmán hkyô má, kô myhâng sû nàng nghut râ htoq agó, Hkrisidùq Yesuq é ge é hpúngmû wùn sû le dùt râ nghut lhê. 7 Garai a bo é myìt htoq mhô-myi dang eq hpô-myhí mâng pê é mhô-myi dangsôm lé koi pyám luî, târâ hkúnggâ é hkyô má yhûmsing gùng lé lhoqkûng yù àq. 8 Hkâsu mù gâ le, gùngsho lé lhoqkûng é hkyô gi, a-kyû shau za htoq é nghut lhê; nghut kôlhang, târâ hkúnggâ é hkyô kúm gi, jung hkangmó é matú a-kyû bo lhê nghut mù luî, shí i-pyàt má le, htang pyàt má le, a-kyû bo nyi ri.
9 Haû gi, bànshoq hàp yù gíng é, lùm gíng é mungdang nghut lhê. 10 Haû mù luî, xângzo byù bànshoq bâng é hkyi yù Sû nghut é, je riyhang, lùmjíng bâng é hkyi yù Sû nghut é, rû dui nyi é Garai Gasang má, ngá-nhúng, myìt myòqbyu to bê nghut é yánmai, ngá-nhúng gi, gyai yhang shi-kùt nyi lhê.
11 Haú pé lé, hkunmó hkyó luî mhoqshit byî nyì àq. 12 Náng é zorâm pyàt lé, ó yùq èq le a wú tiq pyám sháng gàq, dang taî é má le, nyì yàp é hkyô má le, chyitdàp é hkyô má le, lùmjíng hkyô má le, sansêng é hkyô má le, lùmjíng bâng é matú alìk kut shit nyî àq. 13 Náng chyáng ngò jé lé é buìnyì jé shoq, nàng gi, Chyúmdang nghap kyô é má le, hko kyô é má le, mhoqshit é má le, àp nhong nyì àq. 14 Nàng gi, hpúng sûwún wuî náng é ahtoq má lòq ke byî é hkûn, myìqhtoi dang dông nang lé Garai Gasang byî to bê nghut é, so é hkyô eq sêng é chyûnghuq lé, haî su a ngàm hkâkut pyám.
15 Haú hkyô pé lé, myìt zìng zùq luî zui saî nyì àq; nàng kô myhang lo é hkyô lé, yùq hkangmó byu-myàng kó sháng gàq, náng gûng bànshoq haú pé má àp nhong nyì àq. 16 Náng é chyungxe duì hkyô má le, nàng mhoqshit é hkyô má le, rago sidìq nyì àq. Haú pé má ru gîng nyì àq, hkâsu mù gâ le, nàng haû su kut é nghut jáng, náng é chyungxe lé le, náng chyáng mai gyô yu é bang lé le, nàng wó hkyi yù râ nghut lhê.